ନୂଆଦିଲ୍ଳୀ,୨୭।୪: ପାକିସ୍ତାନୀ ଆତଙ୍କବାଦୀଙ୍କ ଦ୍ୱାରା ଅତ୍ୟାଚାରିତ ହୋଇ ୯୦ ଦଶକରେ ୬୪,୮୨୭ କଶ୍ମୀର ପଣ୍ଡିତ କଶ୍ମୀର ଛାଡ଼ି ଜମ୍ମୁ ପଳାୟନ କରିଥିବା ଗୃହ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ମନ୍ତ୍ରଣାଳୟ ପକ୍ଷରୁ ମଙ୍ଗଳବାର ୨୦୨୦-୨୧ ବାର୍ଷିକ ରିପୋର୍ଟ ପ୍ରକାଶ ପାଇଛି। ସେହିପରି ୧୯୯୦ରୁ ୨୦୨୦ ଭିତରେ ୧୪,୦୯୧ ସାଧାରଣ ଲୋକ ଏବଂ ୫,୩୫୬ ସୁରକ୍ଷାକର୍ମୀ ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଛନ୍ତି। କଶ୍ମୀର ପଣ୍ଡିତଙ୍କୁ ଛାଡ଼ି ଶିଖ୍ ଏବଂ ମୁସଲମାନ ସମ୍ପ୍ରଦାୟର ଅନେକ ଲୋକ କଶ୍ମୀର ଛାଡ଼ି ଜମ୍ମୁରେ ଆଶ୍ରୟ ନେଇଥିବା ମନ୍ତ୍ରଣାଳୟ କହିଛି। ବର୍ତ୍ତମାନ ସୁଦ୍ଧା ୪୩,୬୧୮ ପଞ୍ଜୀକୃତ ଶରଣାର୍ଥୀ ଜମ୍ମୁରେ ରହୁଥିବାବେଳେ ୧୯,୩୩୮ ପରିବାର ରାଜଧାନୀ ଦିଲ୍ଳୀ ଏବଂ ୧,୯୯୫ ଭାରତର ଅନ୍ୟ ରାଜ୍ୟଗୁଡ଼ିକରେ ବସବାସ କରୁଥିବା ପ୍ରକାଶିତ ରିପୋର୍ଟରେ କୁହାଯାଇଛି। କଶ୍ମୀର ଶରଣାର୍ଥୀଙ୍କ ହିତ ଉଦ୍ଦେଶ୍ୟରେ କେନ୍ଦ୍ର ସରକାର ପକ୍ଷରୁ ୬ ହଜାର ଲୋକଙ୍କୁ ଚାକିରି ସୁବିଧା ଯୋଗାଇଦିଆଯାଇଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
