ନୂଆଦିଲ୍ଲୀ, ୧୮।୯ : ଇଣ୍ଡୋ-ତିବ୍ଦତୀୟ ସୀମା ପୋଲିସ (ଆଇଟିବିପି) ପକ୍ଷରୁ ରବିବାର ଏହାର ୬୪ ଜଣ କନଷ୍ଟେବଳଙ୍କୁ ପଦୋନ୍ନତି ପ୍ରଦାନ କରାଯାଇଛି। ଆଇଟିବିପି ଦ୍ୱାରା ଜାରି ବିବୃତ୍ତି ଅନୁଯାୟୀ ପ୍ରାଣୀ ପରିବହନ କ୍ୟାଡରର ଏହି କନଷ୍ଟେବଳଙ୍କୁ ବିଭାଗୀୟ ପଦୋନ୍ନତି କମିଟି (ଡିପିସି) ଆଧାରରେ ଆସିଷ୍ଟାଣ୍ଟ ସବ-ଇନ୍ସପେକ୍ଟର (ଏସ୍ଆଇ) ପଦବୀକୁ ପଦୋନ୍ନତି ଦିଆଯାଇଛି। ଆଇଟିବିପି ପ୍ରାଣୀ ପରିବହନ କନଷ୍ଟେବଳଙ୍କୁ ପ୍ରଥମ ଥର ପାଇଁ ଏହି ପଦୋନ୍ନତି ମିଳିଥିବା କୁହାଯାଉଛି।
କେନ୍ଦ୍ରୀୟ ସଶସ୍ତ୍ର ପୋଲିସ ଫୋର୍ସ କହିଛି ଯେ ସମସ୍ତ ହେଡ କନଷ୍ଟେବଳ ବର୍ତ୍ତମାନ ଅଧିନସ୍ଥ ଅଫିସର (ଏସ୍ଓ) ହୋଇଯିବେ। ସେମାନେ ଆଇଟିବିପିରେ ୨୫ରୁ ୩୦ ବର୍ଷ କାର୍ଯ୍ୟ କରିଛନ୍ତି।
ସ୍ବରାଷ୍ଟ୍ର ମନ୍ତ୍ରଣାଳୟ ଚଳିତ ବର୍ଷ ଜୁଲାଇରେ ଏଏସଆଇ / ଏଟି ପଦବୀ ପାଇଁ ନିଯୁକ୍ତି ନିୟମ ନେଇ ବିଜ୍ଞପ୍ତି ଜାରି କରିଥିଲେ। ଏହି ଫାଷ୍ଟ-ଟ୍ରାକ ଅଧୀନରେ ଡିପିସିରେ ନିଶ୍ଚିତ ହୋଇଥିଲା ଯେ ପଦୋନ୍ନତି କାର୍ଯ୍ୟକାରୀ ହେବାରେ ଯେପରି କୌଣସି ବିଳମ୍ବ ନଘଟେ।
ଆଇଟିବିପି ମୁଖପାତ୍ର ବିବେକ ପାଣ୍ଡେ କହିଛନ୍ତି, ଆଇଟିବିପି ପ୍ରାଣୀ ପରିବହନ କ୍ୟାଡର ଅଧୀନରେ କନଷ୍ଟେବଳଙ୍କ ପଦୋନ୍ନତି ଦୀର୍ଘ ସମୟ ଧରି ବିଚାରାଧୀନ ଥିଲା।
