ନୂଆଦିଲ୍ଲୀ,୨୦ା୪(ପି.ଟି.): ୨୧ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୧୦୨ଟି ଆସନରେ ପ୍ରଥମ ପର୍ଯ୍ୟାୟ ଲୋକ ସଭା ନିର୍ବାଚନ ଶୁକ୍ରବାର ଅନୁଷ୍ଠିତ ହୋଇଯାଇଛି। ଭୋଟିଂ ଶେଷ ସୁଦ୍ଧା ମତଦାନ ହାର ୬୦.୦୩ ପ୍ରତିଶତ ରହିଥିବାବେଳେ ତାହା ଅଧିକ ବଢ଼ିପାରେ ବୋଲି ନିର୍ବାଚନ କମିଶନ କହିଛନ୍ତି। ସନ୍ଧ୍ୟା ୬ଟାରେ ମତଦାନ ଶେଷ ହୋଇଥିବାବେଳେ ସେହି ସମୟରେ ଧାଡ଼ିରେ ଛିଡ଼ା ହୋଇଥିବା ଲୋକମାନଙ୍କୁ ମତାଧିକାର ସାବ୍ୟସ୍ତ ଲାଗି ଅଧିକ ସମୟ ଦିଆଯାଇଥିଲା। ୨୦୧୯ରେ ପ୍ରଥମ ପର୍ଯ୍ୟାୟ ନିର୍ବାଚନରେ ମତଦାନ ହାର ୬୯.୪୩ ପ୍ରତିଶତ ରହିଥିଲା।
ପଶ୍ଚିମବଙ୍ଗ ଏବଂ ମଣିପୁରରେ ମତଦାନ ବେଳେ ହିଂସାକାଣ୍ଡ ଘଟିଥିବାବେଳେ ଛତିଶଗଡ଼ରେ ଅକସ୍ମାତ ଏକ ଗ୍ରେନେଡ୍ ଲଞ୍ଚର ସେଲ୍ ବିସ୍ଫୋରଣ ଘଟି ସିଆର୍ପିଏଫ୍ର ଜଣେ ଯବାନ ନିହତ ହୋଇଛନ୍ତି। ମତଦାନ ପ୍ରକ୍ରିୟା ସୁଚାରୁ ରୂପେ ଏବଂ ଶାନ୍ତିଶୃଙ୍ଖଳାର ସହ ଆଗେଇ ଚାଲିଥିବା ନିର୍ବାଚନ କମିଶନଙ୍କ ମୁଖପାତ୍ର କହିଛନ୍ତି। ଲୋକ ସଭା ନିର୍ବାଚନ ସହ ଅରୁଣାଚଳପ୍ରଦେଶ ଏବଂ ସିକିମ୍ରେ ବିଧାନସଭା ନିର୍ବାଚନ ମଧ୍ୟ ଏକସଙ୍ଗେ ଅନୁଷ୍ଠିତ ହେଉଛି। ଅନେକ ନୂଆ ଭୋଟର ପ୍ରଥମ ଥର ଭୋଟ ଦେବା ଲାଗି ବୁଥ୍କୁ ଆସିଥିବାବେଳେ ନବବିବାହିତ ଦମ୍ପତି ପାରମ୍ପରିକ ପୋଷାକରେ ଆସି ମତାଧିକାର ସାବ୍ୟସ୍ତ କରିଥିଲେ। ଏପରିକି ଭିନ୍ନକ୍ଷମ ଏବଂ ବୟସ୍କ ଲୋକମାନଙ୍କୁ ଷ୍ଟ୍ରେଚର ଏବଂ ହୁଇଲ୍ଚେୟାରରେ ଅଣାଯାଇ ସେମାନଙ୍କୁ ମତଦାନର ସୁଯୋଗ ଦିଆଯାଇଥିଲା। ତାମିଲନାଡୁ, ଅରୁଣାଚଳପ୍ରଦେଶ, ଆଣ୍ଡାମାନ ନିକୋବର ଏବଂ ଆସାମର କେତେକ ବୁଥ୍ରେ ଇଭିଏମ୍ରେ ସାମାନ୍ୟ ତ୍ରୁଟି ଦେଖାଦେଇଥିଲା। ସକାଳ ୭ଟାରୁ ମତଦାନ ଆରମ୍ଭ ହୋଇ ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିଥିଲା। ଅଲଗା ରାଜ୍ୟ ଦାବିରେ ନାଗାଲାଣ୍ଡରେ ଆଦିବାସୀ ସଂଗଠନ ପକ୍ଷରୁ ଅନିର୍ଦ୍ଦିଷ୍ଟ କାଳ ବନ୍ଦ ଡାକରା ଦିଆଯାଇଥିବାରୁ ୬ ଜିଲାରେ ଭୋଟ ଦେବାକୁ କେହି ଆସି ନ ଥିଲେ।
ପଶ୍ଚିମବଙ୍ଗର କୁଚ୍ବିହାର ଆସନରେ ହିଂସାକାଣ୍ଡ ଦେଖାଦେଇଥିଲା। ଟିଏମ୍ସି ଏବଂ ଭାଜପା କର୍ମୀଙ୍କ ମଧ୍ୟରେ ସଂଘର୍ଷ ଘଟିଥିବାବେଳେ ଉଭୟ ପକ୍ଷରୁ ଥାନାରେ ଏତଲା ହୋଇଛି। ହିଂସା କ୍ଷତିଗ୍ରସ୍ତ ମଣିପୁରରେ ମତଦାନ ବେଳେ ହିଂସାକାଣ୍ଡ ଦେଖାଦେବା ସହ ଇଭିଏମ୍ ଭାଙ୍ଗିଦେଇଥିବା ଅଭିଯୋଗ ହୋଇଛି। ମଣିପୁର ଉପତ୍ୟକାର ଭୋଟକେନ୍ଦ୍ର ନିକଟରେ ୨ଟି ଗୁଳିକାଣ୍ଡ ଘଟିଛି। ଇମ୍ଫାଲ ଇଷ୍ଟର ଖୁରାଇ ବୁଥ୍ ନିକଟରେ ଗୁଳିମାଡ଼ରେ ଜଣେ ବ୍ୟକ୍ତି ଆହତ ହୋଇଛନ୍ତି। ଛତିଶଗଡ଼ର ମାଓବାଦୀ ପ୍ରବଣ ବସ୍ତର ଲୋକ ସଭା ଆସନ ପାଇଁ ୫୮.୧୪ ପ୍ରତିଶତ ମତଦାନ ହୋଇଛି। ଭୁଲ୍ବଶତଃ ଗ୍ରେନେଡ୍ ବିସ୍ଫୋରଣରେ ଜଣେ ଯବାନ ନିହତ ହୋଇଥିବାବେଳେ ଆଇଇଡି ବିସ୍ଫୋରଣରେ ଜଣେ ଅଫିସର ଆହତ ହୋଇଛନ୍ତି। ତାମିଲନାଡୁର ସମସ୍ତ ୩୯ ଆସନରେ ଭୋଟିଂ ଚାଲିଥିବାବେଳେ ମତଦାନ ହାର ୪୦ ପ୍ରତିଶତରୁ ଅଧିକ ରହିଛି। ଇଭିଏମ୍ରେ ବୈଷୟିକ ତ୍ରୁଟି ପାଇଁ କେତେକ ବୁଥ୍ରେ ମତଦାନ ଘଣ୍ଟାଏ ବିଳମ୍ବ ହୋଇଥିଲା।
