ମୁମ୍ବାଇ,୧୪।୧୧: ପ୍ରତ୍ୟେକଙ୍କ ଘରେ ସ୍ତ୍ରୀ-ସ୍ବାମୀଙ୍କ ମଧ୍ୟରେ ଛୋଟ ଛୋଟ କଳି, ତକରାଳ ହୋଇଥାଏ। ଅନେକେ ଏହାକୁ ଭଲପାଇବାର ଭିନ୍ନ ରୂପ ବୋଲି ମନେକରନ୍ତି। ମୁମ୍ବାଇ ଅନ୍ଧେରୀରେ ରହୁଥିବା ଜଣେ ପ୍ରତିଷ୍ଠିତ ବ୍ୟବସାୟୀଙ୍କ ସ୍ତ୍ରୀ ସ୍ବାମୀଙ୍କୁ ବଶୀକରଣ ପାଇଁ ୫୯ ଲକ୍ଷ ଟଙ୍କା ଜଣେ ଜ୍ୟୋତିଷଙ୍କୁ ଦେଇଥିବା ଘଟଣା ସାମ୍ନାକୁ ଆସିଛି। ଘରେ ଲାଗି ରହିଥିବା ଝଗଡ଼ାରେ ଅତିଷ୍ଠ ହୋଇ ସେ ଏପ୍ରକାର ନିଷ୍ପତ୍ତି ନେଇଥିବା ପୋଲିସ କହିଛି। କଳାଯାଦୁ ଜରିଆରେ ସ୍ବାମୀଙ୍କୁ ସମ୍ପୂର୍ଣ୍ଣ ଭାବେ ନିଜ ଆୟତ୍ତକୁ ଆଣିବା ଲାଗି ସେ ଚେଷ୍ଟା କରିଥିଲେ। ଘଟଣା ନେଇ ମୁମ୍ବାଇର ପୋଓ୍ବାଇ ପୋଲିସ ଶନିବାର ଜ୍ୟୋତିଷ ବାଦଲ ଶର୍ମା ଓ ପରେଶ ଗଡା ନାମକ ବ୍ୟକ୍ତିଙ୍କୁ ଗିରଫ କରିଛି।
୩୯ ବର୍ଷୀୟ ଜଣେ ବ୍ୟବସାୟୀ ଜଣକ ସ୍ତ୍ରୀ ଓ ଦୁଇ ପିଲାଙ୍କ ସହ ଅନ୍ଧେରୀ ଇଷ୍ଟରେ ରହୁଥିଲେ। ୧୩ ବର୍ଷ ପୂର୍ବେ ଉକ୍ତ ବ୍ୟବସାୟୀଙ୍କ ସ୍ତ୍ରୀ ଅନ୍ୟଜଣଙ୍କ ସହ ଅନୈତିକ ସମ୍ପର୍କ ଥିବା ଜଣାପଡ଼ିଥିଲା।
ପରବର୍ତ୍ତୀ ସମୟରେ ପରିବାର ଲୋକଙ୍କ ଆପୋସ ବୁଝାମଣା ପରେ ମହିଳା ଜଣକ ପରେଶଙ୍କ ସହ କୌଣସି ସମ୍ପର୍କ ରଖିବେ ନାହିଁ ବୋଲି ରାଜି ହୋଇଥିଲେ। ଏ ଘଟଣା ପରଠୁ ଦୁହିଁଙ୍କ ଭିତରେ ମନୋମାଳିନ୍ୟ ଲାଗି ରହିଥିଲା। ଗତ ଅକ୍ଟୋବର ଦ୍ୱିତୀୟ ସପ୍ତାହରେ ବ୍ୟବସାୟୀ ଜଣକ ସ୍ତ୍ରୀଙ୍କ ଜାଣତରେ ଘରେ ୩୫ ଲକ୍ଷ ଟଙ୍କା ଆଣି ରଖିଥିଲେ, ଯାହାକୁ ସେ ଦୀପାବଳି ଅବସରରେ କର୍ମଚାରୀମାନଙ୍କୁ ଦେବାର ଯୋଜନା ଥିଲା। ଅକ୍ଟୋବର ୧୮ରେ ଯେତେବେଳେ ବ୍ୟବସାୟୀ ଜଣକ ଟଙ୍କା କଥା ସ୍ତ୍ରୀଙ୍କୁ କହିଲେ, ସେ ଏ ବାବଦରେ ଜାଣି ନ ଥିବା କହିଥିଲେ। ପରେ ସ୍ବାମୀ ତାଙ୍କ ବଡ଼ ଭାଇଙ୍କୁ ଏ ବିଷୟରେ କହିଥିଲେ। ଦୁଇ ଭାଇ ମହିଳାଙ୍କୁ ଟଙ୍କା ସମ୍ପର୍କରେ ପଚାରିବାରୁ ସେ ସବୁ ସତ ମାନିଯାଇ କହିଥିଲେ, ଘରେ ଲାଗିଥିବା କଳିଝଗଡ଼ାର ସମାଧାନ ପାଇଁ ସେ ପାଖାପାଖି ୫୯ ଲକ୍ଷ ଟଙ୍କା ବାଦଲ ଶର୍ମା ନାମକ ଜ୍ୟୋତିଷଙ୍କୁ ଦେଇଛନ୍ତି, ଯାହାଙ୍କ କଣ୍ଟାକ୍ଟ ସେ ଇନ୍ଷ୍ଟାଗ୍ରାମରୁ ପାଇଥିଲେ। ନିଜ ଅସୁବିଧା କଥା ମହିଳା ଜଣକ ବାଦଲଙ୍କୁ ଜଣାଇବା ପରେ ସେ କଳାଯାଦୁ ଦ୍ୱାରା ଏହାର ସମାଧାନ କରିବେ ବୋଲି ପ୍ରତିଶ୍ରୁତି ଦେଲେ। ଏକଥା ମହିଳା ଜଣକ ନିଜ ପୁରୁଷ ବନ୍ଧୁ ପରେଶଙ୍କୁ ମଧ୍ୟ ଜଣାଇଥିଲେ। ମହିଳା ଓ ଜ୍ୟୋତିଷଙ୍କ ମଧ୍ୟରେ ପରେଶ ମଧ୍ୟସ୍ଥତାର କାମ କରୁଥିବା ପୋଲିସ କହିଛି। ଅର୍ଥ ଏବଂ ଅନେକ ସୁନା ଗହଣା ମହିଳା ଜଣକ ବାଦଲଙ୍କୁ ଦେଇଥିବା କହିଥିଲେ, ଯାହାପରେ ସ୍ବାମୀ ଏ ନେଇ ପୋଓ୍ବାଇ ଥାନାରେ ଅଭିଯୋଗ କରିଥିବା ଜଣାପଡ଼ିଛି। ଆଇପିସି ଦଫା ୪୨୦, ୪୦୬ ଏବଂ ୩୪ ଅଧୀନରେ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଛି।
