ବେଜିଂ: ପ୍ରତ୍ୟେକ କମ୍ପାନୀରେ କର୍ମଚାରୀଙ୍କ କାମ ଅନୁସାରେ ବୋନସ୍ ମିଳିଥାଏ। ଏଥିପାଇଁ ବିଭିନ୍ନ କମ୍ପାନୀର ଭିନ୍ନ ଭିନ୍ନ ନିୟମ ମଧ୍ୟ ରହିଛି। ତେବେ ଚାଇନାର ଏକ କମ୍ପାନୀ ତା’ର ନିୟମରେ ଏପରି ପରିବର୍ତ୍ତନ କରିଛି, ଯାହା କର୍ମଚାରୀଙ୍କୁ ଆଶ୍ଚର୍ଯ୍ୟ କରିଛି। ରିପୋର୍ଟ ମୁତାବକ, ଗୁଆଗଡୋନ ପ୍ରୋଭିନ୍ସ ଅଞ୍ଚଳର ଡୋଙ୍ଗ୍ପୋ ପେପର କମ୍ପାନୀ ବୋନସ ପାଇଁ କର୍ମଚାରୀଙ୍କ କାମ ନୁହେଁ ତାଙ୍କ ଫିଟ୍ନେସ୍ ଆଧାରରେ ନିୟମ କରିଛି। ଯଦି କେହି କର୍ମଚାରୀ ୫୦ କି.ମି. ଦୌଡିବେ ତେବେ ତାଙ୍କୁ ବୋନସ ଦିଆଯିବ। ଫଳରେ କର୍ମଚାରୀମାନେ କାମ ବଦଳରେ ଅଧିକ ସମୟ ଦୌଡ଼ିବାରେ ନିଜକୁ ଲଗାଇ ଦେଇଛନ୍ତି। ନିକଟରେ କମ୍ପାନୀ ତା’ର ନିୟମରେ ଏପରି ପରିବର୍ତ୍ତନ କରିଛି। କର୍ମଚାରୀଙ୍କୁ ପୂରା ବୋନସ୍ ସେତେବେଳେ ମିଳିବ, ଯେତେବେଳେ ସେମାନେ ମାସରେ ୫୦ କି.ମି. ଦୌଡ଼ିବେ। ୪୦ କି.ମି. ପାଇଁ ବୋନସ୍ର ୬୦ ପ୍ରତିଶତ ମିଳିବ। ୩୦ କି.ମି. ପାଇଁ ୩୦ ପ୍ରତିଶତ ବୋନସ୍ ମିଳିବ। ଯଦି କେହି ମାସରେ ୧୦୦ କି.ମି. ଦୌଡ଼ିବେ, ତେବେ ତାଙ୍କୁ ବୋନସ୍ ସହ ୩୦ ପ୍ରତିଶତ ଅତିରିକ୍ତ ବୋନସ୍ ମିଳିବ। ଏହି ସ୍କିମ୍ରେ ପର୍ବତାରୋହଣ ଏବଂ ଦ୍ରୁତଗତି ଦୌଡ଼ ସାମିଲ କରାଯାଇଛି, ଯାହା ଏକ୍ସରସାଇଜ୍ର ୬୦ କିମ୍ବା ୩୦ ପ୍ରତିଶତ ହେବ। କର୍ମଚାରୀଙ୍କ ଫୋନ୍ରେ ଥିବା ଆପ୍ ଜରିଆରେ ସେମାନଙ୍କୁ ଟ୍ରାକ୍ କରାଯିବ। କମ୍ପାନୀ ମାଲିକ ଏହି ପଲିସି ଜରିଆରେ ତାଙ୍କ କର୍ମଚାରୀମାନଙ୍କୁ ସୁସ୍ଥ ରଖିବାକୁ ପ୍ରୟାସ କରୁଥିବା କହିଛନ୍ତି। କର୍ମଚାରୀ ମଧ୍ୟ ଏପରି ପଲିସିରେ ଖୁସିଥିବା ସେ କହିଛନ୍ତି। କାରଣ ଏଥିରେ ସେମାନେ ସୁସ୍ଥ ରହିବା ସହ ରୋଜଗାର ମଧ୍ୟ କରିପାରିବେ।
