ନିମାପଡ଼ା,୮ା୬(ଡି.ଏନ୍.ଏ.): ରାଜ୍ୟରେ ମହିଳା ସ୍ବୟଂ ସହାୟକ ଗୋଷ୍ଠୀଙ୍କ ପାଇଁ ରାଜ୍ୟ ସରକାର ୫ ବର୍ଷ ମଧ୍ୟରେ ୫ହଜାର କୋଟି ଟଙ୍କା ବିନିଯୋଗ କରିବେ। ସୁରକ୍ଷା(୧) ପଞ୍ଚାୟତସ୍ତରୀୟ ମହିଳା ମହାସଂଘର ସାଧାରଣ ବୈଠକରେ ମୁଖ୍ୟ ଅତିଥି ଭାବେ ବିଧାୟକ ସମୀର ରଞ୍ଜନ ଦାଶ ଯୋଗଦେଇ ଏହା କହିଛନ୍ତି। ମହିଳାଙ୍କୁ ସଶକ୍ତ, ଉଦ୍ୟୋଗୀ, ଆତ୍ମନିର୍ଭରଶୀଳ, ସ୍ବାବଲମ୍ବୀ କରିବାକୁ ଆମ ସରକାର ଦୃଢ ସଂକଳ୍ପବଦ୍ଧ ଓ ସଦାଚେଷ୍ଟିତ। ମହିଳାଙ୍କ ବିକାଶ ହେଲେ ଦେଶ ଓ ରାଜ୍ୟର ପ୍ରଗତି ହେବ ବୋଲି ବିଧାୟକ ଦାଶ କହିଛନ୍ତି। ନିମାପଡ଼ା ବ୍ଲକ ଅଧୀନ ଉଚ୍ଛୁପୁର ପଞ୍ଚାୟତ କାର୍ଯ୍ୟାଳୟଠାରେ ମହାସଂଘର ପ୍ରତିନିଧିତ୍ୱ କର୍ମକର୍ତ୍ତାମାନଙ୍କ ଏକ ସାଧାରଣ ବୈଠକ ବୁଧବାର ଅନୁଷ୍ଠିତ ହୋଇଥିଲା।
ସମ୍ମାନିତ ଅତିଥି ଭାବେ ପଞ୍ଚାୟତ ସମିତି ଅଧ୍ୟକ୍ଷ ଶଙ୍କର ଭୋଇ, ଉପାଧ୍ୟକ୍ଷା ଅନସୂୟା ମହାନ୍ତି, ଜିଲା ପରିଷଦ ସଭ୍ୟ ପ୍ରଦୀପ୍ତ ଖଟୋଇ, ଓଡ଼ିଶା ଜୀବିକା ମିଶନ ନିମାପଡ଼ା ବ୍ଲକର ବିପିଏମ୍ ମଧୁଛନ୍ଦା ପ୍ରଧାନ, ବିଏଲ୍ସି ଜୟସ୍ମିତା ପ୍ରଧାନ, ମହାସଂଘ ସଭାନେତ୍ରୀ ମମତାରାଣୀ ପାଇକରାୟ, ସମ୍ପାଦିକା ଗୀତାଞ୍ଜଳି ବିଶ୍ୱାଳ, ବିଜେଡି ବ୍ଲକ ସଭାପତି ଅଶୋକ ସାହୁ ପ୍ରମୁଖ ଯୋଗଦେଇ ମହାସଂଘର ନିଷ୍ଠାପର କାର୍ଯ୍ୟ, ଆର୍ଥିକ ବିକାଶ କାର୍ଯ୍ୟକ୍ରମ, ଉଦ୍ୟମକୁ ଭୂରିଭୂରି ପ୍ରଶଂସା କରିଥିଲେ। ପଞ୍ଚାୟତର ଏହି ମହାସଂଘ ୨୦୦୨ ମସିହାରେ ମାତ୍ର ୨୫ଟି ମହିଳା ସ୍ବୟଂ ସହାୟକ ଗୋଷ୍ଠୀକୁ ନେଇ ଗଠିତ ହୋଇଥିବାବେଳେ ଏବେ ଏହି ମହାସଂଘ ଅଧୀନରେ ୧୮୫ଟି ମହିଳା ସ୍ବୟଂ ସହାୟକ ଗୋଷ୍ଠୀ ରହି କାର୍ଯ୍ୟ କରୁଥିବାବେଳେ ଏହି ମହାସଂଘ ଏବେ ଏକ ମହାଦ୍ରୁମରେ ପରିଣତ ହୋଇ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି। ଏହି ଅବସରରେ ସମାରୋହ ସ୍ଥଳରେ ପଞ୍ଚାୟତର ବହୁ ମହିଳା ସ୍ବୟଂ ସହାୟକ ଗୋଷ୍ଠୀଙ୍କ ଉତ୍ପାଦିତ ସାମଗ୍ରୀର ବହୁ ଷ୍ଟଲ୍ ଖୋଲାଯାଇଥିଲା। ଅତିଥିମାନେ ଏହି ଷ୍ଟଲ ପରିଦର୍ଶନ କରି ବେଶ୍ ଖୁସି ଅନୁଭବ କରିଥିଲେ। ସମାରୋହରେ ବହୁ ଏସ୍ଏଚ୍ଜି ସଦସ୍ୟା, ସିଆର୍ପି, ଏମ୍ବିକେ, ବ୍ୟାଙ୍କମିତ୍ରଙ୍କ ସମେତ ପ୍ରାୟ ୫ଶହ ମହିଳା ଯୋଗଦେଇଥିଲେ। ମହାସଂଘ ପକ୍ଷରୁ ମଞ୍ଚାସୀନ ଅତିଥିଙ୍କୁ ଭବ୍ୟ ସମ୍ବର୍ଦ୍ଧନା ପ୍ରଦାନ କରାଯାଇଥିଲା। ସାମାଜିକ କର୍ମୀ ଅଶୋକ ଦାସ ଉତ୍ସବରେ ଅଧ୍ୟକ୍ଷତା କରିଥିବାବେଳେ ସମ୍ପାଦକ ମମତାରାଣୀ ପାଇକରାୟ ବିବରଣୀ ପାଠ କରିଥିଲେ।
