ଭଞ୍ଜନଗର,୧୨ା୮(ବାବୁଲା ପ୍ରଧାନ): ଶନିବାର ବିଶ୍ୱ ହସ୍ତୀ ଦିବସ। ତେଣୁ ହାତୀମାନଙ୍କ ସୁରକ୍ଷା ପାଇଁ ସରକାରଙ୍କ ପକ୍ଷରୁ ରାଜ୍ୟର ବିଭିନ୍ନ ସ୍ଥାନରେ ଅନେକ କାର୍ଯ୍ୟକ୍ରମ ଆୟୋଜିତ ହେବ। ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ପକ୍ଷରୁ ଶନିବାର ପୂର୍ବାହ୍ନରେ ଲାଲସିଂ ନର୍ସରୀ ପରିସରରେ ଏକ ସଚେତନତା କାର୍ଯ୍ୟକ୍ରମ ଆୟୋଜନ ହୋଇଛି। ଦକ୍ଷିଣ ଘୁମୁସର ବନଖଣ୍ଡ ପକ୍ଷରୁ ମଧ୍ୟ ବିଭିନ୍ନ ରେଞ୍ଜରେ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହେବ। ହାତୀ ସୁରକ୍ଷା ପାଇଁ ସଚେତନତା କରାଯାଉଛି ସତ କିନ୍ତୁ ହାତୀ ମୃତ୍ୟୁ ରୋକିବାରେ ବିଭାଗ ଫେଲ୍ ମାରୁଛି। ୨୦୧୮ ଏପ୍ରିଲ ପହିଲାରୁ ୨୦୨୩ ଅଗଷ୍ଟ ୧୦ ତାରିଖ ସୁଦ୍ଧା ରାଜ୍ୟରେ ୪୫୧ ହାତୀଙ୍କ ମୃତ୍ୟୁ ହୋଇଛି। ସେଥିମଧ୍ୟରେ ଗଞ୍ଜାମ ଜିଲାରେ ୨୧ ହାତୀଙ୍କ ମୃତ୍ୟୁ ହୋଇଛି। ବିଗତ ଏକ ବର୍ଷ ମଧ୍ୟରେ କେବଳ ଉତ୍ତର ଘୁମୁସର ବନଖଣ୍ଡରେ ୮ ହାତୀଙ୍କ ମୃତ୍ୟୁ ହୋଇଛି।
ବିଗତ ୫ ବର୍ଷ ମଧ୍ୟରେ ୫୦ ହାତୀ ବିଷକ୍ରିୟା ଏବଂ ଶିକାର ଯୋଗୁ ପ୍ରାଣ ହରାଇଥିବା ଏକ ତଥ୍ୟରୁ ଜଣାପଡିଛି। ବିଦ୍ୟୁତ୍ ଆଘାତରେ ୮୪, ଟ୍ରେନ୍ ଧକ୍କାରେ ୨୨, ରାସ୍ତା ଦୁର୍ଘଟଣାରେ ୪, ସ୍ବାଭାବିକ ଭାବେ ୧୭୪ ହାତୀଙ୍କ ମୃତ୍ୟୁ ହୋଇଛି। ୧୦୫ ହାତୀ ମୃତ୍ୟୁର କାରଣ ଜଣାପଡିନାହିଁ। ସେଥିମଧ୍ୟରେ ଅଧିକାଂଶ ଶିକାର ଯୋଗୁ ମୃତ୍ୟୁ ହୋଇଥିବା ଆଶଙ୍କା କରାଯାଉଛି। ୧୨ଟି ହାତୀ ମରିବା ପରେ କାର୍ଯ୍ୟାନୁଷ୍ଠାନ ଭୟରେ ବିଭାଗୀୟ କର୍ମଚାରୀମାନେ ପ୍ରମାଣ ନଷ୍ଟ ପାଇଁ ଉଦ୍ୟମ କରିଛନ୍ତି। ଅପରପକ୍ଷେ ୨୦୧୭ରେ ଶେଷଥର ପାଇଁ ରାଜ୍ୟରେ ହାତୀ ଗଣନା ହୋଇଥିଲା। ୨ ବର୍ଷ ପରେ ପୁଣି ହାତୀ ଗଣନା ହେବା କଥା। କିନ୍ତୁ କରୋନା ଯୋଗୁ ଗଣନା ସେ ସମୟରେ ହୋଇପାରି ନ ଥିଲା। ଇତିମଧ୍ୟରେ ୬ ବର୍ଷରୁ ଊର୍ଦ୍ଧ୍ୱ ବିତିଗଲାଣି, କିନ୍ତୁ ହାତୀ ଗଣନା ହୋଇପାରିନାହିଁ। ୨୦୨୪ ମେ’ ମାସରେ ହାତୀ ଗଣନା ପାଇଁ ସରକାରଙ୍କ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ଏଥିପାଇଁ ବିଭାଗୀୟ ସମନ୍ବୟ ଏବଂ ସଚେତନତା ଲୋଡ଼ା ବୋଲି ପରିବେଶବିତ୍ ରଞ୍ଜିତ ପଟ୍ଟନାୟକ କହିଛନ୍ତି।
କରିଡର ବିଜ୍ଞପ୍ତି ପ୍ରକାଶନରେ ବିଳମ୍ବ
ହାତୀମାନଙ୍କ ସୁରକ୍ଷା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି। ହାଇକୋର୍ଟ ଏବଂ ଜାତୀୟ ଗ୍ରୀନ୍ ଟ୍ରିବ୍ୟୁନାଲ ପକ୍ଷରୁ ହାତୀମାନଙ୍କ ସୁରକ୍ଷା ପାଇଁ ବିଭିନ୍ନ ପଦକ୍ଷେପ ନେବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଛି। କିନ୍ତୁ ତାହା ଠିକ୍ ଭାବେ କାର୍ଯ୍ୟକାରୀ ହୋଇପାରୁନାହିଁ। ରାଜ୍ୟରେ ୧୪ଟି ହାତୀ କରିଡର ଅଛି। ସେଥିମଧ୍ୟରୁ ଅଧିକାଂଶ କରିଡର ହାତୀମାନଙ୍କ ଚଳପ୍ରଚଳ ପାଇଁ ଅସୁରକ୍ଷିତ ହୋଇପଡିଛି। ଗତ ୨୦୨୧ ଅଗଷ୍ଟ ୧୭ ତାରିଖରେ ଜାତୀୟ ଗ୍ରୀନ୍ ଟ୍ରିବ୍ୟୁନାଲ ପୂର୍ବାଞ୍ଚଳ ଜୋନ ପକ୍ଷରୁ ହାତୀ କରିଡର ବିଜ୍ଞପ୍ତି ପ୍ରକାଶ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଥିଲା। ରାଜ୍ୟ ସରକାର ଉକ୍ତ ନିର୍ଦ୍ଦେଶନାମା କାର୍ଯ୍ୟକାରୀ କରିବାରେ ବିଳମ୍ବ କରିଥିଲେ। ଫଳରେ ଗତ ମାର୍ଚ୍ଚ ୧୪ରେ ନିର୍ଦ୍ଦେଶନାମାକୁ କାର୍ଯ୍ୟକାରୀ କରିବାରେ ବିଳମ୍ବ କଲେ ଦୋଷୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଗ୍ରୀନ୍ ଟ୍ରିବ୍ୟୁନାଲ ପକ୍ଷରୁ ନିର୍ଦ୍ଦେଶନାମା ଆସିଥିଲା। ଏନ୍ଜିଟି ଆକ୍ଟ ୨୦୧୦ ଧାରା ୨୬ ଅନୁସାରେ ୩ ବର୍ଷ ଜେଲ ଦଣ୍ଡାଦେଶ ନଚେତ୍ ୧୦ କୋଟି ଟଙ୍କା ଜରିମାନା ହେବ ବୋଲି କୁହାଯାଇଥିଲା। ଏଥିସହ କାର୍ଯ୍ୟରେ ଅବହେଳା ପାଇଁ କାହିଁକି କାର୍ଯ୍ୟାନୁଷ୍ଠାନ ନିଆଯିବନି ବୋଲି ଟ୍ରିବ୍ୟୁନାଲ କୈଫିୟତ ମାଗିଥିଲେ, ଯାହାକୁ ନେଇ ରାଜ୍ୟ ସରକାର ଉକ୍ତ ନିର୍ଦ୍ଦେଶନାମା ବିରୋଧରେ ହାଇକୋର୍ଟର ଆଶ୍ରୟ ନେଇଥିଲେ। ବର୍ତ୍ତମାନ ଉକ୍ତ ନିର୍ଦ୍ଦେଶନାମା ଉପରେ ହାଇକୋର୍ଟ ସ୍ଥଗିତାଦେଶ ଜାରି କରିଛନ୍ତି।
