ନୂଆଦିଲ୍ଲୀ,୯ା୪(ପି.ଟି.):ଆସନ୍ତା ୧୯ ତାରିଖରେ ପ୍ରଥମ ପର୍ଯ୍ୟାୟରେ ୧୦୨ଟି ଲୋକ ସଭା ଆସନରେ ମତଦାନ ହେବାକୁ ଯାଉଥିବାବେଳେ ସେଥିରୁ ୪୨ ଆସନରେ ୩ କିମ୍ବା ତା’ଠାରୁ ଅଧିକ ପ୍ରାର୍ଥୀଙ୍କ ନାମରେ ଆପରାଧିକ ମାମଲା ରହିଛି। ନିର୍ବାଚନ ଅଧିକାର ସଂସ୍ଥା ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ପକ୍ଷରୁ ଏହି ରିପୋର୍ଟ ପ୍ରକାଶ ପାଇଛି। ପ୍ରଥମ ପର୍ଯ୍ୟାୟରେ ମୋଟ ୧,୬୨୫ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଥିବାବେଳେ ଏଡିଆର୍ ସେଥିରୁ ୧,୬୧୮ ପ୍ରାର୍ଥୀଙ୍କ ସତ୍ୟପାଠର ଅନୁଧ୍ୟାନ କରିଥିଲା। ସେମାନଙ୍କ ମଧ୍ୟରୁ ୧୬ ପ୍ରତିଶତ ବା ୨୫୨ ପ୍ରାର୍ଥୀଙ୍କ ନାଁରେ ଅପରାଧ ମାମଲା ରହିଥିବାବେଳେ ୧୦ ପ୍ରତିଶତ ବା ୧୬୧ ଜଣଙ୍କ ନାଁରେ ଗମ୍ଭୀର ଅପରାଧ ମାମଲା ଅଛି। ୭ ପ୍ରାର୍ଥୀଙ୍କ ନାଁରେ ହତ୍ୟା ମାମଲା ଏବଂ ୧୯ ଜଣଙ୍କ ନାଁରେ ହତ୍ୟା ଉଦ୍ୟମ ମାମଲା ରହିଛି। ୧୮ ପ୍ରାର୍ଥୀଙ୍କ ନଁାରେ ମହିଳା ବିରୋଧୀ ଅପରାଧ ମାମଲା ଥିବାବେଳେ ସେମାନଙ୍କ ମଧ୍ୟରୁ ଜଣକ ନାଁରେ ବଳାତ୍କାର ମାମଲା ରହିଥିବା ସେମାନେ ସତ୍ୟପାଠରେ ଘୋଷଣା କରିଛନ୍ତି। ସେହିପରି ୩୫ ପ୍ରାର୍ଥୀଙ୍କ ନାଁରେ ଘୃଣିତ ଭାଷଣକୁ ନେଇ ମାମଲା ରହିଛି। ଯେଉଁ ନିର୍ବାଚନ ମଣ୍ଡଳୀରେ ୩ କିମ୍ବା ତା’ଠାରୁ ଅଧିକ ଆପରାଧିକ ମାମଲା ଥିବା ପ୍ରାର୍ଥୀ ଥାଆନ୍ତି, ତାକୁ ‘ରେଡ୍ ଆଲର୍ଟ’ ନିର୍ବାଚନ ମଣ୍ଡଳୀ ଘୋଷଣା କରାଯାଇଥାଏ।
ରାଷ୍ଟ୍ରୀୟ ଜନତା ଦଳ (ଆର୍ଜେଡି)ର ସମସ୍ତ ୪ ପ୍ରାର୍ଥୀଙ୍କ ନାଁରେ ଅପରାଧ ମାମଲା ରହିଥିବାବେଳେ ଡିଏମ୍କେର ୨୨ ପ୍ରାର୍ଥୀଙ୍କୁ ୧୩ ଜଣ (୫୯%), ସମାଜବାଦୀ ପାର୍ଟିର ୭ରୁ ୩ ଜଣ (୪୩%), ଟିଏମ୍ସିର ୫ରୁ ୨ ଜଣ (୪୦%), ଭାଜପାର ୭୭ ପ୍ରାର୍ଥୀଙ୍କ ମଧ୍ୟରୁ ୨୮ ଜଣ (୩୬%) ଏବଂ କଂଗ୍ରେସର ୫୬ ପ୍ରାର୍ଥୀଙ୍କ ମଧ୍ୟରୁ ୧୯ ଜଣ (୩୪%)ଙ୍କ ନାଁରେ ଅପରାଧ ମାମଲା ରହିଛି। ସେହିପରି ଏଆଇଏଡିଏମ୍କେର ୩୬ ପ୍ରାର୍ଥୀଙ୍କ ମଧ୍ୟରୁ ୧୩ ଏବଂ ବିଏସ୍ପିର ୮୬ ପ୍ରାର୍ଥୀଙ୍କ ମଧ୍ୟରୁ ୧୧ ଜଣଙ୍କ ନାଁରେ ଆପରାଧିକ ମାମଲା ଥିବା ଜଣାପଡ଼ିଛି।
ପ୍ରଥମ ପର୍ଯ୍ୟାୟରେ କୋଟିପତି ପ୍ରାର୍ଥୀଙ୍କ ସଂଖ୍ୟା ୨୮ ପ୍ରତିଶତ, ଯେଉଁମାନଙ୍କ ସମ୍ପତ୍ତି ପରିମାଣ ୧ କୋଟି ଟଙ୍କାରୁ ଅଧିକ। ପ୍ରାର୍ଥୀମାନଙ୍କ ହାରାହାରି ସମ୍ପତ୍ତି ପରିମାଣ ୪.୫୧ କୋଟି ରହିଛି। ଆର୍ଜେଡିର ସମସ୍ତ ୪ ପ୍ରାର୍ଥୀ କୋଟିପତି ହୋଇଥିବାବେଳେ ଏଆଇଏଡିଏମ୍କେର ୩୫, ଡିଏମ୍କେର ୨୧, ଭାଜପାର ୬୯, କଂଗ୍ରେସର ୪୯, ଟିଏମ୍ସିର ୪ ଏବଂ ବିଏସ୍ପିର ୧୮ ପ୍ରାର୍ଥୀଙ୍କ ସମ୍ପତ୍ତି ୧ କୋଟିରୁ ଅଧିକ ବୋଲି ସତ୍ୟପାଠରେ ଦର୍ଶାଯାଇଛି। ମଧ୍ୟପ୍ରଦେଶର ଛିନ୍ଦଓ୍ବ୍ାରାରୁ କଂଗ୍ରେସ ପ୍ରାର୍ଥୀ ନକୁଲ ନାଥଙ୍କ ସମ୍ପତ୍ତି ପରିମାଣ ସର୍ବାଧିକ ୭୧୬ କୋଟି ହୋଇଥିବାବେଳେ ତାଙ୍କ ପଛକୁ ଏଆଇଏଡିଏମ୍କେର ଏରୋଡେ ପ୍ରାର୍ଥୀ ଅଶୋକ କୁମାରଙ୍କ ସମ୍ପତ୍ତି ୬୬୨ କୋଟି ଟଙ୍କା ବୋଲି ଜଣଶପଡ଼ିଛି। ଶିବଗଙ୍ଗାରୁ ଲଢ଼ୁଥିବା ଭାଜପା ପ୍ରାର୍ଥୀଙ୍କ ସମ୍ପତ୍ତି ୩୦୪ କୋଟି ଟଙ୍କା।
