ନୂଆଦିଲ୍ଲୀ,୨୦ା୧୧: ୨୦୨୭ ସୁଦ୍ଧା ଭାରତର ଅର୍ଥନୀତିକୁ ୫ ଟ୍ରିଲିୟନ୍ ଆମେରିକୀୟ ଡଲାରରେ ପହଞ୍ଚାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲକ୍ଷ୍ୟ ରଖିଥିବାବେଳେ ଦେଶର ମୋଟ ଘରୋଇ ଉତ୍ପାଦ (ଜିଡିପି) ୪ ଟ୍ରିଲିୟନ୍ ଡଲାର ଅତିକ୍ରମ କରିଥିବା ନେଇ କେତେକ ତଥ୍ୟ ଆଧାରରେ ପ୍ରସ୍ତୁତ ରିପୋର୍ଟ ରବିବାର ସାମାଜିକ ଗଣମାଧ୍ୟମରେ ଭାଇରାଲ ହୋଇଛି। ଏହା ସତ ହୋଇଥିଲେ ଭାରତର ବିକାଶ ଯାତ୍ରା ଉଚିତ ମାର୍ଗରେ ରହିଛି ବୋଲି କୁହାଯାଇପାରିବ। ଭାଜପା ଏହା ଉପରେ ଏକ ସ୍କିନ୍ଶଟ୍ ଶେୟାର କରିଥିବାବେଳେ ସରକାରଙ୍କ ପକ୍ଷରୁ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ।
ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ଦ୍ୱାରା ସଂଗୃହୀତ ତଥ୍ୟକୁ ଭିତ୍ତିକରି ବିଶ୍ୱର ଅର୍ଥବ୍ୟସ୍ଥାଗୁଡ଼ିକର ଲାଇଭ୍ ଜିଡିପି ଟ୍ରାକର୍ କୁହାଯାଉଥିବା ଉକ୍ତ ସ୍କ୍ରିନଶଟ୍କୁ ଅନେକ ଭାଜପା ନେତା ଶେୟାର କରିଛନ୍ତି। ଶିଳ୍ପପତି ଗୌତମ ଆଦାନୀଙ୍କଠାରୁ ନେଇ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ୍, ୨ କେନ୍ଦ୍ରମନ୍ତ୍ରୀ ଅର୍ଜୁନ ରାମ ମେଘଓ୍ବାଲ ଏବଂ ଜି. କିଷନ ରେଡ୍ଡୀଙ୍କ ପର୍ଯ୍ୟନ୍ତ ଏହାକୁ ଏକ୍ସ’ରେ ପୋଷ୍ଟ କରିଛନ୍ତି। ସେମାନେ ଭାରତର ବୈଶ୍ୱିକ ଉପସ୍ଥିତି ଓ ସଫଳତା ଲାଗି ମୋଦିଙ୍କୁ ପ୍ରଶଂସା କରିଛନ୍ତି। ଆଦାନୀ ନିଜ ପୋଷ୍ଟରେ ଲେଖିଛନ୍ତି, ଭାରତକୁ ଅଭିନନ୍ଦନ। ବୈଶ୍ୱିକ ଜିଡିପିରେ ଜାପାନ ୪.୪. ଟ୍ରିଲିୟନ୍, ଓ ଜର୍ମାନୀ ୪.୩ ଟ୍ରିଲିୟନ୍ ଡଲାର ଥିବାବେଳେ ଦୁଇଦେଶକୁ ଟପି ଭାରତ ତୃତୀୟ ବୃହତ୍ ଅର୍ଥନୀତିରେ ପରିଣତ ହେବା ପାଇଁ ଆଉ ୨ ବର୍ଷ ରହିଲା। ତେବେ ଏହା ଉପରେ ଆଇଏମ୍ଏଫ୍ କିମ୍ବା ସରକାରଙ୍କ କୌଣସି ପ୍ରତିକ୍ରିୟା ଆସିନାହିଁ। ଅର୍ଥ ମନ୍ତ୍ରଣାଳୟ କିମ୍ବା ଜାତୀୟ ପରିସଂଖ୍ୟାନ କାର୍ଯ୍ୟାଳୟ ମଧ୍ୟ ଭାଇରାଲ ପୋଷ୍ଟ୍କୁ ନେଇ କିଛି କହିନାହିଁ। ଏହା ଏକ ଫେକ୍ ପୋଷ୍ଟ ବୋଲି ସୂତ୍ରରୁ ଜଣାପଡ଼ିଛି।
