ବରଗଡ଼ ଅଫିସ,୧୦ା୯: ବରଗଡ଼ ଜିଲା ଅତାବିରା ପଟୁ ସମ୍ବଲପୁର ଆଡ଼କୁ ଯାଉଥିବା ଏକ ପରିବା ବୋଝେଇ ପିକ୍ଅପ୍ (ନଂ- ଓଆର ୦୩ ଏ ୦୪୩୪) ଗୁରୁବାର ୫୩ ନମ୍ବର ଜାତୀୟ ରାଜପଥର ଚକୁଳି ଫାର୍ମ ନିକଟ ସତୀଜୋର ବ୍ରିଜ୍ରେ ଦୁର୍ଘଟଣାଗ୍ରସ୍ତ ହୋଇଛି। ଗାଡ଼ିଟି ଦ୍ରୁତଗତିରେ ଆସି ବ୍ରିଜ ପୂର୍ବ ଡିଭାଇଡରରେ ବାଡେଇ ହୋଇ ଅପରପାଶର୍ବ ରାସ୍ତାରେ ଆଉ ଏକ ବ୍ରିଜରେ ବାଡ଼େଇ ହୋଇଥିଲା। ଫଳରେ ସେହି ଭ୍ୟାନ୍ରେ ବସିଥିବା ଲୋକେ ସତୀଜୋର ବ୍ରିଜର ୫୦ ଫୁଟ ତଳେ ପଡ଼ି ଛଟପଟ ହେଉଥିଲେ। ଏଥିରେ ଗଣେଶ ହିଆଲ(୪୦), ସ୍ତ୍ରୀ ଲକ୍ଷ୍ମୀ ହିଆଲ(୩୫)ଙ୍କ ସମେତ ୪ଜଣ ଆହତ ହୋଇଥିଲେ। ଅତାବିରା ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଆହତଙ୍କୁ ଉଦ୍ଧାର କରି ବୁର୍ଲା ଡାକ୍ତରଖାନାକୁ ପଠାଇଛନ୍ତି।
