ଅହମଦାବାଦ,୧୦।୧୧ : ଗୁଜରାଟ ବିଧାନସଭା ନିର୍ବାଚନ ପାଇଁ ବହୁ ବିଚାର ବିମର୍ଷ ପରେ ଭାଜପା ଗୁରୁବାର ପ୍ରଥମ ପ୍ରାର୍ଥୀ ତାଲିକା ପ୍ରକାଶ କରି ମୋଟ ୧୮୨ ଟି ଆସନ ମଧ୍ୟରୁ ୧୬୦ ଜଣଙ୍କ ନାମ ଘୋଷଣା କରିଛି। ଏଥିରେ କ୍ରିକେଟର ରବିନ୍ଦ୍ର ଜାଡେଜାଙ୍କ ସ୍ତ୍ରୀ ରିବାବା ଜାଡେଜାଙ୍କୁ ପାର୍ଟି ଟିକେଟ ଜାମ ନଗର ଉତ୍ତରରୁ ଦେଇଛି।
ହାର୍ଦ୍ଦିକ ପଟେଲଙ୍କୁ ଭୀରଗାମରୁ ପ୍ରାର୍ଥୀ କରାଯାଇଛି। ଘାଟଲୋଡିଆ ଆସନରୁ ରାଜ୍ୟ ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ ପ୍ରତିଦ୍ୱନ୍ଦ୍ୱିତା କରିବେ।
୧୬୦ଜଣ ପ୍ରାର୍ଥୀଙ୍କ ମଧ୍ୟରୁ ୩୮ ନୂଆ ଚେହେରାଙ୍କୁ ସୁଯୋଗ ଦିଆଯାଇଥିବାବେଳେ ୬୯ ଜଣ ବିଧାୟକଙ୍କୁ ପୁଣି ପ୍ରାର୍ଥୀ କରାଯାଇଛି। ଏଥର ମୋରବିର ସିଟିଂ ବିଧାୟକଙ୍କ ଟିକଟ କଟାଯାଇଛି। ଦୁର୍ଘଟଣା ସମୟରେ ଲୋକଙ୍କ ଜୀବନ ରକ୍ଷା କରିଥିବା ପୂର୍ବତନ ବିଧାୟକ କାନ୍ତିଲାଲ ଭାଇ ଏଥର ଏହି ଆସନରୁ ଟିକଟ ପାଇଛନ୍ତି।
ଟିକଟ କଟିଥିବା ୩୮ ବିଧାୟକ ନିର୍ବାଚନରେ ବିରୋଧୀ ଭୂମିକା ଗ୍ରହଣ କରିବା ନେଇ ଆଶଙ୍କା ଥିବାରୁ ଭାଜପାର ଚିନ୍ତା ବଢ଼ିବାରେ ଲାଗିଛି।
