ଭୁବନେଶ୍ୱର,୧୦ା୯(ସୂର୍ଯ୍ୟକାନ୍ତ ବେହେରା)ଜଣେ ଯୁବତୀଙ୍କ ନାଁରେ ନକଲି ଫେସ୍ବୁକ୍ ଆକାଉଣ୍ଟ ଖୋଲି ବିଭିନ୍ନ ଆଳରେ ଯୁବକଙ୍କୁ ୩୪ ଲକ୍ଷ ଠକି ନେଇଛନ୍ତି ଜଣେ ଯୁବ ଇଞ୍ଜିନିୟର। ଏନେଇ ଅଭିଯୋଗ ହେବାପରେ ସାଇବର ଥାନା ପୋଲିସ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ଗଞ୍ଜାମର ଶ୍ରୀଧର ମହାରଣା। ତାଙ୍କଠାରୁ ମୋବାଇଲ୍ ଫୋନ୍, ଲାପ୍ଟପ୍, ଡେବିଟ୍ କାର୍ଡ, ଆଇଡି କାର୍ଡ, ବ୍ୟାଙ୍କ ଖାତା ଆଦି ଜବତ କରାଯାଇଛି। ପଚରାଉଚରା ପରେ ଅଭିଯୁକ୍ତ ଶ୍ରୀଧରଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅଙ୍କିତ ଗୁପ୍ତାଙ୍କ ଅଭିଯୋଗ ଆଧାରରେ ପୋଲିସ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପୋଳିସ ସୂଚନାନୁସାରେ, ଅଭିଯୁକ୍ତ ଶ୍ରୀଧର ଜଣେ ଯୁବତୀଙ୍କ ନାମରେ ଏକ ନକଲି ଫେସ୍ବୁକ୍ ଆକାଉଣ୍ଟ ଖୋଲିବା ସହ ପ୍ରୋଫାଇଲ ତିଆରି କରିଥିଲେ। ସେଥିରେ ଜଣେ ସୁନ୍ଦରୀ ଯୁବତୀଙ୍କ ଫଟୋ ଦେବା ସହ ତାଙ୍କ ବାୟୋରେ ନିଜକୁ ଗୋଟିଏ ଘରୋଇ ମେଡିକାଲ କଲେଜର ତୃତୀୟ ବର୍ଷର ଏମ୍ବିବିଏସ୍ ଛାତ୍ରୀ ବୋଲି ଉଲ୍ଲେଖ କରିଥିଲେ। ଏଥିସହ ବିଭିନ୍ନ ଯୁବକଙ୍କ ପାଖକୁ ଫ୍ରେଣ୍ଡ୍ ରିକ୍ୟୁଏଷ୍ଟ୍ ପଠାଇ ଫସାଉଥିଲେ। ତେବେ ଠକେଇର ଶିକାର ହୋଇଥିବା ଅଙ୍କିତ ଗୁପ୍ତା ଉକ୍ତ ଫ୍ରେଣ୍ଡ୍ ରେକ୍ୟୁଏଷ୍ଟକୁ ଗ୍ରହଣ କରିବା ପରେ ଅଭିଯୁକ୍ତ ଶ୍ରୀଧର ଯୁବତୀଙ୍କ ନାମରେ ମେସେଞ୍ଜରରେ ଚାଟିଂ କରି ଫୋନ୍ ନମ୍ବର ବିନିମୟ କରିଥିଲେ। ପରେ ସେମାନେ ହ୍ବାଟ୍ସଆପ୍ ଓ ବିଭିନ୍ନ ମୋବାଇଲ ନମ୍ବରରେ ପରସ୍ପର ସହ ଚାଟିଂ ଆରମ୍ଭ କରିଥିଲେ। ଯୁବତୀଙ୍କ ନାମରେ ସମ୍ପର୍କ ବଢ଼ାଇବା ପରେ ଅଭିଯୁକ୍ତ ଶ୍ରୀଧର ନାନା ବାହାନା କରି ଅଙ୍କିତଙ୍କଠାରୁ ୩୪ ଲକ୍ଷ ୩୭ ହଜାର ୫୦୦ ଟଙ୍କା ଠକି ନେଇଥିଲେ।
