ପୁରୀ ଅଫିସ,୨୫ା୫: ପୁରୀ ଚାରିଧାମ ମଧ୍ୟରେ ଅନ୍ୟତମ ପ୍ରମୁଖ ଧାମ। ପ୍ରତ୍ୟେକ ଦିନ ଲକ୍ଷାଧିକ ଭକ୍ତ ପୁରୀ ଆସି ମହାପ୍ରଭୁଙ୍କ ଦର୍ଶନ କରିବା ସହ ଆଖପାଖ ଅଞ୍ଚଳରେ ଥିବା ଦର୍ଶନୀୟ ସ୍ଥାନ ଭ୍ରମଣ କରିଥାନ୍ତି। ପୁରୀ ଜିଲାର ସାକ୍ଷୀଗୋପାଳ ଠାକୁରଙ୍କ ଦର୍ଶନ କରିବା ପାଇଁ ଭକ୍ତମାନେ ମଧ୍ୟ ଆସିଥାନ୍ତି। ମାାତ୍ର ଅନେକ ଟ୍ରେନ୍ ସାକ୍ଷୀଗୋପାଳ ଷ୍ଟେଶନରେ ରହୁ ନ ଥିବାରୁ ଯାତ୍ରୀମାନେ ସମସ୍ୟାର ସମ୍ମୁଖୀନ ହୋଇଥାନ୍ତି। ଏହାକୁ ଦୃଷ୍ଟିରେ ରଖି ଭାଜପା ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ଗତ ଜାନୁଆରୀ ୧୦ ଓ ମାର୍ଚ୍ଚ ୩୧ରେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଭେଟି ଏ ନେଇ ଦାବି ଜଣାଇଥିଲେ। ଏହି ଦାବିକୁ ରେଳମନ୍ତ୍ରୀ ଗ୍ରହଣ କରିଛନ୍ତି। ଏଣିକି ସାକ୍ଷୀଗୋପାଳ ଷ୍ଟେଶନରେ ଗାଡ଼ି ସଂଖ୍ୟା ୧୨୮୨୧/୨୨ ପୁରୀ-ଶାଲିମାର ଧଉଳି ଏକ୍ସପ୍ରେସ୍ ଅଟକିବ। ସେହିପରି ଗାଡ଼ି ସଂଖ୍ୟା-୧୨୮୪୩/୪୪ ପୁରୀ-ଅହମ୍ମଦାବାଦ ଏକ୍ସପ୍ରେସ ମଧ୍ୟ ରହଣି କରିବ। ଏହାଦ୍ୱାରା ସତ୍ୟବାଦୀ ଅଞ୍ଚଳବାସୀ ଏବଂ ଅନ୍ୟ ଯାତ୍ରୀ ଉପକୃତ ହେବେ। ସେହିପରି କାଳୁପଡାଘାଟଠାରେ ଗାଡ଼ି ସଂଖ୍ୟା- ୧୮୧୧୭/୧୮ ରାଉରକେଲା-ଗୁଣପୁର ରାଜ୍ୟରାଣୀ ଏକ୍ସପ୍ରେସ୍ ରହଣି କରିବ। ଏହାଦ୍ୱାରା ଚିଲିକା ଅଞ୍ଚଳବାସୀଙ୍କ ଗମନାଗମନ ସୁବିଧାଜନକ ହେବ ବୋଲି ପାତ୍ର ସୂଚନା ଦେଇଛନ୍ତି। ରେଳ ମନ୍ତ୍ରୀ ଏହି ଦାବି ଗ୍ରହଣ କରିଥିବାରୁ ପାତ୍ର ତାଙ୍କୁ ଧନ୍ୟବାଦ ଜଣାଇଛନ୍ତି।
