ଡାବୁଗାଁ/ପାପଡାହାଣ୍ଡି,୧୧।୧୨(ଡି.ଏନ୍.ଏ.): ନବରଙ୍ଗପୁର ଜିଲାରେ ଶୁକ୍ରବାର ପୃଥକ୍ ଦୁର୍ଘଟଣାରେ ୩ ଜଣଙ୍କ ମୃତ୍ୟୁ ହୋଇଛି। ପୋଲିସ ଦୁର୍ଘଟଣା ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ନବରଙ୍ଗପୁର ଜିଲା ଡାବୁଗାଁ – ଉମରକୋଟ ୩୯ ନମ୍ବର ରାଜ ପଥ ସରାଗୁଡା ଛକ ନିକଟରେ ବୋଲେରୋ ବାଇକ୍କୁ ଧକ୍କା ଦେବା ଫଳରେ ୨ଜଣଙ୍କ ମୃତ୍ୟୁ ହୋଇଛି। ସେମାନେ ହେଲେ ପାପଡାହାଣ୍ଡି ବ୍ଲକ ବାସିନୀ ଗ୍ରାମର ଧନୁର୍ଜୟ ଗୌଡ଼(୫୫) ଓ ଡାବୁଗାଁ ବ୍ଲକର ଚିକିଲିଆଗୁଡା ଗ୍ରାମର ଖଗ ଗୌଡ଼(୫୦)। ଏକ ବାଇକ୍ (ସିଜି-୦୪ଏଲ୍ଟି-୨୭୯୪)ରେ ଫେରୁଥିବା ବେଳେ ପଛପଟୁ ଆସୁ ଥିବା ବିଦ୍ୟୁତ୍ ବିଭାଗର ଏକ ବୋଲେରୋ (ଓଡି-୨୪ଏ-୩୪୭୪)ସେମାନଙ୍କୁ ଧକ୍କା ଦେଇଥିଲା। ଏଥିରେ ଉଭୟଙ୍କ ମୃତ୍ୟୁ ହୋଇଛି। ଡାବୁଗାଁ ଥାନା ଅଧିକାରୀ ଅଭିମନ୍ୟୁ ଦୁର୍ଗା, ଏଏସ୍ଆଇ ଶିଶିରକାନ୍ତ ଘୋଷ ଘଟଣା ସ୍ଥଳରେ ପହଞ୍ଚତ୍ ମୃତଦେହ ଜବତ କରିଛନ୍ତି। ପୋଲିସ ଗାଡି ୨ଟିକୁ ଜବତ କରିଛି।
ସେହିପରି ପାପଡାହାଣ୍ଡି ବ୍ଲକ ତୁମ୍ବଲ୍ଲା ପଞ୍ଚାୟତ ଝିଟିକୁଗୁଡା ହାତୀ ବନ୍ଧା ନିକଟରେ ଏକ ବାଇକ ଦୁର୍ଘଟଣା ଘଟି ନୀଳାଦ୍ରିଗୁଡା ଗ୍ରାମର ବୁଦୁରାମ ଭତରା (୩୦)ଙ୍କ ମୃତ୍ୟୁ ହୋଇଛି। ତାଙ୍କ ସାଙ୍ଗରେ ଥିବା ମାନସ ଭତରା(୨୮) ଆହତ ହୋଇଛନ୍ତି। ବୁଦୁରାମ ଓ ମାନସ ଏକ ବାଇକ (ଓଡି-୧୦ଏ-୦୮୫୦)ରେ ପେଟ୍ରୋଲ ଆଣିବାକୁ ପ୍ରଧାନୀଗୁଡା ଯାଉଥିଲେ। ହାତିବନ୍ଧା ନିକଟସ୍ଥ ବୁଲାଣିରେ ଭାରସାମ୍ୟ ହରାଇ ବାଇକ୍ ଦୁର୍ଘଟଣାଗସ୍ତ ହୋଇଥିଲା।
