ନୂଆଦିଲ୍ଲୀ,୧୦।୨: ଭାରତ ପକ୍ଷରୁ ଅନ୍ତରାଷ୍ଟ୍ରୀୟ କ୍ରିକେଟ ଖେଳିବାକୁ ଅନେକ ଲୋକ ଆଶା ରଖିଥାନ୍ତି। ହେଲେ ସେମାନଙ୍କ ମଧ୍ୟରୁ କିଛି ଭାଗ୍ୟବାନଙ୍କୁ ସୁଯୋଗ ମିଳିଥାଏ। ଭାରତ ଅଣ୍ଡର-୧୯, ଭାରତ ଏ ଏବଂ ଆଇପିଏଲ୍ ଆଦି ଫର୍ମାଟରେ ଖେଳାଳିମାନଙ୍କ ପ୍ରତିଭାକୁ ଆଗକୁ ଯିବାକୁ ବାଟ ମିଳିଥାଏ। ଦଳ ପାଇଁ ଚୟନ ହେବା ପରେ ୧୧ଜଣ ଖେଳାଳି ପଡ଼ିଆକୁ ଓହ୍ଲାନ୍ତି। ଆଉ ୪ଜଣ ଅତିରିକ୍ତ ଖେଳାଳି ସେମାନଙ୍କ ପାଳି ଅପେକ୍ଷାରେ ରହିଥାନ୍ତି। ସେମାନେ ଲଗାତାର ଭାବେ ସେଥିପାଇଁ ପରିଶ୍ରମ ମଧ୍ୟ କରିଥାନ୍ତି। ଦଳର ଶୀର୍ଷ ୧୫ରେ ପହଞ୍ଚିବା ମଧ୍ୟ ବଡ଼ ଉପଲବ୍ଧି ହୋଇଥିବା ବେଳେ ଅଧିକାଂଶ କ୍ଷେତ୍ରରେ ଖେଳାଳିଙ୍କୁ ଡେବ୍ୟୁର ସୁଯୋଗ ମିଳିଥାଏ। ହେଲେ କିଛି ଏପରି କ୍ରିକେଟର ଅଛନ୍ତି ଯେଉଁମାନେ ଶୀର୍ଷ ୧୫ରେ ସ୍ଥାନ ପାଇଥିଲେ ହେଁ ଡେବ୍ୟୁ କରିପାରି ନ ଥିଲେ। ସୁଯୋଗ ପାଖକୁ ଆସିଥିଲେ ହେଁ ଡେବ୍ୟୁର ସୁଯୋଗ ତାଙ୍କୁ ମିଳି ନଥିଲା। ଆସନ୍ତୁ ଜାଣିବା ସେମାନଙ୍କ ବିଷୟରେ:
ଧିରଜ ଯାଦବ: ମହାରାଷ୍ଟ୍ରର ଏହି ବ୍ୟାଟ୍ସମ୍ୟାନ୍ ୨୦୦୩/୦୪ ରଣଜୀ ଟ୍ରଫିରେ ୧୨ ପାଳିରେ ୧୦୬୬ ରନ୍ କରି ରାଷ୍ଟ୍ରୀୟ ଟିମ୍ରେ ସାମିଲ ହୋଇଥିଲେ। ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ପାଇଁ ତାଙ୍କୁ ଡାକରା ମଧ୍ୟ ଆସିଥିଲା। ହେଲେ ପ୍ଲେଇଂ ଇଲେଭେନ୍ରେ ଗୌତମ ଗମ୍ଭୀରଙ୍କୁ ସୁଯୋଗ ମିଳି ଥିଲା। ଏହାପରେ ସେ ଘରୋଇ କ୍ରିକେଟରେ ସକ୍ରିୟ ରହିଥିଲେ।
ରାଣାଦେବ ବୋସ: ଘରୋଇ କ୍ରିକେଟରେ ନିଜ ସମୟର ସର୍ବଶ୍ରେଷ୍ଠ ଦ୍ରୁତ ବୋଲରଙ୍କ ମଧ୍ୟରୁ ଜଣେ ଥିଲେ ରାଣାଦେବ। ହେଲେ ସେ ଅନ୍ତରାଷ୍ଟ୍ରୀୟସ୍ତରରେ ନିଜର ପ୍ରତିଭା ଦେଖାଇପାରି ନ ଥିଲେ। ୨୦୦୬-୦୭ରେ ରଣଜୀ ଖେଳିବା ସମୟରେ ସେ ମାତ୍ର ୮ ମ୍ୟାଚ୍ରେ ୫୭ ଉଇକେଟ ନେଇ ଚର୍ଚ୍ଚାକୁ ଆସିଥିଲେ। ୨୦୦୭ରେ ଇଂଲଣ୍ଡ ଗସ୍ତ ପାଇଁ ତାଙ୍କ ଚୟନ ଭାରତୀୟ ଦଳରେ ହୋଇଥିଲା। ହେଲେ ସେ ଜାହିର ଖାନ୍, ଆର୍ପି ସିଂହ ଏବଂ ଏସ୍ ଶ୍ରୀସନ୍ତଙ୍କ ଯୋଗୁ ମ୍ୟାଚ୍ ଖେଳିପାରି ନ ଥିଲେ।
ଈଶ୍ୱର ପାଣ୍ଡେ: ଜଣେ ସଫଳ ଦ୍ରୁତ ବୋଲର୍ ଭାବରେ ଖ୍ୟାତି ପାଇବାକୁ ସମସ୍ତ ଗୁଣର ଅଧିକାରୀ ଥିଲେ ଈଶ୍ୱର। ସେ ୨୦୧୨/୧୩ ରଣଜୀ ଟ୍ରଫିରେ ୮ ମ୍ୟାଚ୍ରେ ୪୮ ଉଇକେଟ ନେଇଥିଲେ। ଫଳରେ ସବୁଠାରୁ ଅଧିକ ଉଇକେଟ ନେଇଥିବା ବୋଲର ପାଲଟିଥିଲେ। ୨୦୧୪ରେ ନ୍ୟୁଜିଲାଣ୍ଡ ଗସ୍ତ ପାଇଁ ତାଙ୍କୁ ଚୟନ କରାଯାଇଥିଲା। ହେଲେ ତାଙ୍କୁ ଗୋଟିଏ ମ୍ୟାଚ୍ରେ ମଧ୍ୟ ସୁଯୋଗ ମିଳି ନ ଥିଲା। ଏହାପରେ ସେ ଦଳରୁ ବାହାର ହୋଇଥିଲେ।
