ପୁଞ୍ଚ୍,୨୪।୧୨: ଜମ୍ମୁ-କଶ୍ମୀରରେ ଦୁଇଟି ସେନା ଗାଡ଼ି ଉପରେ ଆତଙ୍କବାଦୀଙ୍କ ଅତର୍କିତ ଆକ୍ରମଣରେ ୫ ସୈନ୍ୟ ଶହୀଦ ହୋଇଥିଲେ। ଉକ୍ତ ଆତଙ୍କବାଦୀଙ୍କୁ ଧରିବା ପାଇଁ ଅପରେଶନକୁ ଜୋର୍ଦାର କରାଯାଇଥିବାବେଳେ ସନ୍ଦେହରେ ସେନା ୩ ଜଣ ସ୍ଥାନୀୟ ଲୋକଙ୍କୁ ପଚରାଉଚରା ପାଇଁ ନେଇଯାଇଥିଲା। ହାଜତରେ ସେମାନଙ୍କର ରହସ୍ୟଜନକ ଭାବେ ମୃତ୍ୟୁ ଘଟିଥିବାରୁ ଏହାକୁ ନେଇ ବିରୋଧୀ ପ୍ରଶ୍ନ ଉଠାଇଛନ୍ତି। ସେମାନଙ୍କୁ ଜେରାବେଳେ ଯବାନମାନେ ପିଟି ମାରିଦେଇଥିବା ଅଭିଯୋଗ ହୋଇଛି। ଉତ୍ତେଜନା ବଢ଼ିବା ଆଶଙ୍କାରେ ମୋବାଇଲ ଇଣ୍ଟରନେଟ୍ ସେବାକୁ ବନ୍ଦ ରଖାଯାଇଛି। ମୃତକଙ୍କ ସମ୍ପର୍କୀୟଙ୍କୁ କ୍ଷତିପୂରଣ ସହ ପରିବାରର ଜଣକୁ ଚାକିରି ଯୋଗାଇ ଦିଆଯିବ ବୋଲି ଜମ୍ମୁ-କଶ୍ମୀର ପ୍ରଶାସନ ଘୋଷଣା କରିଛି। ପୁଞ୍ଚ୍ ଏବଂ ରାଜୌରୀ ଜିଲାରେ ଶନିବାର ଆତଙ୍କବାଦ ନିରୋଧୀ ଅଭିଯାନକୁ ଜୋର୍ଦାର କରାଯାଇଛି। ଡୋଡା ଜିଲାରେ ଥିବା ସେନା କ୍ୟାମ୍ପ୍ରେ ନିଆଁ ଲାଗି ୨ ଜଣ ସାଧାରଣ କର୍ମଚାରୀଙ୍କ ମୃତ୍ୟୁ ଘଟିଛି। ସାମ୍ବାର ପରଷୋତ୍ତମ(୫୫) ଏବଂ କଠୁଆ ଅଞ୍ଚଳର ସୋମ ରାଜ (୪୫) ଆର୍ନୋଡା ଗାଟ୍ ସେନା କ୍ୟାମ୍ପ ପରିସରରେ ଟେଲର ଦୋକାନ ଚଳାଉଥିଲେ। ଭୋର ସମୟରେ କିରୋସିନ୍ ହିଟରରେ ତ୍ରୁଟି ଯୋଗୁ ନିଆଁ ଲାଗି ସେମାନେ ଜଳିଯାଇଥିଲେ।
ଅନୁପ୍ରବେଶ ଉଦ୍ୟମ ପଣ୍ଡ
ଜମ୍ମୁରେ ଆତଙ୍କବାଦୀଙ୍କ ଅନୁପ୍ରବେଶ ଉଦ୍ୟମକୁ ଅନ୍ତର୍ଜାତୀୟ ସୀମା (ଆଇବି)ରେ ମୁତୟନ ଥିବା ଯବାନମାନେ ପଣ୍ଡ କରିଦେଇଛନ୍ତି। ଶନିବାର ଭୋର ସମୟରେ ସେମାନେ ଅନୁପ୍ରବେଶ ଉଦ୍ୟମ କରୁଥିବାବେଳେ ଯବାନଙ୍କ ଗୁଳିମାଡ଼ରେ ଜଣେ ଆତଙ୍କବାଦୀ ନିହତ ହୋଇଛନ୍ତି। ୪ ଜଣ ସଶସ୍ତ୍ର ଆତଙ୍କବାଦୀ ଭୋର ସମୟରେ ଅଖନୁରର ଖୋଉର ସେକ୍ଟରରେ ଥିବା ଅନ୍ତର୍ଜାତୀୟ ସୀମାକୁ ଅତିକ୍ରମ କରିବା ପାଇଁ ଉଦ୍ୟମ କରୁଥିବାବେଳେ ଯବାନଙ୍କ ନଜରରେ ପଡ଼ିଥିଲେ। ଫଳରେ ସେନା ପକ୍ଷରୁ ଗୁଳିମାଡ଼ କରାଯାଇଥିଲା। ଆତଙ୍କବାଦୀଙ୍କ ସନ୍ଦିଗ୍ଧ ଗତିବିଧି ସର୍ଭିଲାନ୍ସ ଉପକରଣରେ ଧରାପଡ଼ିଥିଲା। ମୃତଦେହକୁ ଅନ୍ୟ ଆତଙ୍କବାଦୀ ମାନେ ନେଇଯାଇଥିବାବେଳେ ରକ୍ତଛିଟା ପଡ଼ିଥିବା ଦେଖାଯାଇଛି।
