ଆନନ୍ଦପୁର,୯ା୧୧(ସ୍ବ.ପ୍ର.): ଆନନ୍ଦପୁର ପୋଲିସ ଦ୍ୱାରା ୨୭ଟି କ୍ରୋମାଇଟ୍ ଭର୍ତ୍ତି ୬ ଚକିଆ ଯାନ ଅଟକ ରଖାଯାଇଛି। ଗାଡ଼ିଗୁଡ଼ିକ ମଙ୍ଗଳବାର ବିଳମ୍ବିତ ରାତିରେ କାଳିଆପାଣି ଅଞ୍ଚଳରୁ କ୍ରୋମାଇଟ୍ ଧରି ସୋସୋସ୍ଥିତ ମହାରାଜା ମିନେରାଲସ୍ ପ୍ରାଇଭେଟ୍ ଲିମିଟେଡ୍ ନିକଟକୁ ଆସୁଥିବା ସମୟରେ ଆନନ୍ଦପୁର କଲେଜ ଛକ ନିକଟରେ ଉପସ୍ଥିତ ଥିବା ସ୍ଥାନୀୟ ଲୋକେ ସନ୍ଦେହ କରି ଗାଡ଼ିଗୁଡ଼ିକୁ ଅଟକାଇ ପୋଲିସକୁ ସୂଚନା ଦେଇଥିଲେ। ପୋଲିସ ଗାଡ଼ିଗୁଡ଼ିକରୁ ଥାନା ନିକଟକୁ ନେବା ପରେ କାଗଜପତ୍ର ଜବତ କରି ଯାଞ୍ଚ ପ୍ରକ୍ରିୟା ଆରମ୍ଭ କରିଛି। ଗାଡ଼ିଗୁଡ଼ିକ ମୂଲ୍ୟବାନ୍ କ୍ରୋମାଇଟ୍ ନେଉଥିବାବେଳେ ନିୟମ ଅନୁସାରେ ଗାଡ଼ି ଯେଭଳି ସିଲ୍ ହୋଇ ରହିବା କଥା ତାହା ନ ଥିବାବେଳେ ଗାଡ଼ିଗୁଡ଼ିକର ପରିମିଟ୍ ନେଇ ପୋଲିସ ସନ୍ଦେହ କରିଥିବା ପ୍ରାଥମିକ ତଦନ୍ତରୁ ସ୍ପଷ୍ଟ ହୋଇଛି। ପର୍ମିଟ୍ରେ ସୋସୋ ଭାୟା ଟମକା, ଡୁବୁରୀ, ଯାଜପୁର ରୋଡ୍ ଦର୍ଶାଯାଇଛି। ତେବେ ଆନନ୍ଦପୁର ଦେଇ କ୍ରୋମାଇଟ୍ ଚାଲାଣ ହେବା ସମ୍ପର୍କରେ ସେଭଳି କିଛି ସ୍ପଷ୍ଟ ତଥ୍ୟ ହସ୍ତଗତ ହୋଇ ନ ଥିବା ସୂଚନା ମିଳିଛି। ଗାଡ଼ିଗୁଡ଼ିକ ଅଟକ ରହିଛି, ଡିଡିଏମ୍ କେନ୍ଦୁଝର ଏବଂ ଆର୍ଟିଓ କେନ୍ଦୁଝରଙ୍କୁ ସୂଚନା ଦେଇଛୁ, କାଗଜପତ୍ର ଯାଞ୍ଚ କରି ରିପୋର୍ଟ ହସ୍ତଗତ ହେଲେ ଗାଡ଼ିଗୁଡ଼ିକୁ ରିଲିଜ୍ କରାଯିବ ବୋଲି ଆନନ୍ଦପୁର ଥାନାଧିକାରୀ ସୁଶାନ୍ତ ଦାଶ ସୂଚନା ଦେଇଛନ୍ତି।
