ଭୁବନେଶ୍ୱର,୧୦।୮(ଶର୍ମିଷ୍ଠା ପାଣିଗ୍ରାହୀ)ଭାରତୀୟ କଳା, ସଂସ୍କୃତି ଓ ଐତିହ୍ୟର ପ୍ରତୀକ ଶାଢ଼ିର ଅନନ୍ୟ ଏବଂ ଅପୂର୍ବ ଝଲକ ଦେଖିବାକୁ ମିଳିଛି ଲଣ୍ଡନର ରାଜରାସ୍ତାରେ। ଜାତୀୟ ହସ୍ତତନ୍ତ ଦିବସର ଅବ୍ୟବହିତ ପୂର୍ବରୁ ଇନସ୍ପାୟାରିଂ ଇଣ୍ଡିଆନ ୱିମେନ ଗ୍ରୁପ୍ ସହଯୋଗରେ ବ୍ରିଟିଶ ୱିମେନ ଇନ ଶାରିଜ (ବି.ଡବ୍ଲୁ.ଆଇ.ଏସ୍) ସଂସ୍ଥା ତରଫରୁ ଶାଢ଼ି ୱାକାଥନ ଆୟୋଜିତ ହୋଇଥିଲା। ପ୍ରତିଷ୍ଠାତା ସଭାପତି ଡ. ଦୀପ୍ତି ଜୈନଙ୍କ ନେତୃତ୍ୱରେ ଆୟୋଜିତ ଏହି ରଙ୍ଗାରଙ୍ଗ ଶାଢ଼ି ଶୋଭାଯାତ୍ରାରେ ଭାରତର ୧୬ଟି ରାଜ୍ୟରୁ ୭୦୦ରୁ ଊଦ୍ଧର୍ବ ମହିଳା ଭାଗ ନେଇଥିଲେ। ୱାକାଥନ ଐତିହାସିକ ଟ୍ରାଫାଲଗର ଛକଠାରୁ ଆରମ୍ଭ ହୋଇ ଡାଉନିଂ ଷ୍ଟ୍ରିଟ୍ ଦେଇ ଯାଇ ସଂସଦ ଛକ ନିକଟରେ ସମାପ୍ତ ହୋଇଥିଲା। ଏଠାରେ ଥିବା ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପ୍ରତିଯୋଗୀମାନେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଏହି ୱାକାଥନରେ ଡ. ରେଣୁକା ଜେନାଙ୍କ ନେତୃତ୍ୱରେ ଓଡ଼ିଶାର ୨୫ଜଣ ମହିଳା ଭାଗ ନେଇଥିଲେ।
ସେମାନେ ରାଜ୍ୟର ପାରମ୍ପରିକ ହସ୍ତତନ୍ତ ଶାଢ଼ି ଯଥା ବୋମକାଇ, ଦୋଳବେଦି, ସମ୍ବଲପୁରୀ, ଖଣ୍ଡୁଆ, ପଶାପଲ୍ଲୀ, ଗୋପାଳପୁର ଟସର ଏବଂ କୋଟପାଡ଼ ଆଦି ପରିଧାନ କରି ଶୋଭାଯାତ୍ରାରେ ସାମିଲ ହୋଇଥିଲେ। ଓଡ଼ିଶା ଦଳରେ ଡ. ରେଣୁକା ଜେନା, ମୋନାଲିସା ସେନାପତି, ସ୍ବାତୀ ରେଖା, ରୀନା ମେହେର, ରଶ୍ମିତା ପାତ୍ର, ତନୟା ସେନ, ଗୀତା ଚନ୍ଦ୍ରା, ସୋନିକା ଗୋଏଲ, ପ୍ରିୟଦର୍ଶିନୀ ସାହୁ, ବନିତା ରାଉତ, ଡ. ଉଷା ରାଉତ, ନୀହାରିକା ସାହୁ, ଡସ୍. ଲିପି ପ୍ରଧାନ, ଡ. ସଂଯୁକ୍ତା ଦାସ, ଡ. ଇନ୍ଦ୍ରରମିତ୍ ସାହାନୀ, ପ୍ରଜ୍ଞା ଆରିହାନ, ମଧୁସ୍ମିତା ଜେନା, କିଞ୍ଜଲ ପଟେଲ, କନକଲତା ପଟେଲ, କ୍ରିଷ୍ଣା କର, ରଶ୍ମି ମିଶ୍ର, ଗୀତିକା ଗୋହେ, ସାଗରିକା ମହାନ୍ତି, ମମତା ମିଶ୍ର ଏବଂ ମଧୁଶ୍ରୀ ଘୋଷ ପ୍ରମୁଖ ସାମିଲ ଥିଲେ।
ଏହି ଅବସରରେ ଲୋକପ୍ରିୟ ରଙ୍ଗବତୀ ନୃତ୍ୟ ତଥା ଗୀତ ପରିବେଷଣ ହୋଇଥିଲା। ଲଣ୍ଡନସ୍ଥିତ ଭାରତୀୟ ହାଇକମିଶନର ସାଂସ୍କୃତିକ ବିଭାଗ ମୁଖ୍ୟ ନନ୍ଦିତା ସାହୁ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ୱାକାଥନରୁ ହୋଇଥିବା ଆୟକୁ ଭାରତର ବୁଣାକାର ବସ୍ତିଗୁଡ଼ିକର ବିକାଶ ଉଦ୍ଦେଶ୍ୟରେ ବିନିଯୋଗ କରାଯିବ ବୋଲି ଆୟୋଜକମାନେ ଘୋଷଣା କରିଥିଲେ।
