ଭୁବନେଶ୍ୱର ୨୧।୯ (ବ୍ୟୁରୋ): କମିଶନରେଟ ପୋଲିସ ଓ ମହିଳା ସ୍ବେଚ୍ଛାସେବୀ ଅନୁଷ୍ଠାନ ଇନଷ୍ଟିଚ୍ୟୁଟ୍ ଫର୍ ସୋସିଆଲ୍ ଡେଭେଲପ୍ମେଣ୍ଟ (ଆଇ.ଏସ୍.ଡି.)ର ମିଳିତ ସହଯୋଗରେ ଆରମ୍ଭ ହୋଇଥିବା ମହିଳା ସହଯୋଗ କେନ୍ଦ୍ର ‘ମାଧ୍ୟମ’କୁ ୮ ବର୍ଷ ପୂରିଛି। ୨୦୧୪ ସେପ୍ଚେମ୍ବର ୪ରୁ ଭୁବନେଶ୍ୱର ଡିସିପି ଅଫିସ ଏବଂ କଟକ ମହିଳା ଥାନାରେ ଏହି କେନ୍ଦ୍ର ଜରିଆରେ ବହୁ ମହିଳାଙ୍କୁ ନ୍ୟାୟ ଦିଆଯାଉଛି। ‘ମାଧ୍ୟମ’ର ସଫଳତା ଏବଂ ୮ବର୍ଷ ପୂର୍ତ୍ତି ଅବସରରେ ମଙ୍ଗଳବାର ଭୁବନେଶ୍ୱରସ୍ଥିତ ପୋଲିସ କମିଶନରେଟ କାର୍ଯ୍ୟାଳୟରେ ଏକ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏଥିରେ କମିଶନର ସୌମେନ୍ଦ୍ର ପ୍ରିୟଦର୍ଶୀ ୮ ବର୍ଷର ରିପୋର୍ଟ ଉପସ୍ଥାପନ କରିଥିଲେ।
ରିପୋର୍ଟ ଅନୁଯାୟୀ, ଗତ ୮ବର୍ଷ ମଧ୍ୟରେ କଟକ ଓ ଭୁବନେଶ୍ୱରରେ ଥିବା ୨ଟି ‘ମାଧ୍ୟମ’ କେନ୍ଦ୍ରରେ ମୋଟ ୪୬୨୧ ଜଣ ମହିଳା ଅଭିଯୋଗ କରିଥିଲେ। ସେଥିମଧ୍ୟରୁ ୩୫୪୦ଟି ଅଭିଯୋଗକୁ ପଞ୍ଜୀକରଣ କରାଯାଇ କାଉନସିଲିଂ କରାଯାଇଥିଲା। ୨୧୮୨ଟି ମାମଲା ଆପୋସ ବୁଝାମଣାରେ ସମାଧାନ କରାଯାଇଛି। ପଞ୍ଜୀକୃତ ମାମଲା ମଧ୍ୟରୁ ୩୧୯୭ଟି ପାରିବାରିକ ହିଂସା ସମ୍ପର୍କିତ ଥିଲା। ଅନ୍ୟାନ୍ୟ ଅଭିଯୋଗ ମଧ୍ୟରେ ୧୨୫ଟି ମିଥ୍ୟା ପ୍ରତିଶ୍ରୁତି ଦ୍ୱାରା ବିବାହ ସମ୍ବନ୍ଧୀୟ ହୋଇଥିବା ବେଳେ କର୍ମକ୍ଷେତ୍ରରେ ଯୌନ ନିର୍ଯାତନା, ସାଇବର କ୍ରାଇମ, ଅପହରଣ ଆଦି ଅଭିଯୋଗ ରହିଛି। ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି, ‘ମାଧ୍ୟମ’ ହିଂସା ପୀଡ଼ିତା ମହିଳାଙ୍କୁ ଉପଯୁକ୍ତ ନ୍ୟାୟ ଦେବାରେ ସଫଳ ହୋଇଛି। ଥାନା ଅପେକ୍ଷା ‘ମାଧ୍ୟମ’ରେ ମାମଲା ପଞ୍ଜିକୃତ କରିବା ଦ୍ୱାରା ଶୀଘ୍ର ନ୍ୟାୟ ମିଳିପାରୁଛି ବୋଲି ପ୍ରିୟଦର୍ଶୀ କହିଥିଲେ। ଏହି କାର୍ଯ୍ୟକ୍ରମରେ ଅତିରିକ୍ତ ପୋଲିସ କମିଶନର ଉମାଶଙ୍କର ଦାଶ, ଭୁବନେଶ୍ୱର ଡିସିପି ପ୍ରତୀକ ସିଂ, କଟକ ଡିସିପି ପୀନାକ ମିଶ୍ର, ଟୁଇନ୍ ସିଟିର ସମସ୍ତ ଥାନାଧିକାରୀ ଓ ‘ମାଧ୍ୟମ’ର କର୍ମକର୍ତ୍ତା ଯୋଗଦେଇଥିଲେ।
