ହାଟଡ଼ିହୀ,୧୪l୧୨ (ଶୁଭକାନ୍ତ ନାୟକ)କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ ଅଧୀନ ୬ ପଞ୍ଚାୟତରେ ଗତ ଅକ୍ଟୋବର, ନଭେମ୍ବର ଓ ଡିସେମ୍ବର ୩ ମାସର ଚାଉଳ ହିତାଧିକାରୀଙ୍କୁ ଅଦ୍ୟାବଧି ମିଳିନାହିଁ। ହିତାଧିକାରୀଙ୍କ ପାଇଁ ଆସିଥିବା ପ୍ରାୟ ୨୦୦ କୁଇଣ୍ଟାଲ ଚାଉଳ ହେରଫେର ହୋଇଥିବା ଜଣାପଡ଼ିଛି। ଏ ବାବଦରେ ଅଭିଯୋଗ ପରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀ ତନାଘନା ଆରମ୍ଭ କରିଛନ୍ତି। ବିଡିଓଙ୍କ ସୂଚନା ଅନୁଯାୟୀ, ବ୍ଲକ୍ ଅଧୀନ ୩୧ ପଞ୍ଚାୟତର ହିତାଧିକାରୀଙ୍କ ପାଇଁ ଚାଉଳ ଉଠାଣ ହୋଇଥିଲା। ମାତ୍ର ୬ ପଞ୍ଚାୟତର ହିତାଧିକାରୀଙ୍କୁ ଅକ୍ଟୋବର, ନଭେମ୍ବର ଓ ଡିସେମ୍ବର ମାସର ଚାଉଳ ବଣ୍ଟନ ହୋଇନି। ଏଭଳି ସ୍ଥଳେ ଆସନ୍ତା ଜାନୁୟାରୀ, ଫେବୃୟାରୀ ଓ ମାର୍ଚ୍ଚ ମାସ ପାଇଁ ଆଲଟମେଣ୍ଟ ରେକର୍ଡରେ ଦସ୍ତଖତ କରାଇବାକୁ ଯୋଗାଣ ଅଧିକାରୀ ଆସିଥିଲେ। କିନ୍ତୁ ସେ ତାଙ୍କୁ ଦସ୍ତଖତ କରିବାକୁ ମନା କରିଥିଲେ। ଏଥିସହ ସବୁ ପଞ୍ଚାୟତରୁ ଗତ ଅକ୍ଟୋବର, ନଭେମ୍ବର ଏବଂ ଡିସେମ୍ବର ମାସର ଏନ୍ଓସି ଆଣିବା ପରେ ଦସ୍ତଖତ କରିବେ ବୋଲି କହିଥିଲେ। ତୁରନ୍ତ ହିତାଧିକାରୀଙ୍କୁ ଚାଉଳ ବଣ୍ଟନ ହୋଇଥିବା ରିପୋର୍ଟ ଓ ଚାଉଳ ବଣ୍ଟନ କରି ନ ଥିବା ଖିଲାପକାରୀଙ୍କ ରିପୋର୍ଟ ଦେବାକୁ କହିଛନ୍ତି। ଏଥିରୁ ବ୍ୟତିକ୍ରମ ଘଟିଲେ ଥାନାରେ ଲିଖିତ ଅଭିଯୋଗ କରିବେ ବୋଲି ବିଡିଓ ଚେତାବନୀ ଦେଇଛନ୍ତି। ଏ ନେଇ ଯୋଗାଣ ଅଧିକାରୀ ସନ୍ଦୀପ ପରିଜାଙ୍କ ମୋବାଇଲ (ନଂ. ୯୫୫୬୮୧୫୦୧୯)କୁ ବାରମ୍ବାର ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ୍ ଉଠାଇ ନ ଥିଲେ।
