ଦାରିଙ୍ଗବାଡ଼ି,୨୪ା୪(ଅରୁଣ ସାହୁ): ଦାରିଙ୍ଗବାଡ଼ି ଥାନା ଅଞ୍ଚଳ ସିମନବାଡ଼ି ପଞ୍ଚାୟତ କାର୍ଯ୍ୟାଳୟ ନିକଟରେ ୨ ଜଣ ଯୁବକ ବାଇକରେ ଆସି ପ୍ରାୟ ୨ ଘଣ୍ଟା ଧରି ଉତ୍ପାତ ଚଳାଇଥିଲେ। ଖବର ପାଇ ଦାରିଙ୍ଗବାଡ଼ି ପୋଲିସ ଘଟଣା ସ୍ଥଳରେ ପହଞ୍ଚତ୍ ବାଇକ ସହ ସେମାନଙ୍କୁ ଥାନାକୁ ନେଇଥିବା ଜଣାପଡ଼ିଛି। ଏନେଇ ଥାନାରେ କୌଣସି ଅଭିଯୋଗ ହୋଇ ନାହିଁ। ପ୍ରକାଶ ଯେ, ଶୁକ୍ରବାର ଅପରାହ୍ନରେ ଏକ ବାଇକରେ ୨ ଯୁବକ ଆସି ପଞ୍ଚାୟତ କାର୍ଯ୍ୟାଳୟ ନିକଟ ୫୯ ନଂ. ଜାତୀୟ ରାଜପଥ ଉପରେ ସାଧାରଣ ଲୋକଙ୍କ ସହ ଝଗଡ଼ା କରି ଅଶ୍ଳୀଳ ଭାଷାରେ ଗାଳିଗୁଲଜ କରୁଥିଲେ। ଏହାର ପ୍ରତିବାଦ କରିବାରୁ ନିଶାସକ୍ତ ଅବସ୍ଥାରେ ରହିଥିବା ଯୁବକ ଜଣକ ପ୍ରତିବାଦ କରୁଥିବା ଯୁବକଙ୍କ ଉପରେ ପେଟ୍ରୋଲ ଢାଳିଥିଲେ। ଦିଆସିଲି କିଣିବାକୁ ଯାଇଥିବା ବେଳେ ସେଠାରେ ଥିବା ପ୍ରତ୍ୟକ୍ଷଦର୍ଶୀ ଉକ୍ତ ଯୁବକଙ୍କୁ କାବୁ କରି ପୋଲିସକୁ ଖବର ଦେଇଥିଲେ। ପେଟ୍ରୋଲରେ ଓଦା ହୋଇଥିବା ଯୁବକଙ୍କୁ ସ୍ଥାନୀୟ ଲୋକ ପାଣି ଢାଳି ଗାଧୋଇ ଦେଇଥିଲେ। ପରେ ତାଙ୍କ ପରିବାର ପହଞ୍ଚତ୍ ପେଟ୍ରୋଲରେ ଓଦା ହୋଇଥିବା ଯୁବକଙ୍କୁ ଘରକୁ ନେଇ ସାବୁନରେ ଗାଧୋଇ ସଫା କରିଥିଲେ। କିଛି ସମୟ ପାଇଁ ଘଟଣାକୁ ନେଇ ସିମନବାଡ଼ିରେ ଉତ୍ତେଜନା ଦେଖାଯାଇଥିଲା। ଉପସ୍ଥିତ ଲୋକେ ଉନ୍ମତ୍ତ କାଣ୍ଡ କରୁଥିବା ଯୁବକଙ୍କୁ କାବୁ କରି ନ ଥିଲେ ବଜାରରେ ଏକ ହତ୍ୟା ଭଳି ବଡ଼ ଅଘଟଣ ଘଟିଥାନ୍ତା ବୋଲି ଆଲୋଚନା ହେଉଛି। ପରେ ଦାରିଙ୍ଗବାଡ଼ି ପୋଲିସ ଘଟଣା ସ୍ଥଳରେ ପହଞ୍ଚତ୍ ଉନ୍ମତ୍ତ ୨ ଯୁବକଙ୍କୁ ଥାନାକୁ ନେଇଥିବା ଜଣାପଡିଛି। ଏନେଇ ଆଇଆଇସି ସଂଗ୍ରାମ କେଶରୀ ଜେନା ଘଟଣାକୁ ଗୁରୁତ୍ୱର ଭାବେ ନେବା ସହ ୨ ଯୁବକଙ୍କୁ ଅଟକ ରଖି ପଚରା ଉଚରା କରୁଥିବା କହିଛନ୍ତି।
