ନୂଆପଡ଼ା,୨୪।୭(ମକାରୁ ବେମାଲ): ଶିକ୍ଷାର ପ୍ରଚାର ପ୍ରସାର ଓ ଗୁଣାମତ୍କମାନ ବଢାଇବା ପାଇଁ ରାଜ୍ୟ ସରକାର ଯୋଜନା ଉପରେ ଯୋଜନା କରି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ବିଭାଗୀୟ ଅଧିକାରୀ ଓ କର୍ମଚାରୀମାନଙ୍କ ଉଦାସୀନତା ଓ ଆନ୍ତରିକ ଅଭାବ ଯୋଗୁ ବିଦ୍ୟାଳୟଗୁଡ଼ିକର ଉନ୍ନତି ହୋଇ ପାରୁନାହିଁ। ଏଭଳି ସମସ୍ୟା ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ଜଡଗଡ ପଞ୍ଚାୟତ ଗଡଗଡବାହାଲି ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି। ଏଠାରେ ମୋଟ ୪୫ଜଣ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ୨ଜଣ ଶିକ୍ଷକ ଶିକ୍ଷାଦାନ କରୁଛନ୍ତି। ପ୍ରଥମରୁ ପଞ୍ଚମ ୫ଟି ଶ୍ରେଣୀକୁ ୨ଟି କୋଠରି ରହିଛି। ୨ଟି କୋଠରିରେ ୫ଟି ଶ୍ରେଣୀର ପିଲା କେମିତି ଶିକ୍ଷା ଗ୍ରହଣ କରୁଛନ୍ତି ତାହା ସହଜେ ଅନୁମେୟ। ପୂର୍ବରୁ ଯେଉଁ ୨ଟି ଶ୍ରେଣୀ କୋଠରି ରହିଥିଲା ଡେମେଜ ହୋଇ ପଡି ରହିଛି। ଅତିରିକ୍ତ ଶ୍ରେଣୀ କୋଠରି ଗୋଟେ ଦିଆଗଲେ ସୁବିଧାରେ ଶିକ୍ଷାଦାନ ହୋଇ ପାରନ୍ତା। ବିଦ୍ୟାଳୟ ଚାରି ପାଖରେ ପାଚେରୀ ନ ଥିବାରୁ ଛାତ୍ରୀଛାତ୍ରମାନଙ୍କ ପାଇଁ ବିପଦ ରହିଛି। ଗୋଦାମ ଗୃହ ନ ଥିବାରୁ ବିଦ୍ୟାଳୟ ମଧ୍ୟହ୍ନ ଭୋଜନ ସାମଗ୍ରୀ ରଖିବା ପାଇଁ ଅସୁବିଧା ହେଉଛି। ପିଇବା ପାଣିର ସମସ୍ୟା ରହିଛି। ବିଦ୍ୟାଳୟରେ ପାଇଖାନା ନ ଥିବାରୁ ଛାତ୍ରୀଛାତ୍ରମାନେ ବାହାରକୁ ଶୌଚ ପାଇଁ ଯାଉଛନ୍ତି। ଦୀର୍ଘ ୨ ବର୍ଷ ହେବ ପାଇଖାନା ନିର୍ମାଣ ଚାଲିଛି। ହେଲେ ଆଜି ପର୍ଯ୍ୟନ୍ତ ସମ୍ପୂର୍ଣ୍ଣ ହୋଇ ପାରିନାହିଁ। ପାଇଖାନା ଶୀଘ୍ର ସମ୍ପୂର୍ଣ୍ଣ କରିବା ପାଇଁ ଠିକାଦାରଙ୍କୁ କହିଲେ ଗୋଟିଏ ସପ୍ତାହ ମଧ୍ୟରେ ସମ୍ପୂର୍ଣ୍ଣ ହୋଇଯିବ ବୋଲି କହି ଦିନ ଗଡାଇ ଚାଲିଛନ୍ତି ବୋଲି ସହକାରୀ ଶିକ୍ଷକ ପ୍ରକାଶ କରିଛନ୍ତି। ଏ ସଂକ୍ରାନ୍ତରେ ଗୋଷ୍ଠି ଶିକ୍ଷା ଅଧିକାରୀ ହେମସାଗର ମହାନନ୍ଦଙ୍କୁ ପଚାରିବାରୁ ଏହି ବିଷୟରେ ଅବଗତ ନ ଥିଲି, ଦିନେ ଦୁଇ ଦିନ ଭିତରେ ସବୁ ସମସ୍ୟା ସମାଧାନ ହୋଇଯିବ ବୋଲି ପ୍ରକାଶ କରିଥିଲେ।
