ଭୁବନେଶ୍ୱର, ୫।୨ (ବ୍ୟୁରୋ): ଜବରଦଖଲ ସମୟରେ ବିଏମ୍ସି କାମ ବନ୍ଦ କରୁନାହିଁ କି କାର୍ଯ୍ୟାନୁଷ୍ଠାନ ନେଉନାହିଁ। କିନ୍ତୁ ଜବରଦଖଲକୁ ଉଚ୍ଛେଦ ପାଇଁ ଅଧିକାରୀମାନେ ଲୋକଙ୍କ ଟଙ୍କାକୁ ପାଣିଭଳି ବୁହାଇ ପକେଟ ଗରମ କରୁଛନ୍ତି। ବିଏମ୍ସିର ଏହି ଆଭିମୁଖ୍ୟ ପାଇଁ ସହରରେ ଜବରଦଖଲ ବଢ଼ିଚାଲିଛି। ଓ୍ବାର୍ଡ ନଂ. ୩୭ରେ ଏଭଳି ଏକ ଘଟଣାକୁ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି। ବେହେରାସାହିର ପ୍ଲଟ୍ ନଂ.୫୬୫ରେ ଥିବା ସର୍ବସାଧାରଣ ଡ୍ରେନ୍କୁ ଜଣେ ବିଲ୍ଡର ନିଜର ଆପାର୍ଟମେଣ୍ଟ ନିର୍ମାଣ ପାଇଁ ପାଇପ ପକାଇ ପୋତି ଦେଇଛନ୍ତି। ବିଲ୍ଡର ଜଣକ ବେଆଇନ ଭାବେ ଘର ନିର୍ମାଣ ଓ ଡ୍ରେନ ଅବରୋଧ କରୁଥିଲେ ମଧ୍ୟ ବିଏମସି ଅଧିକାରୀ ଓ ସ୍ଥାନୀୟ କର୍ପୋରେଟରଙ୍କ ନିରବତାକୁ ନେଇ ସ୍ଥାନୀୟ ଲୋକେ ପ୍ରଶ୍ନ ଉଠାଇଛନ୍ତି। ସେମାନେ ଏହି ବେଆଇନ କାମକୁ ବିରୋଧ କରିବା ସହ ବନ୍ଦ କରି ବିଏମ୍ସିକୁ ଜଣାଇଥିଲେ ମଧ୍ୟ କୌଣସି ପଦକ୍ଷେପ ନିଆ ନ ଯିବାରୁ ବିଲଡର୍ ଜଣକ ପୁନର୍ବାର ଜୋର ଜବରଦସ୍ତ କାର୍ଯ୍ୟ ଆରମ୍ଭ କରିଛନ୍ତି। ଲୋକେ ତାଙ୍କୁ ବିଏମ୍ସିର ଅନୁମତି ପତ୍ର ମାଗିବାରୁ ସେ ଲୋକଙ୍କୁ ନାଲିଆଖି ଦେଖାଉଛନ୍ତି। ଡ୍ରେନ୍ ପୋତିବା କାରଣରୁ ନିକଟରେ ରହୁଥିବା ପ୍ରାୟ ୪୦ରୁ ୫୦ ପରିବାର ପ୍ରଭାବିତ ହେବାର ଆଶଙ୍କା ରହିଛି। ଜଣେ ବିଲ୍ଡର ନିଜର ବ୍ୟକ୍ତିଗତ ସ୍ବାର୍ଥ ପାଇଁ ଜବରଦଖଲ କରିବା ଏବଂ ସବୁ ଜାଣି ବିଏମ୍ସି ଅଧିକାରୀ ଓ କର୍ପୋରେଟର ଚୁପ୍ ରହିବାକୁ ନେଇ ଚାପା ଉତ୍ତେଜନା ଲାଗି ରହିଛି।
ସ୍ଥାନୀୟ କର୍ପୋରେଟର ବନ୍ଦିତା ପାଲ୍ କହିଛନ୍ତି, ବିଲ୍ଡରଙ୍କ ଏଭଳି ମନମୁଖି କାର୍ଯ୍ୟକୁ ନେଇ ଜାନୁୟାରୀ ୬ରେ ଜୋନାଲ ଡେପୁଟି କମିଶନର ରବିନାରାୟଣ ଜେଠୀଙ୍କୁ ଅବଗତ କରାଇଥିଲୁ। ମାତ୍ର କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିବାରୁ ଶୁକ୍ରବାର ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେଙ୍କୁ ଅଭିଯୋଗ କରାଯାଇଥିଲା। କମିଶନର ଜେଡିସିଙ୍କୁ ଏ ନେଇ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେବା ପରେ ଜେଡିସି ସଫେଇ ସଂସ୍ଥା ଜାଗୃତିକୁ ଡ୍ରେନ୍ ସଫା କରିବା ପାଇଁ ନିର୍ଦ୍ଦେଶ ଦେଇଛନ୍ତି ବୋଲି କର୍ପୋରେଟର ସଫେଇ ଦେଇଛନ୍ତି। ହେଲେ ଏଯାଏ ବିଏମ୍ସି ପକ୍ଷରୁ ଜବରଦଖଲ କରିଥିବା ବିଲ୍ଡରଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ କିମ୍ବା ତାଙ୍କୁ ତାଗିଦା କରାଯାଇ ନାହିଁ। ବରଂ ବିଲ୍ଡରଙ୍କ ବେଆଇନ କାର୍ଯ୍ୟକୁ ବିଏମ୍ସି ଅଧିକାରୀମାନେ ଘଣ୍ଟ ଘୋଡ଼ାଇବାକୁ ଚେଷ୍ଟା କରିଛନ୍ତି। ଡ୍ରେନ ସଫା କରିବାକୁ କହିଦେଇ ବିଏମ୍ସି ଅଧିକାରୀ ନିଜ ମୁଣ୍ଡରୁ ଦୋଷ ଖସାଇ ଦେବାକୁ ଚାହୁଁଛନ୍ତି। ତେଣୁ ବିଏମ୍ସି ଅଧିକାରୀ ଏବଂ ବିଲ୍ଡରଙ୍କ ମଧ୍ୟରେ ସଲାସୁତରା ହୋଇ ଏଭଳି କାର୍ଯ୍ୟ ହେଉଥିବା ସାଧାରଣରେ ଚର୍ଚ୍ଚା ହେଉଛି।
