ଖଜୁରିପଡ଼ା, ୩ା୫(ବିଦୁର ବେହେରା): କନ୍ଧମାଳ ଜିଲା ଖଜୁରିପଡ଼ା ବ୍ଲକ୍ ଟିଟ୍ରାପଙ୍ଗା ପଞ୍ଚାୟତ ତିଲକପଡ଼ା ଗ୍ରାମର ଶୁଭେନ୍ଦୁ ଦିଗାଲଙ୍କ ଘରେ ନିଆଁ ଲାଗି ଆସବାପତ୍ର ପୋଡ଼ି ପାଉଁଶ ହୋଇଯାଇଛି। ହେଲେ ଘରେ ଥିବା ୨ ମାସର ଶିଶୁଙ୍କ ସହ ପରିବାରର ୫ ସଦସ୍ୟ ବର୍ତ୍ତି ଯାଇଛନ୍ତି।
ମିଳିଥିବା ସୂଚନା ଅନୁଯାୟୀ, ଶୁଭେନ୍ଦୁ ପରିବାର ସହ ଏକ ଟିଣ ଛପର ଘରେ ରହୁଥିଲେ। ରବିବାର କୌଣସି କାରଣବଶତଃ ଘର ଭିତରୁ ଧୂଆଁ ବାହାରୁଥିବା ପରିବାର ଲୋକେ ଲକ୍ଷ୍ୟ କରିଥିଲେ।
ସେହି ସମୟରେ ଘରେ ୨ ମାସର ଶିଶୁ ଶୋଇଥିଲା। ଗ୍ରାମବାସୀ ଓ ପରିବାର ଲୋକେ ଘର ଭିତରେ ପଶି ଶିଶୁଟିକୁ ଉଦ୍ଧାର କରିଛନ୍ତି। ନିଆଁର ପ୍ରକୋପ ଏତେ ଭୟଙ୍କର ଥିଲା ଯେ ଗ୍ରାମବାସୀଙ୍କ ଚେଷ୍ଟା ସତ୍ତ୍ୱେ ଆୟତ୍ତ ହୋଇପାରି ନ ଥିଲେ। ଖବର ପାଇ ଫୁଲବାଣୀ ଅଗ୍ନିଶମବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ତେବେ ସକାଳ ସମୟ ହୋଇଥିବାରୁ ଏକ ବଡ଼ ଅଘଟଣ ରୋକାଯାଇପାରିଲା। ଏନେଇ ଅଗ୍ନିକାଣ୍ଡର କାରଣ ଜଣାପଡ଼ିନାହିଁ।
