ପଦ୍ମପୁର, ୩।୩(ଡି.ଏନ୍.ଏ.): ରାୟଗଡ଼ା ଜିଲା ପଦ୍ମପୁର ଥାନା ପୋଲିସ ଗଞ୍ଜେଇ ଚୋରା ଚାଲାଣ ଅଭିଯୋଗରେ ୨ ଜଣଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ ଉତ୍ତରପ୍ରଦେଶର ଗୁଲାମ ଖାନ(୨୫)ଓ ରାଜ ବାହାଦୁର(୨୪)। ସୂଚନା ଅନୁଯାୟୀ ଗୁରୁବାର ରାତିରେ ପଦ୍ମପୁର ପୋଲିସ ଗଞ୍ଜେଇ ଚାଲାଣ ଖବରପାଇ ପଦ୍ମପୁର ବ୍ଲକ ଇନ୍ଦୁପୁର ପଞ୍ଚାୟତ ଖିଲାମୁଣ୍ଡା ବ୍ରିଜ୍ ନିକଟରେ ରାଉତରଙ୍ଗାରୁ ଉତ୍ତରପ୍ରଦେଶ ଯାଉଥିବା ଏକ କାର୍ ଉପରେ ଚଢ଼ାଉ କରିଥିଲା। ପଦ୍ମପୁର ପୋଲିସ ୩୦ କେଜି ଗଞ୍ଜେଇ ଜବତକରି ଅଭିଯୁକ୍ତ ଗୁଲାମ ଓ ରାଜଙ୍କୁ ଗିରଫ କରିଛି। ପୋଲିସ ଗଞ୍ଜେଇ ଚାଲାଣରେ ବ୍ୟବହୃତ କାର୍ ସହ ଅଭିଯୁକ୍ତଙ୍କଠାରୁ ୨ଟି ମୋବାଇଲ, ନଗଦ ୩୨୦୦ ଟଙ୍କା ଜବତ କରାଯାଇଛି। ଏ ନେଇ ପଦ୍ମପୁର ଥାନାରେ କେସ୍ ନମ୍ବର ୪୫/ ୨୩ରେ ମାମଲା ରୁଜୁ ହୋଇଛି। ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଥିବା ନେଇ ପଦ୍ମପୁର ଥାନାଧିକାରୀ ରାଜେଶ ବଳିୟାରସିଂ ସୂଚନା ଦେଇଛନ୍ତି।
ଏଠାରେ ସୂଚନାଯୋଗ୍ୟ, ପଦ୍ମପୁର ଥାନାରେ ଗତ ସପ୍ତାହକ ମଧ୍ୟରେ ୪ ଟି ବେଆଇନ ଗଞ୍ଜେଇ କେସ୍ ରୁଜୁ କରାଯାଇଥିବା ବେଳେ ୧୨୭ କେଜି ଗଞ୍ଜେଇ ସହ ଗୋଟିଏ କାର୍, ୩ ବାଇକ୍ ଆଉ ୭ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିଛି।
