ଜଣେ ୧୦ ବର୍ଷର ପୁଅଙ୍କ ଚିଠିକୁ ତାଙ୍କ ପିତା ଖୋଲିଦେବାରୁ କୋର୍ଟରେ ଦଣ୍ଡିତ ହୋଇଛନ୍ତି। ଆପଣ ଭାବୁଥିବେ ଏ ଚିଠିରେ ଏମିତି କ’ଣ ଥିଲା ଯେ ପିତାଙ୍କୁ ଜେଲଦଣ୍ଡ ଭୋଗିବାକୁ ପଡ଼ିଲା। ଅବିଶ୍ୱାସ ଲାଗୁଥିଲେ ବି ସତ। ଏପରି ଏକ ଘଟଣା ଘଟିଛି ସ୍ପେନ୍ରେ। ସେବିଲ୍ ସହରରେ ରହୁଥିବା ଜଣେ ବ୍ୟକ୍ତିଙ୍କୁ ଏପରି ଦଣ୍ଡ ଭୋଗିବାକୁ ପଡ଼ିଛି। ସ୍ପେନ୍ରେ ରହୁଥିବା ଜଣେ ବ୍ୟକ୍ତିଙ୍କ ଲେଟର ବକ୍ସକୁ ଏକ ଚିଠି ଆସିଥିଲା। ଏହି ଚିଠିଟି ତାଙ୍କ ପୁଅ ନାଁରେ ଆସିଥିଲା। କିନ୍ତୁ ଚିଠିଟି ପିତା ଖୋଲିଦେବାରୁ ତାଙ୍କୁ କୋର୍ଟ ୨ ବର୍ଷ ଜେଲଦଣ୍ଡ ଦେବା ସହ ୨.୩୩ ଲକ୍ଷ ଟଙ୍କା ଜୋରିମାନା ଆଦେଶ ଦେଇଛନ୍ତି। କାରଣ ଏହି ଚିଠିଟି ନାବାଳକର ମାଉସୀ ତାଙ୍କ ପାଖକୁ ପଠାଇଥିଲେ। ଏଥିରେ ଲେଖାଥିଲା ୨୦୧୨ ମସିହାରେ ତାଙ୍କ ପିତା ତାଙ୍କ ମାତାଙ୍କୁ ମାନସିକ ତଥା ଶାରୀରିକ ଯନ୍ତ୍ରଣା ଦେଇଥିଲେ। ତେଣୁ ତାଙ୍କୁ ଜେଲ୍ଦଣ୍ଡ ଭୋଗିବା ଦରକାର। ପିତାଜଣକ ଏଥିରୁ ବର୍ତ୍ତିବା ପାଇଁ ସେ ଭୁଲରେ ଏହା ଖୋଲି ଦେଇଛନ୍ତି କହିଥିଲେ। କିନ୍ତୁ ଏହାକୁ ଶୁଣି ନ ଥିଲେ ପୁତ୍ରଜଣକ। ଏ କଥା କୋର୍ଟରେ ପହଞ୍ଚିଥିଲା। ଫଳରେ ପତ୍ନୀଙ୍କୁ ନିର୍ଯାତନା ଅଭିଯୋଗରେ ଆଇନ ଅନୁଯାୟୀ କୋର୍ଟ ତାଙ୍କୁ ଦଣ୍ଡିତ କରିଛନ୍ତି। ଏବେ ନାବାଳକଙ୍କ ପିତା ଜେଲ୍ରେ ଦିନ କାଟୁଛନ୍ତି। ଏହାର ଶୁଣାଣି ଆଜି ପର୍ଯ୍ୟନ୍ତ ହୋଇନାହିଁ।
