ରାୟଗଡ଼ା,୧୪।୯ (ଆଶିଷ ରଞ୍ଜନ ପଣ୍ଡା)ଆଦିବାସୀ ଅଧ୍ୟୁଷିତ ରାୟଗଡ଼ା ଜିଲାରେ ଚିକିତ୍ସା ସେବାକୁ ଉନ୍ନତମାନର ଓ ତ୍ୱରାନ୍ବିତ କରିବା ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ହେଲେ ବାସ୍ତବ ଚିତ୍ର କିଛି ଭିନ୍ନ ଦେଖିବାକୁ ମିଳିଛ। ଜିଲାରେ ୧୫୦ ଡାକ୍ତର ପଦବୀ ଖାଲି ପଡ଼ିଥିବାରୁ ରୋଗୀସେବା ବାଧାପ୍ରାପ୍ତ ହେଉଥିବା ଅଭିଯୋଗ ହେଉଛି। ଜିଲାରେ ୩୧୪ ଡାକ୍ତର ପଦବୀ ଅନୁମୋଦିତ ରହିଥିବା ବେଳେ ବିଭିନ୍ନ ହସ୍ପିଟାଲରେ ମାତ୍ର ୧୬୪ ଡାକ୍ତର ରହିଛନ୍ତି। ଏପରିକି ଜିଲାରେ ଶିଶୁ ଚିକିତ୍ସା ସେବା ମଧ୍ୟ ବିପର୍ଯ୍ୟସ୍ତ ହୋଇପଡ଼ିଛି। ୧୬ ଶିଶୁ ବିଶେଷଜ୍ଞ ପଦବୀ ଅନୁମୋଦିତ ରହିଥିବାବେଳେ ସେଥିମଧ୍ୟରୁ ମାତ୍ର ୩ ଡାକ୍ତର ରହିଥିବା ବେଳେ ୧୩ ଡାକ୍ତର ପଦବୀ ଖାଲି ରହିଛି। ଫଳରେ ଶିଶୁଙ୍କ ଚିକିତ୍ସା ପାଇଁ ଅଭିଭାବକଙ୍କୁ ବହୁ ସମସ୍ୟାର ସମ୍ମୁଖୀନ ହେବାକୁ ପଡ଼ୁଥିବା ଅଭିଯୋଗ ହେଉଛି। ଜିଲାରେ ଶିଶୁଙ୍କ ଜରୁରିକାଳୀନ ଚିକିତ୍ସା ଓ ଅପରେଶନ ପାଇଁ ଶିଶୁ ବିଭାଗ ଆଶୁ ଚିକିତ୍ସା କେନ୍ଦ୍ର (ପିଆଇସିୟୁ) ନିର୍ମାଣ ଶେଷ ହୋଇ ୨ବର୍ଷ ବିତିଯାଇଥିଲେ ମଧ୍ୟ ଏଯାବତ୍ ତାହା କାର୍ଯ୍ୟକ୍ଷମ ହୋଇପାରି ନାହିଁ। ତେବେ ଏହି ପିଆଇସିୟୁ ପାଇଁ ଆବଶ୍ୟକ ରହିଥିବା ପ୍ରଶିକ୍ଷିତ ଡାକ୍ତର ଓ ଷ୍ଟାଫ୍ ନର୍ସର ଅଭାବ ରହିଥିବାରୁ ଏହା କାର୍ଯ୍ୟକ୍ଷମ ହୋଇପାରୁ ନ ଥିବା ଜଣାପଡ଼ିଛି।
ସୂଚନାଯୋଗ୍ୟ, କୋଭିଡ୍ ସମୟରେ ଶିଶୁଙ୍କ ଜୀବନ ସୁରକ୍ଷା ପାଇଁ ଇସିଆର୍ପି-୨ ଯୋଜନାରେ ଜିଲା ମୁଖ୍ୟ ଚିକିତ୍ସାଳୟରେ ୭୨ ଲକ୍ଷ ୬୦ ହଜାର ଟଙ୍କା ବ୍ୟୟରେ ଏହି ପିଆଇସିୟୁକୁ ପୂର୍ତ୍ତ ବିଭାଗ ନିର୍ମାଣକରି ହସ୍ତାନ୍ତର କରିଥିଲା। ତେବେ ଏହା ନିର୍ମାଣ ସରି ଇତିମଧ୍ୟରେ ୧ ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ସ୍ବାସ୍ଥ୍ୟ ବିଭାଗ ଅଧିକାରୀଙ୍କ ଆନ୍ତରିକତା ଅଭାବ କାରଣରୁ ଏହା କାର୍ଯ୍ୟକ୍ଷମ ହୋଇପାରୁନାହିଁ। ଫଳରେ ଗୁରୁତର ଅବସ୍ଥାରେ ଶିଶୁମାନଙ୍କୁ ଅନ୍ୟତ୍ର ସ୍ଥାନାନ୍ତର କରିବାକୁ ପଡ଼ୁଛି। ଏପରିିକି ଏହି ପିଆଇସିୟୁ ଆରମ୍ଭ ହୋଇ ନ ଥିବାରୁ ଗୁରୁତର ଅବସ୍ଥାରେ ଶିଶୁଙ୍କ ଜୀବନ ମଧ୍ୟ ଚାଲିଯାଉଥିବା ଅଭିଯୋଗ ହେଉଛି। ପିଆଇସିୟୁ ଆରମ୍ଭ ହେଲେ ଗୁରୁତର ଅବସ୍ଥାରେ ଆସୁଥିବା ଶିଶୁମାନଙ୍କୁ ୨୪ ଘଣ୍ଟା ଆଇସିୟୁ ସୁବିଧା ମିଳିପାରିବ। ହେଲେ ଏଥିପାଇଁ ଅତି କମ୍ରେ ୩ ଜଣ ଡାକ୍ତର ଓ ପାଖାପାଖି ୧୨ରୁ ୧୫ ଷ୍ଟାଫ ନର୍ସ ଆବଶ୍ୟକ ବୋଲି ମେଡ଼ିକାଲ କର୍ତ୍ତୃପକ୍ଷ ସୂଚନା ଦେଇଛନ୍ତି। ଏ ନେଇ ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଶିଶୁ ରୋଗ ବିଶେଷଜ୍ଞଙ୍କୁ ଏହାର ପରିଚାଳନା ପାଇଁ ରାଜ୍ୟ ସରକାରଙ୍କ ପକ୍ଷରୁ ଟ୍ରେନିଂ ସରିଥିଲେ ମଧ୍ୟ ଷ୍ଟାଫ ନର୍ସଙ୍କୁ ଟ୍ରେନିଂ ମିଳି ନ ଥିବା କୁହାଯାଉଛି। ଅନ୍ୟପକ୍ଷେ ପିଆଇସିୟୁ କାର୍ଯ୍ୟକ୍ଷମ ନ ହୋଇ ବନ୍ଦ ପଡ଼ିଥିବାରୁ ସେଠାରେ ଲାଗିଥିବା ବିଭିନ୍ନ ଆଧୁନିକ ଯନ୍ତ୍ରାଂଶ ନଷ୍ଟହେବାକୁ ବସିଲାଣି। ଏ ନେଇ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଲାଲମୋହନ ରାଉତରାୟଙ୍କୁ ପଚାରିବାରୁ ଭେଷଜ ଡାକ୍ତର ସଂଜ୍ଞା ଦାସ ପିଆଇସିୟୁ ପରିଚାଳନା ନିମନ୍ତେ ପ୍ରଶିକ୍ଷଣ ନେଉଛନ୍ତି। ପ୍ରଶିକ୍ଷଣ ସାରି ଫେରିବା ପରେ ଏହା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହେବ ବୋଲି ସେ କହିଛନ୍ତି। ତେବେ ଜିଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ଏଥିପ୍ରତି ଦୃଷ୍ଟିଦେଇ ଯଥାଶୀଘ୍ର ପିଆଇସିୟୁକୁ କାର୍ଯ୍ୟକ୍ଷମ କରାଗଲେ ଅଞ୍ଚଳବାସୀଙ୍କୁ ସୁବିଧା ମିଳିପାରିବ ବୋଲି ସାଧାରଣରେ ଦାବି ହୋଇଛି।
