ଝରିଗାଁ,୮ା୮(କିଶୋର ଚନ୍ଦ୍ର ମଣ୍ଡଳ): ନବରଙ୍ଗପୁର ଜିଲା ଝରିଗାଁ ବ୍ଲକ ସାନରଟମରା ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟର ଛାତ୍ରାବାସରେ ରହୁଥିବା ଅନ୍ତେବାସୀଙ୍କ ନିମ୍ନମାନର ଖାଦ୍ୟ ଦେବା ସହ ଭିତ୍ତିଭୂମିର ଅଭାବ ଦୀର୍ଘ ବର୍ଷ ଧରି ରହିଥିବା ବେଳେ ଅନ୍ତେବାସୀମାନେ ବାରମ୍ବାର ଶିକ୍ଷକମାନଙ୍କୁ ଅଭିଯୋଗ କରୁଥିବା ବେଳେ ସେଥିପ୍ରତି ବିଦ୍ୟାଳୟର କୌଣସି ଶିକ୍ଷକ ଏବଂ ସମ୍ପୁକ୍ତ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ସେମାନଙ୍କ ମୌଳିକ ସମସ୍ୟା ଦୂର କରିବା ପାଇଁ କେବେ ମଧ୍ୟ ଚେଷ୍ଟା କରିନଥିଲେ। ଯାହାକି ଆନ୍ତରିକତା ଏବଂ ମାନବିକତାର ଅଭାବ ରହିଥିବା ସ୍ପଷ୍ଟ ଜଣାପଡ଼ିଛି।
ଏହି ଘଟଣାକୁ ନେଇ ଶନିବାର ବିଜେଡି ଦଳର ପୂର୍ବତନ ଏମ୍ପି ରମେଶ ଚନ୍ଦ୍ର ମାଝୀ, ବ୍ଲକ ଅଧ୍ୟକ୍ଷ ଦୁର୍ଗାପ୍ରସାଦ ମାଝୀ, ବରିଷ୍ଠ ଯୁବ ନେତା ପ୍ରିୟରଞ୍ଜନ ଦାସ, ଗୁରୁସିଙ୍ଗା ପଞ୍ଚାୟତ ସରପଞ୍ଚ ମୋହନ ନାୟକ, ସେହିଭଳି କଂଗ୍ରେସ ଦଳର ପୂର୍ବତନ ବିଧାୟକ ଭୁଜବଳ ମାଝୀ, ଜିଲା ସଭାପତି ଲିପିକା ମାଝୀ, ସନରାଜ ଗଣ୍ଡ, ମହେଶ୍ୱର ଭତ୍ରା, ତମ୍ବୁଦାସ ପନକା ସମେତ ଦଳର ବହୁ ନେତା ବିଦ୍ୟାଳୟକୁ ଗସ୍ତ କରି ସେଠାରେ ରହୁଥିବା ଅନ୍ତେବାସୀଙ୍କ ସକାଶେ ରହିବ ପାଇଁ ଛାତ୍ରାବାସର ଅଭାବ, ବିଶୁଦ୍ଧ ପାନୀୟ ଜଳର ଅଭାବ, ପାଇଖାନାର ଅଭାବ, ତଥା ଛାତ୍ରାବାସର ସମସ୍ତ ଭିତ୍ତିଭୂମିର ଅଭାବ ରହିଅଛି।
ସେହିପରି ପିଲାଙ୍କୁ ପୋକରା ଚାଉଳ ସହ ନିମ୍ନମାନର ତରକାରୀ କିମ୍ବା ଡାଲି ଦିଆଯାଉଥିବା ନେଇ ପିଲାଙ୍କ ମୁହଁରୁ ଶୁଣିବାକୁ ପାଇଥିଲେ। ସଂପୃକ୍ତ ବିଭାଗର ଅଧିକାରୀମାନେ ସଠିକ୍ ଭାବେ ବିଦ୍ୟାଳୟକୁ ଆସି ତଦନ୍ତ କରୁ ନ ଥିଲେ। କିମ୍ବା ପିଲାଙ୍କୁ ଦିଆଯାଉଥିବା ଖାଦ୍ୟର ମାନ ଯାଞ୍ଚ କରୁ ନ ଥିବା ନେଇ ବିରୋଧୀ ନେତାମାନେ ପ୍ରକାଶ କରିଥିଲେ। ଝରିଗାଁ ସଦରମହକୁମାଠାରେ କଂଗ୍ରେସ ଜିଲା ସଭାପତି ଏକ ପ୍ରେସ୍ ମିଟ୍ ମାଧ୍ୟମରେ ଭାଜପା ସରକାରଙ୍କ କାର୍ଯ୍ୟକାରିତା ଉପରେ ବର୍ଷିଥିଲେ। ନବରଙ୍ଗପୁର ଜିଲା ଏକ ଆଦିବାସୀ ବହୁଳ ଅଞ୍ଚଳ ଅଟେ। ଏଠାରେ ରହିଥିବା ଗଣଶିକ୍ଷା ମନ୍ତ୍ରୀ, ଏମ୍ପି ବିଧାୟକମାନେ ମଧ୍ୟ ଆଦିବାସୀ ଶ୍ରେଣୀର ହୋଇଥିଲେ ହେଁ ଏହି ଅଞ୍ଚଳରେ ପିଲାଙ୍କୁ ଗୁଣାତ୍ମକ ଶିକ୍ଷା ମିଳିପାରୁ ନାହିଁ । ସେମାନେ ଛାତ୍ରାବାସରେ ରହିବା, ପାଠ ପଠାଇବା ପାଇଁ ଉପଯୁକ୍ତ ପରିବେଶର ସମୂର୍ଣ୍ଣ ଅଭାବ ରହିଛି। ଯଥାଶୀଘ୍ର ପିଲାଙ୍କ ସମସ୍ୟା ସମାଧାନ ନ ହେଲେ ତୀବ୍ର ଆନ୍ଦୋଳନ କରାଯିବ ବୋଲି କଂଗ୍ରେସ ସଭାପତି ପ୍ରକାଶ କରିଛନ୍ତି।
