ଅନୁଗୋଳ,୨୬।୪(ଦିବ୍ୟଶାନ୍ତନୁ ନାଥ): ମାତ୍ର ୧୩ ବର୍ଷ ବୟସରେ ସଂସାର କରିବାକୁ ଘରୁ ଗୋଡ଼ କାଢ଼ିଥିଲେ। ୨୩ ବର୍ଷୀୟ ପ୍ରେମିକଙ୍କ ହାତଧରି ମୁମ୍ୱାଇ ଚାଲିଯାଇଥିଲେ। ହେଲେ ପ୍ରେମିକଙ୍କ ମା’ ବାପାଙ୍କୁ ପୋଲିସ ଉଠାଇ ନେବା ପରେ ଭାଙ୍ଗିଯାଇଥିଲା ସେମାନଙ୍କ ସଂସାର ସ୍ୱପ୍ନ। ଘରେ ପହଞ୍ଚିବା ପରେ ଚାପ ସମ୍ଭାଳି ନ ପାରି ରଶି ଲଗାଇ ଆତ୍ମହତ୍ୟା କରିଥିଲେ ପ୍ରେମିକ। ଆଉ ଏହାର ୨୪ ଘଣ୍ଟା ପରେ ପ୍ରେମିକଙ୍କ ପଥଧରି ଜୀବନ ହାରିଛନ୍ତି ପ୍ରେମିକା। ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ସଖୀ ସେଣ୍ଟର ଶୌଚାଳୟରେ ଶନିବାର ଭୋର୍ ସମୟରେ ବେକରେ ଓଢ଼ଣି ବାନ୍ଧି ଝୁଲିପଡ଼ିଛନ୍ତି ସମ୍ପୃକ୍ତା ନାବାଳିକା।
ସୂଚନା ଅନୁଯାୟୀ, ଅନୁଗୋଳ ସଦର ଥାନା ଅଞ୍ଚଳର ସମ୍ପୃକ୍ତା ୧୩ ବର୍ଷୀୟା ନାବାଳିକା ଓ ଢେଙ୍କାନାଳ ଜିଲା ମୋଟଙ୍ଗା ଥାନା ନିମିଧା ଗ୍ରାମ ବାଲିରତ୍ନପୁର ସାହିର ବେଣୁପାଣି ସାହୁ (୨୩) ପରସ୍ପରକୁ ପ୍ରେମ କରୁଥିଲେ। ଗତ ୧ ତାରିଖରେ ନାବାଳିକା ପ୍ରେମିକାଙ୍କୁ ନେଇ ବେଣୁପାଣି ମୁମ୍ୱାଇ ପଳାଇ ଯାଇଥିଲେ। ଏ ସମ୍ପର୍କରେ ନାବାଳିକାଙ୍କ ମାତାପିତା ସେହିଦିନ ଅନୁଗୋଳ ସଦର ଥାନାକୁ ଅବଗତ କରାଇଥିଲେ। ୮ ତାରିଖରେ ଏ ସଂକ୍ରାନ୍ତରେ ଥାନାରେ ଏତଲା ପରେ ପୋଲିସ ନଂ. ୨୭୨/୨୬ରେ ମାମଲା ରୁଜୁ କରି ତଦନ୍ତ ଚଳାଇଥିଲା। ଗତ ୩ ଦିନ ତଳେ ଅନୁଗୋଳ ସଦର ପୋଲିସ ନିମିଧା ଗ୍ରାମକୁ ଆସି ବେଣୁପାଣିଙ୍କ ମାତାପିତାଙ୍କୁ ଥାନାକୁ ନେଇ ପଚରାଉଚରା କରିଥିଲା। ଏ ବିଷୟରେ ଜାଣିବା ପରେ ବେଣୁପାଣି ପ୍ରେମିକାଙ୍କୁ ଧରି ମୁମ୍ୱାଇରୁ ଫେରିଥିଲେ। ଏହାପରେ ସେ ପ୍ରେମିକାଙ୍କୁ ଜଣେ ସମ୍ପର୍କୀୟଙ୍କ ଘରକୁ ପଠାଇଦେଇ ଗତ ୨୩ ତାରିଖ ରାତିରେ ବେକରେ ରଶି ଲଗାଇ ଆତ୍ମହତ୍ୟା କରିଥିଲେ। ପୋଲିସ ସମ୍ପୃକ୍ତା ନାବାଳିକାଙ୍କୁ ୨୪ ତାରିଖରେ ଉଦ୍ଧାର କରି ଅନୁଗୋଳ ସଖୀ ସେଣ୍ଟରକୁ କାଉନସେଲିଂ ପାଇଁ ପଠାଇ ଦେଇଥିଲା। ସେଠାରେ ୨/୩ ଦିନର କାଉନସେଲିଂ ପରେ ତାଙ୍କୁ ପରିବାର
ଲୋକଙ୍କୁ ହସ୍ତାନ୍ତର କରାଯାଇଥାନ୍ତା। ହେଲେ ଶନିବାର ଭୋର୍ ସମୟରେ ସେ ଶୌଚାଳୟ ଯାଇ ଆଉ ଫେରି ନ ଥିଲେ। ଅଘଟଣ ଆଶଙ୍କା କରି ସଖୀ ସେଣ୍ଟର କର୍ମଚାରୀମାନେ ଶୌଚାଳୟ କବାଟ ଭାଙ୍ଗି ଭିତରକୁ ଯାଇ ନାବାଳିକାଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ। ଖବରପାଇ ଅନୁଗୋଳ ଥାନା ପୋଲିସ ପହଞ୍ଚି ତଦନ୍ତ କରିଥିଲା। ଶୌଚାଳୟ ସାୱାର ପାଇପରେ ଓଢ଼ଣି ବାନ୍ଧି ନାବାଳିକା ଆତ୍ମହତ୍ୟା କରିଥିବାବେଳେ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ କରାଇଥିଲା। ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିଥିଲା। ବ୍ୟବଚ୍ଛେଦ ରିପୋର୍ଟ ଆସିବା ପରେ ତଦନ୍ତ ଆଗକୁ ବଢିବ ବୋଲି ଅନୁଗୋଳ ଥାନା ଅଧିକାରୀ ପ୍ରକାଶ ମାଝୀ ସୂଚନା ଦେଇଛନ୍ତି।
