ଦୁନିଆରେ ଅନେକ ରୋଗ ଅଛି, ଯାହା ଅତ୍ୟନ୍ତ ବିପଜ୍ଜନକ ଏବଂ ବିଚିତ୍ର ଅଟେ। ଜଣେ ୧୨ ବର୍ଷର ବାଳକ ଏପରି ଏକ ଅଜବ ରୋଗ ସହିତ ଲଢୁଛନ୍ତି। ଏହି କାରଣରୁ ସେ ଜଣେ ସାଧାରଣ ପିଲା ପରି ସବୁ ପ୍ରକାର ଖାଦ୍ୟ ଖାଇପାରୁ ନାହାନ୍ତି। ସେ କେବଳ ବ୍ରେଡ୍ ଏବଂ ଦହି ଖାଉଛନ୍ତି। ଏହି ଦୁଇଟି ଖାଦ୍ୟ ଛଡା ତୃତୀୟ ଖାଦ୍ୟ ଯଦି ତାଙ୍କୁ ଖାଇବାକୁ ଦିଆଯାଉଛି ତେବେ ସେ କାନ୍ଦିବା ଆରମ୍ଭ କରିଦେଉଛନ୍ତି। ବାଳକଙ୍କ ମାତାପିତା ଅନେକ ପୁଷ୍ଟିକର ଖାଦ୍ୟ ତାଙ୍କୁ ଖାଇବାକୁ ଦେଉଛନ୍ତି କିନ୍ତୁ ସେ କେବଳ ବ୍ରେଡ ଏବଂ ଦହି ଖାଉଛନ୍ତି। ୟୁନାଇଟେଡ୍ କିଙ୍ଗଡମ୍ର ନରଫୋକ ସିଟିରେ ରହୁଥିବା ୧୨ ବର୍ଷୀୟ ଆଷ୍ଟନ ଫିଶରଙ୍କ ଖାଦ୍ୟକୁ ନେଇ ତାଙ୍କ ମାତାପିତା ବେଶ୍ ଚିନ୍ତିତ। ବୟସ ବଢିବା ସହ ଆଷ୍ଟନ ସାଧାରଣ ପିଲାଙ୍କ ପରି ସବୁ ଜିନିଷ ନ ଖାଇବାରୁ ତାଙ୍କ ମାତାପିତା ଡାକ୍ତରଙ୍କ ପରାମର୍ଶ କରିଥିଲେ। ଡାକ୍ତରଙ୍କ କହିବା ଅନୁଯାୟୀ, ଆଷ୍ଟନଙ୍କୁ ଫୁଡ ଫୋବିଆ ନାମକ ଏକ ରୋଗ ଅଛି। ଫଳରେ ସେ ଅନ୍ୟ ଖାଦ୍ୟକୁ ପସନ୍ଦ କରୁନାହାନ୍ତି। ତାଙ୍କ ମା’ କାରା କହିଛନ୍ତି, ଗତ ମାସରେ ଆଷ୍ଟନଙ୍କୁ ଇଟିଙ୍ଗ୍ ଡିସଅର୍ଡର ସ୍ପେଶାଲିଷ୍ଟଙ୍କ ପାଖକୁ ନିଆଯାଇଥିଲା। ସେଠାରୁ ଜଣାପଡିଥିଲା ଯେ, ସେ ଖାଦ୍ୟ ଖାଇବାକୁ ଭୟ କରୁଛନ୍ତି। ଇଟିଙ୍ଗ୍ ଡିସଅର୍ଡର ସ୍ପେଶାଲିଷ୍ଟ ପ୍ରକାଶ କରିଛନ୍ତି ଯେ, ଏଷ୍ଟନଙ୍କ Avoidant Restrictive Food Intake Disorder (ARFID)ଅଛି। ଏହିକାରଣରୁ ଆଷ୍ଟନ ଅଲଗା କିଛି ଖାଇବାକୁ ଭୟ କରୁଛନ୍ତି ଏବଂ କେବଳ ଦହି, ବ୍ରେଡ୍ ଖାଇବାକୁ ପସନ୍ଦ କରୁଛନ୍ତି। ଏବଂ ଆଷ୍ଟନଙ୍କୁ କାଉଂସେଲିଙ୍ଗ କରାଯାଉଛି। ଏହାଦ୍ୱାରା ତାଙ୍କ ଆତ୍ମବିଶ୍ୱାସ ବଢିବ ବୋଲି ଡାକ୍ତରମାନେ କହିଛନ୍ତି।
