ଭୁବନେଶ୍ୱର,୧୭୧୮।୧୨(ବ୍ୟୁରୋ): ନା କିଣା ହୋଇଛି ସାମଗ୍ରୀ, ନା ବିକ୍ରି। କେବଳ କାଗଜକଲମରେ କୋଟିକୋଟି ଟଙ୍କାର କାରବାର ଦର୍ଶାଯାଉଛି। ଏଭଳି ଜାଲିଆତି କରି ସରକାରଙ୍କୁ ଶହ ଶହ କୋଟି ଟଙ୍କାର ବସ୍ତୁ ଓ ସେବା କର(ଜିଏସ୍ଟି) ଚୂନ ଲଗାଉଛନ୍ତି ଅସାଧୁ ବ୍ୟବସାୟୀ। ଜାଲ୍ କମ୍ପାନୀ ବିଲ୍ ଜରିଆରେ ଇନ୍ପୁଟ୍ ଟ୍ୟାକ୍ସ ଦର୍ଶାଇ ବାହାର ରାଜ୍ୟ ବ୍ୟବସାୟୀଙ୍କ ପାଖରୁ ସଲାସୁତୁରାରେ ଜିଏସ୍ଟି ଅର୍ଥ ହାତଉଛନ୍ତି। ଏହି ବ୍ୟବସାୟକୁ ଯଥାର୍ଥ ଦର୍ଶାଇବା ଲାଗି ଅଭିଯୁକ୍ତମାନେ ବିଭିନ୍ନ ବ୍ୟାଙ୍କରେ ଆକାଉଣ୍ଟ ଖୋଲି ଜାଲ କମ୍ପାନୀ ନାମରେ କୋଟି କୋଟି ଟଙ୍କା କାରବାର କରୁଛନ୍ତି। ଏଥିରେ ଏକାଧିକ ର଼୍ୟାକେଟ୍ ସମ୍ପୃକ୍ତ ଥିବାବେଳେ ରାଜ୍ୟ ବାହାରକୁ ଏମାନଙ୍କ ଚେର ଲମ୍ବିଛି। ତେବେ ଏହି ଚୋରାକାରବାର ରୋକିବା ଲାଗି ଡାଇରେକ୍ଟୋରେଟ ଜେନେରାଲ୍ ଅଫ ଜିଏସ୍ଟି ଇଣ୍ଟେଲିଜେନ୍ସ(ଡିଜିଜିଆଇ)ପକ୍ଷରୁ ଗତ ନଭେମ୍ବର ୯ତାରିଖରୁ ଏକ ସ୍ବତନ୍ତ୍ର ଡ୍ରାଇଭ ଆରମ୍ଭ କରାଯାଇଛି, ଯେଉଁଥିରେ ରାଜ୍ୟର ବିଭିନ୍ନ ଜିଲାରେ ଥିବା ଜାଲ୍ କମ୍ପାନୀଗୁଡ଼ିକ ଉପରେ ଚଢାଉ କରାଯାଇଛି। ଗତ ଦେଢ଼ମାସ ଭିତରେ ଓଡ଼ିଶାରୁ ୧୧ଶହ କୋଟି ଟଙ୍କାର ଏଭଳି ଜାଲ୍ ଜିଏସ୍ଟି କାରବାର ଧରାପଡ଼ିବା ସହ ୩ଜଣଙ୍କୁ ଗିରଫ କରାଯାଇଛି ବୋଲି ଗୁରୁବାର ଭୁବନେଶ୍ୱରସ୍ଥିତ ଡିଜିଜିଆଇ କାର୍ଯ୍ୟାଳୟରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଅତିରିକ୍ତ ମହାନିର୍ଦ୍ଦେଶକ ଦେବାଶିଷ ସାହୁ ସୂଚନା ଦେଇଛନ୍ତି। ସେହିପରି କୋଲକାତାରୁ ମଧ୍ୟ ଦୁଇ ହଜାର କୋଟି ଟଙ୍କାର ଜାଲ ଜିଏସ୍ଟି କାରବାର ଠାବ କରାଯାଇଛି। ସୂଚନା ଅନୁଯାୟୀ, ଓଡ଼ିଶାରୁ ୨୦୧୮ରୁ ନଭେମ୍ବର ୨୦୨୦ମଧ୍ୟରେ ପ୍ରାୟ ୧,୭୪୪ କୋଟି ଟଙ୍କାର ଜିଏସ୍ଟି ଠକେଇ ହୋଇଥିବାବେଳେ ଏନେଇ ୨୮୧ଟି ମାମଲା ରୁଜୁ କରାଯାଇଛି। ଏଥିରେ ୧୧ଜଣଙ୍କୁ ଗିରଫ କରାଯିବା ସହ ସେମାନଙ୍କଠାରୁ ୮୦୭ କୋଟି ଟଙ୍କା ଆଦାୟ କରାଯାଇଛି।
କେମିତି ହେଉଛି…
ଜିଏସ୍ଟି ଠକେଇରେ ସମ୍ପୃକ୍ତ ଅଭିଯୁକ୍ତମାନେ ଟାକ୍ସି ଚାଳକ, ରିକ୍ସା ବାଲା, ପାନଦୋକାନୀ, ଦିନମଜୁରିଆ, ପାଣିମିସ୍ତ୍ରି, ବେକାର ଯୁବତୀଯୁବକଙ୍କୁ ଟାର୍ଗେଟ କରନ୍ତି। ଅର୍ଥଲୋଭ ଓ ରୋଜଗାର ଦେବା ନାଁରେ ସେମାନଙ୍କଠାରୁ ଆଧାରକାର୍ଡ, ପ୍ୟାନ୍କାର୍ଡ, ବ୍ୟାଙ୍କ ତଥ୍ୟ, ଫଟୋ ଆଦି ହାସଲ କରନ୍ତି। ଏହାପରେ ଉକ୍ତ ଡକ୍ୟୁମେଣ୍ଟ ବ୍ୟବହାର କରି ବିଭିନ୍ନ ବ୍ୟାଙ୍କରେ ଆକାଉଣ୍ଟ ଖୋଲିବା ସହ ସେମାନଙ୍କ ନିକଟରୁ ଓଟିପି ହାସଲ କରି ନିଅନ୍ତି। ପରେ ତାଙ୍କ ନାଁରେ ଜାଲ୍ କମ୍ପାନୀ ଖୋଲି ଜିଏସ୍ଟି ପଞ୍ଜୀକୃତ କରିଥାନ୍ତି, ଯେଉଁଥିରେ କୋଟି କୋଟି ଟଙ୍କାର କାରବାର ହୋଇଥାଏ।
୨୬୨କୋଟି ଟଙ୍କାର ଠକେଇ କରି ଜଣେ ଗିରଫ
୨୬୨ କୋଟି ଟଙ୍କାର ଜିଏସ୍ଟି ଠକେଇ କରିଥିବା ଅଭିଯୋଗରେ ବିଭାଗର ଇଣ୍ଟେଲିଜେନ୍ସ ଟିମ୍ ରାଉରକେଲାରୁ ବୁଧବାର ଜଣେ ଠକଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ସନ୍ତୋଷ କୁମାର ଗୁପ୍ତା(୪୦)। ପ୍ଲାଷ୍ଟିକ ବୋତଲ ବ୍ୟବସାୟ ଚାଲୁଥିବା ଦର୍ଶାଇ ସନ୍ତୋଷ ଜାଲ୍କାଗଜ ମାଧ୍ୟମରେ ୧୦ରୁ ଅଧିକ ନକଲି କାରଖାନା ଚଳାଉଥିଲେ। ସନ୍ତୋଷଙ୍କ ସହ ଏକ ବଡ ନେଟ୍ଓ୍ବର୍କ ସାମିଲ ଥିବା ସହ ରାଜ୍ୟ ବାହାରର ଅନେକ ବ୍ୟକ୍ତି ସମ୍ପୃକ୍ତ ଥିବାନେଇ ଟିମ୍ ପକ୍ଷରୁ ସୂଚନା ଦିଆଯାଇଛି। ଅନ୍ୟମାନଙ୍କୁ ଧରିବା ପାଇଁ ଜିଏସ୍ଟି ଇଣ୍ଟେଲିଜେନ୍ସ ଅଧିକ ତଦନ୍ତ କରୁଛି। ତେବେ ଜିଏସ୍ଟି ଠକେଇରେ ରାଉରକେଲା ଏବେ ମୁଖ୍ୟ ସ୍ଥଳୀ ପାଲଟିଛି। ପୂର୍ବରୁ ରାଉକକେଲାରୁ ଏଭଳି ୨ଟି ମାମଲାରେ ଶହ ଶହ କୋଟି ଟଙ୍କା ଜିଏସ୍ଟି ଫାଙ୍କିଥିବା ଘଟଣା ସାମ୍ନାକୁ ଆସିଥିଲା।
