ମୁମ୍ବାଇ,୩ା୨:ଜାନୁୟାରୀ ୨୪ରେ ନ୍ୟୁୟର୍କର ଶର୍ଟ ସେଲର ହିଣ୍ଡେନ୍ବର୍ଗ ରିସର୍ଚ୍ଚ କର୍ପୋରେଟ୍ ଜାଏଣ୍ଟ ଗୌତମ ଆଦାନୀଙ୍କ ଆଦାନୀ ଗ୍ରୁପ୍ ବିରୋଧରେ ସାଂଘାତିକ ଅଭିଯୋଗ ଆଣିଥିଲା। ଏହି ଗ୍ରୁପ୍ ଅଧୀନ ଆଦାନୀ ଏଣ୍ଟରପ୍ରାଇଜେସ୍ ସମେତ ୭ଟି କମ୍ପାନୀର ଶେୟାର ମୂଲ୍ୟକୁ ଅଧିକ ଲାଭ ଆଶାରେ ଜାଣିଶୁଣି ବଢ଼ାଇ ଦିଆଯାଇଛି। ଏପରି କି କମ୍ପାନୀଗୁଡ଼ିକର ଆକାଉଣ୍ଟରେ ମଧ୍ୟ ଅନେକ ଅନିୟମିତତା ରହିଥିବା ନେଇ ନାଥନ୍ ଆଣ୍ଡର୍ସନଙ୍କ ଫରେନ୍ସିକ୍ ଫାଇନାନ୍ସିଆଲ ରିସର୍ଚ୍ଚ ଫାର୍ମ ହିଣ୍ଡେନ୍ବର୍ଗ ନିଜ ଓ୍ବେବ୍ସାଇଟ୍ରେ ପ୍ରଘଟ କରିଥିଲା। ଏଥିସହ ଜାଲିଆତି ସମ୍ପର୍କରେ ଆଦାନୀ ଗ୍ରୁପ୍କୁ ୮୮ଟି ପ୍ରଶ୍ନ କରିଥିଲା। ଆଦାନୀ ଗ୍ରୁପ୍ ରବିବାର ୪୧୩ ପୃଷ୍ଠା ସମ୍ବଳିତ ଏକ ବିବୃତି ଜାରି କରି ହିଣ୍ଡେନ୍ବର୍ଗକୁ ଜବାବ ଦେଇଥିଲା। ଇତିମଧ୍ୟରେ ଆଦାନୀ ଏଣ୍ଟରପ୍ରାଇଜେସ୍ ପକ୍ଷରୁ ଅଣାଯାଇଥିବା ୨୦ ହଜାର କୋଟି ଟଙ୍କାର ଫଲୋ ଅନ୍ ପବ୍ଲିକ୍ ଅଫର (ଏଫ୍ପିଓ)କୁ ନିବେଶକମାନେ ୧.୧୨ ଥର ସବ୍ସ୍କ୍ରାଇବ୍ କରିଥିଲେ। ତେବେ ଆଦାନୀ ଗ୍ରୁପ୍ର ଶେୟାର ମୂଲ୍ୟରେ ଲଗାତର ହ୍ରାସ ପାଇବାରେ ଲାଗିଥିଲା। ବୁଧବାର ଟ୍ରେଡିଂ ସେସନ୍ରେ ଏହି ଏଫ୍ପିଓର ପ୍ରାଇସ୍ ବ୍ୟାଣ୍ଡ (ନିର୍ଦ୍ଧାରିତ ମୂଲ୍ୟ) ୩,୧୧୨-୩,୨୭୬ରୁ ୩୪% ତଳକୁ ଖସିବା ପରେ ଆଦାନୀ ବୋର୍ଡ ଏହାକୁ ପ୍ରତ୍ୟାହାର କରିବାକୁ ବାଧ୍ୟ ହୋଇଥିଲା। ଶେୟାର ମାର୍କେଟ ଭୋଲାଟିଲିଟି (ଉଠାପକା) ଯୋଗୁ ଏଫ୍ପିଓ ରଦ୍ଦ କରିବା ସହ ନିବେଶକଙ୍କୁ ସେମାନଙ୍କ ଟଙ୍କା ଫେରସ୍ତ କରିବାକୁ ନିଷ୍ପତ୍ତି ନେଇଥିଲା। ଗୁରୁବାର କ୍ଲୋଜିଂ ଡେ’ରେ ମଧ୍ୟ ଅନୁରୂପ ସ୍ଥିତି ଲାଗିରହିଥିବାରୁ ଆଦାନୀ ଏଣ୍ଟରପ୍ରାଇଜେସ୍ର ଶେୟାର ମୂଲ୍ୟରେ ୨୩% ଅବକ୍ଷୟ ଦେଖିବାକୁ ମିଳିଛି। ନିବେଶକମାନେ ମଧ୍ୟ କମ୍ପାନୀକୁ ସନ୍ଦେହ ଦୃଷ୍ଟିରେ ଦେଖୁଥିବାରୁ ଆଦାନୀ ଗ୍ରୁପ୍ର ଭବିଷ୍ୟତକୁ ନେଇ ଅନେକ ପ୍ରଶ୍ନ ଛିଡ଼ା ହୋଇଛି। ସପ୍ତାହେ ମଧ୍ୟରେ ଆଦାନୀଙ୍କ କମ୍ପାନୀଗୁଡ଼ିକୁ ୧୦୦ ବିଲିୟନ୍ ଡଲାରରୁ ଊର୍ଦ୍ଧ୍ୱ କ୍ଷତି ସହିବାକୁ ପଡ଼ିଛି। ଫଳରେ ଏକଦା ବିଶ୍ୱର ଧନୀ ବ୍ୟକ୍ତିଙ୍କ ତାଲିକାରେ ତିନି ନମ୍ବର ସ୍ଥାନ ଅଧିକାର କରିଥିବା ଆଦାନୀ ଏବେ ପଞ୍ଚଦଶ ସ୍ଥାନକୁ ଖସିଆସିଛନ୍ତି। ଅନ୍ୟପକ୍ଷେ ଆଦାନୀଙ୍କୁ ପଛରେ ପକାଇ ତାଙ୍କ ପାରମ୍ପରିକ ପ୍ରତିଦ୍ୱନ୍ଦ୍ୱୀ ତଥା ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିଃ (ଆର୍ଆଇଏଲ୍) ଚେୟାରମ୍ୟାନ୍ ମୁକେଶ ଅମ୍ବାନୀ ଏସିଆର ସବୁଠୁ ଧନୀ ମାନ୍ୟତା ଲାଭ କରିଛନ୍ତି।
