ଆରଡ଼ି,୨।୧୨(ଡି.ଏନ.ଏ.):ଭଦ୍ରକ ଜିଲା ଧାମନଗର ବ୍ଲକ ଅଧୀନ ପାଳସାହି ପଞ୍ଚାୟତ ଗାନ୍ଧିଘାଟ ଶାସନ ଗଁାରେ ଥିବା ସରକାରୀ ପ୍ରାଥମିକ ବିଦ୍ୟାଳୟ ନଳକୂପଟି ୨୦୦୮ରୁ ଅଦରକାରୀ ହୋଇପଡ଼ିଛି। ଏଥିରୁ ଲୁଣିପାଣି ବାହାରୁଛି। ଏହି ନଳକୂପ ପାଣି ବ୍ୟବହାର ଅନୁପଯୋଗୀ ହୋଇଛି। ବିଦ୍ୟାଳୟର ଛାତ୍ରୀଛାତ୍ରଙ୍କ ପାନୀୟ ଜଳ ଓ ମଧ୍ୟାହ୍ନଭୋଜନ ପ୍ରସ୍ତୁତ ପାଇଁ ପାଚିକା ହିଁ ସାହା ଭରସା ପାଲଟିଛନ୍ତି। ପାଚିକାଙ୍କୁ ବିଦ୍ୟାଳୟଠାରୁ ପ୍ରାୟ ୧ କି.ମି. ଦୂରରେ ଥିବା ନିଜ ଗଁା ନଳକୂପରୁ ମାଠିଆ ଓ ବାଲ୍ଟିରେ ପାଣି ବୋହି ଆଣିବାକୁ ପଡୁଛି।
ଏହି ସ୍କୁଲରେ ଏବେ ଛାତ୍ରୀଛାତ୍ରଙ୍କ ସଂଖ୍ୟା ୪୦ରୁ ଅଧିକ। ଜଣେ ପ୍ରଧାନଶିକ୍ଷୟିତ୍ରୀ ଓ ଜଣେ ଶିକ୍ଷକ ପଢ଼ାଇବା ପାଇଁ ନିଯୁକ୍ତ ଅଛନ୍ତି। ୧୪ବର୍ଷ ହେଲା ବିଦ୍ୟାଳୟ ପରିସରରେ ଥିବା ନଳକୂପରୁ ଲୁଣିପାଣି ବାହାରୁଛି। ଛାତ୍ରୀଛାତ୍ର ପାନୀୟ ଜଳ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ପାଣି ସୁବିଧା ନ ଥିବାରୁ ନିର୍ମିତ ଶୌଚାଳୟ ଅଚଳ ହୋଇପଡ଼ିଛି। ଶୌଚ ହେବା ଲାଗି ଛୋଟ ପିଲାମାନେ ନିକଟରେ ଥିବା ନଦୀକୁ ଯାଉଛନ୍ତି, ଯାହାକି ସେମାନଙ୍କ ଜୀବନ ପ୍ରତି ବିପଦ ରହିଛି। ବିଦ୍ୟାଳୟ ପ୍ରାଚୀରକୁ ଲାଗି ରହିଛି ଜଳସମ୍ପଦ ବିଭାଗ କନିଷ୍ଠଯନ୍ତ୍ରୀଙ୍କ କାର୍ଯ୍ୟାଳୟ। ସେଠାରେ ପାନୀୟ ଜଳର ସମସ୍ତ ସୁବିଧା ଥିଲେ ବି ଅନୁରୋଧ ସତ୍ତ୍ୱେ ଅଧିକାରୀ ନାସ୍ତିବାଣୀ ଶୁଣାଇଛନ୍ତି। ବିଦ୍ୟାଳୟରେ ଜଳ ସମସ୍ୟା ନେଇ ସ୍ଥାନୀୟ ଲୋକପ୍ରତିନିଧି ଓ ଶିକ୍ଷା ବିଭାଗ ଅଧିକାରୀଙ୍କୁ ବାରମ୍ବାର ଅବଗତ କରିଥିଲେ ମଧ୍ୟ କୋଣସି ସୁଫଳ ମିଳିପାରି ନ ଥିବା ଗ୍ରାମବାସୀ କହିଛନ୍ତି।
ଏ ସମ୍ପର୍କରେ ପ୍ରଧାନଶିକ୍ଷୟିତ୍ରୀ ନମିତା ପତି କହନ୍ତି, ବିଦ୍ୟାଳୟରେ ରନ୍ଧନ କାର୍ଯ୍ୟ ପାଇଁ ପାଚିକାଙ୍କ ସହ ଜଣେ ସହାୟିକା ଆବଶ୍ୟକତା ଥିଲାବେଳେ ଏଠାରେ ଜଣେ ପାଚିକା ନିୟୋଜିତ ହୋଇଛନ୍ତି। ସେ ପିଲାଙ୍କ ପାଇଁ ଖାଦ୍ୟ ପ୍ରସ୍ତୁତ କରିବା ସହ ପାଣି ବୋହି ଆଣୁଛନ୍ତି। ନୂତନ ନଳକୂପ ବସାଗଲେ ସମସ୍ୟାର ସମାଧାନ ହୋଇପାରନ୍ତା। ଧାମନଗର ଅତିରିକ୍ତ ବ୍ଲକ ଶିକ୍ଷାଧିକାରୀ ଭୀମସେନ ହୋ କହିଛନ୍ତି, ଉକ୍ତ ସ୍କୁଲ ନଳକୂପରୁ ଦୀର୍ଘବର୍ଷ ହେଲା ଲୁଣିପାଣି ବାହାରୁଛି। ସ୍ଥାନୀୟ ଲୋକପ୍ରତିନିଧି ଏଥିପ୍ରତି ଯତ୍ନଶୀଳ ହେଲେ ସମସ୍ୟାର ପ୍ରତିକାର ହୋଇପାରନ୍ତା। ତାଙ୍କ ସମୟରେ ନୂତନ ଭାବେ ଖୋଳାଯାଇଥିବା ନଳକୂପରୁ ଲୁଣିପାଣି ବାହାରିଲା। ତେବେ ନିକଟରେ ଥିବା ଇରିଗେଶନ ବିଭାଗ କାର୍ଯ୍ୟାଳୟରୁ ସପ୍ତାହେ ମଧ୍ୟରେ ସ୍କୁଲକୁ ପାଣି ଯୋଗାଇବାର ବ୍ୟବସ୍ଥା କରାଯିବ ବୋଲି ପାଳସାହି ପଞ୍ଚାୟତର ପୂର୍ବତନ ସରପଞ୍ଚ ସୁଶାନ୍ତ କୁମାର ନାୟକ କହିଛନ୍ତି।
