ଭୁବନେଶ୍ୱର,୨୨।୬ (ବ୍ୟୁରୋ): ରାଜଧାନୀ ଉପକଣ୍ଠ ୧୬ ନଂ. ଜାତୀୟ ରାଜପଥର ପାହାଳ କ୍ରସିଂ ନିକଟରୁ ୪ ମାସ ତଳେ ୧.୨୭କୋଟି ଟଙ୍କାର ବ୍ରାଉନ୍ସୁଗାର ଜବତ ମାମଲାରେ ଗିରଫ ହୋଇ ଜେଲରେ ଥିବା ଏସ୍.କେ. ଜାମ୍ସେଦଙ୍କ ସମ୍ପତ୍ତି କ୍ରାଇମବ୍ରାଞ୍ଚର ସ୍ପେଶାଲ ଟାସ୍କଫୋର୍ସ (ଏସ୍ଟିଏଫ୍) ଜବତ କରିଛି। ଜବତ ସମ୍ପତ୍ତି ମଧ୍ୟରେ ଭୁବନେଶ୍ୱର ଝାରପଡ଼ା ଅଞ୍ଚଳରେ ୧.୩୨ କୋଟି ଟଙ୍କାର ଏକ ୩ ମହଲା କୋଠା ରହିଛି। ଏହାକୁ ବାଜ୍ୟାପ୍ତି ପାଇଁ ଅର୍ଥମନ୍ତ୍ରାଳୟ ରାଜସ୍ବ ବିଭାଗର କୋଲ୍କାତାସ୍ଥିତ କମ୍ପିଟେଣ୍ଟ ଅଥରିଟିଙ୍କଠାରୁ ଏସ୍ଟିଏଫ୍ ଅନୁମତିି ଲୋଡ଼ିଥିବା ମଙ୍ଗଳବାର ପ୍ରେସ୍ ବିଜ୍ଞପ୍ତିରେ ସୂଚନା ଦେଇଛି। ନିଶା ବେପାର ଦ୍ୱାରା ଅଭିଯୁକ୍ତ ଏସ୍.କେ. ଜାମ୍ସେଦ ଏହି ବଆଇନ ସମ୍ପତ୍ତି ଠାବ କରିଛନ୍ତି। ଜାମସେଦ୍ ହେଉଛନ୍ତି ନିଶା ବେପାରୀ ଶିବ ପ୍ରସାଦ ଦାସଙ୍କ ଘନିଷ୍ଠ ସହଯୋଗୀ। ଜାମସେଦ୍ଙ୍କ ନାମରେ ଏସ୍ଟିଏଫ୍ ବ୍ୟତୀତ ଲାଲବାଗ୍ ଥାନା ଓ ବାଲିଅନ୍ତା ଥାନାରେ ମଧ୍ୟ ଗୋଟିଏ ଲେଖାଏ ନିଶା କାରବାର ଜନିତ ମାମଲା ରହିଥିବା ଏସ୍ଟିଏଫ୍ ସୂଚନା ଦେଇଛି। ସୂଚନାନୁଯାୟୀ, ଗତ ଫେବୃୟାରୀ ୨୦ ବିଳମ୍ବିତ ରାତିରେ ରାଜଧାନୀ ଉପକଣ୍ଠ ୧୬ ନଂ. ଜାତୀୟ ରାଜପଥର ପାହାଳ କ୍ରସିଂ ନିକଟରେ ଶିବୁ ଓ ଜାମ୍ସେଦ ବ୍ରାଉନ୍ସୁଗାର ନେଇ ଯାଉଥିବାବେଳେ ଏସ୍ଟିଏଫ୍ ଚଢ଼ାଉ କରିଥିଲା। ସେହି ସମୟରେ ଶିବୁ ଧରାପଡ଼ିଥିଲେ। ହେଲେ ସେଠାରୁ ଏସ୍କେ ଜାମ୍ସେଦ୍ ଖସି ପଳାଇଥିଲେ। ଶିବୁଙ୍କଠାରୁ ଗୋଟିଏ ବାଇକ୍ ସହ ୧ କେଜି ୨୨୭ ଗ୍ରାମ୍ ବ୍ରାଉନ୍ସୁଗାର ଜବତ କରାଯାଇଥିଲା। ଏସ୍ଟିଏଫ୍ ଉକ୍ତ ଘଟଣାରେ ମାମଲା(ନଂ.୫/୨୦୨୨) ରୁଜୁ କରି ଶିବୁଙ୍କୁ କୋର୍ଟଚାଲାଣ କରିଥିଲା। ଜାମ୍ସେଦ୍ଙ୍କୁ ଧରିବାକୁ ଏସ୍ଟିଏଫ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା। ଏପ୍ରିଲ ୨୨ରେ ଲକ୍ଷ୍ମୀସାଗର ଥାନା ହଳଦିପଡ଼ିଆ ବସ୍ତିସ୍ଥିତ ଘରେ ଏସ୍ଟିଏଫ୍ ଚଢ଼ାଉ କରି ଜାମ୍ସେଦ୍ଙ୍କୁ ଗିରଫ କରିଥିଲା।
