ନୂଆଦିଲ୍ଲୀ,୧।୫ (ପି.ଟି.): ବ୍ୟାଡମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ସ୍ପେନ୍ରେ ଆୟୋଜନ ହେବାକୁ ଥିବା ୨୦୨୧ ବିଶ୍ୱ ବ୍ୟାଡ୍ମିଣ୍ଟନ ଚାମ୍ପିୟନଶିପ୍କୁ ଘୁଞ୍ଚାଇବାକୁ ନିଷ୍ପତ୍ତି ନେଇଛି। ପ୍ରଥମେ ଏହି ଟୁର୍ନାମେଣ୍ଟ ୨୦୨୧ ଅଗଷ୍ଟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ବର୍ତ୍ତମାନ ଏହାକୁ ନଭେମ୍ବର- ଡିସେମ୍ବର ମାସରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି। ଟୋକିଓ ଅଲିମ୍ପିକ୍ସ କାର୍ଯ୍ୟସୂଚୀ ସହ ଏହି ଚାମ୍ପିୟନଶିପ୍ ଏକା ସମୟରେ ପଡୁଥିବାରୁ ଏପରି ନିଷ୍ପତ୍ତି ନିଆଯାଇଛି ବୋଲି ବିଡବ୍ଲ୍ୟଏଫ୍ ତରଫରୁ କୁହାଯାଇଛି। ଫଳରେ ବ୍ୟାଡମିଣ୍ଟନ ଚାମ୍ପିୟନଶିପ୍ ଏବେ ନଭେମ୍ବର ୨୯ରୁ ଆରମ୍ଭ ହୋଇ ଡିସେମ୍ବର ୫ ତାରିଖରେ ଶେଷ ହେବ ବୋଲି ବିଡବ୍ଲ୍ୟୁଏଫ୍ କହିଛି। ପ୍ରତିବର୍ଷ ଏହି ଟୁର୍ନାମେଣ୍ଟ ଆୟୋଜନ ହେଉଥିଲେ ମଧ୍ୟ ଅଲିମ୍ପିକ୍ ବର୍ଷରେ ଏହା ଖେଳାଯାଇ ନ ଥାଏ।
ଟୋକିଓ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଥିବାରୁ ଏପରି ସମସ୍ୟା ଉପୁଜିଥିଲା। ୨୦୨୦ ଟୋକିଓ ଅଲିମ୍ପିକ ପ୍ରଥମେ ଜୁଲାଇ ୨୩ରୁ ୮ଅଗଷ୍ଟ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ଏହି ମେଗା ଇଭେଣ୍ଟ ଏବେ ୨୦୨୧ ଅଗଷ୍ଟ ୨୪ ଓ ସେପ୍ଟେମ୍ବର ୫ ମଧ୍ୟରେ ଆୟୋଜନ ହେବ। ବ୍ୟାଡ୍ମିଣ୍ଟନର ବୃହତ୍ତର ସ୍ବାର୍ଥକୁ ଦୃଷ୍ଟିରେ ରଖି ଏପରି ନିଷ୍ପତ୍ତି ନିଆଯାଇଛି ବୋଲି ବିଡବ୍ଲ୍ୟୁଏଫ୍ ଅଧ୍ୟକ୍ଷ ପାଉଲ ଏରିକ ହୋୟେର କହିଛନ୍ତି। ଏହା ଦ୍ୱାରା ଅଲିମ୍ପିକ୍ସର ବ୍ୟାଡମିଣ୍ଟନ ପ୍ରତିଯୋଗିତା ଓ ବିଶ୍ୱ ଚାମ୍ପିୟନଶିପ୍ ଆହୁରି ସଫଳ ହେବ ବୋଲି ସେ କହିଛନ୍ତି।
ଉଲ୍ଲେଖଥାଉ କି, ପି.ଭି. ସିନ୍ଧୁ ସୁଇଜରଲାଣ୍ଡରେ ଅନୁଷ୍ଠିତ ଗତ ସଂସ୍କରଣରେ ଟାଇଟଲ ହାସଲ କରିଥିଲେ ଓ ସେ ଏହାକୁ ବଜାୟ ରଖିବା ପାଇଁ ସୁଯୋଗ ପାଇବେ। ସେହିପରି ବି ସାଇ ପ୍ରଣୀତ ବ୍ରୋଞ୍ଜ ପଦକ ଜିତିଥିଲେ। ୩୬ ବର୍ଷ ପରେ ସେ ପ୍ରଥମ ଭାରତୀୟ ଖେଳାଳିଭାବେ ବିଶ୍ୱଚାମ୍ପିୟନଶିପ୍ ପଦକ ହାସଲ କରି ଇତିହାସ ସୃଷ୍ଟି କରିଥିଲେ।
