ନୂଆଦିଲ୍ଲୀ,୭ା୬:ସପ୍ତଦଶ ଲୋକ ସଭାକୁ ୩୬ ରାଜନୈତିକ ଦଳର ପ୍ରତିନିଧି ନିର୍ବାଚିତ ହୋଇ ଆସିଥିବାବେଳେ ୧୫ଟି ଦଳ ‘ନୋଟା’(ନନ୍ ଅଫ୍ ଦ ଆବଭ୍) ଠାରୁ କମ୍ ସଂଖ୍ୟକ ଭୋଟ ପାଇଥିବା ଜଣାପଡ଼ିଛି। ଏହି ଦଳଗୁଡ଼ିକ ମଧ୍ୟରୁ ଅନେକ ନାମକୁ ମାତ୍ର ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଥିବା ପ୍ରକାଶ। ୨୦୧୪ରେ ‘ନୋଟା’ ପ୍ରଚଳନ କରାଯାଇଥିବାବେଳେ ଏହା ନିର୍ବାଚନ ମଣ୍ଡଳୀରେ ପ୍ରାର୍ଥୀଙ୍କ ଅଣସ୍ବୀକୃତିକୁ ଦର୍ଶାଇଥାଏ। ଚଳିତ ସାଧାରଣ ନିର୍ବାଚନରେ ମୋଟ ୧.୦୬ ପ୍ରତିଶତ ଭୋଟ ‘ନୋଟା’ ସପକ୍ଷରେ ଯାଇଛି। ୨୦୧୪ ନିର୍ବାଚନରେ ଏହା ୧.୦୮ ପ୍ରତିଶତ ଥିଲା।
ରାମବିଳାଶ ପାଶ୍ୱାନ୍ଙ୍କ ଲୋକ ଜନଶକ୍ତି ପାର୍ଟି(ଏଲ୍ଜେପି) ବିହାରର ୬ଟି ଲୋକ ସଭା ଆସନରେ ବିଜୟୀ ହୋଇଥିବାବେଳେ ଦଳକୁ ମିଳିଛି ମାତ୍ର ୦.୫୨ ପ୍ରତିଶତ ଭୋଟ। ସେହିଭଳି କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ(ସିପିଆଇଏମ୍), ଜମ୍ମୁ-କଶ୍ମୀରର ନ୍ୟାଶନାଲ୍ କନ୍ଫରେନ୍ସ(ଏନ୍ସି) ଓ ଇଣ୍ଡିଆନ୍ ୟୁନିୟନ ମୁସ୍ଲିମ୍ ଲିଗ୍(ଆଇୟୁଏମ୍ଏଲ୍) ପ୍ରତ୍ୟେକ ଦଳକୁ ଗୋଟିଏ ଲେଖାଏ ଆସନ ମିଳିଛି। ଏହି ଦଳଗୁଡ଼ିକର ଭୋଟ ହାର ଯଥାକ୍ରମେ ୦.୦୧ ପ୍ରତିଶତ, ୦.୦୫ ପ୍ରତିଶତ ଓ ୦.୨୬ ପ୍ରତିଶତ ରହିଛ, ଯାହାକି ‘ନୋଟା’ଠାରୁ ଯଥେଷ୍ଟ କମ୍। ଶିରୋମଣି ଅକାଳୀ ଦଳ(ଏସ୍ଏଡି), ଅଲ୍ ଇଣ୍ଡିଆ ମଜ୍ଲିସ୍ ଇ- ଇତ୍ତେହାଦୁଲ୍ ମୁସ୍ଲିମିନ୍(ଏଆଇଏମ୍ଆଇଏମ୍), କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ(ସିପିଆଇ) ଓ ଆପ୍ନା ଦଳ ପ୍ରତ୍ୟେକ ଦୁଇଟି ଲେଖାଏ ଆସନ ଜିତିଥିବାବେଳେ ଏହି ଦଳଗୁଡ଼ିକୁ ମୋଟ ଭୋଟର ୧ ପ୍ରତିଶତରୁ କମ୍ ଭୋଟ ମିଳିଛି। ସର୍ବାଧିକ ୭ଟି ରାଜନୈତିକ ଦଳ ଗୋଟିଏ ଲେଖାଏ ଆସନ ଜିତିଥିବାବେଳେ ପ୍ରତ୍ୟେକ ଦଳ ୧ ପ୍ରତିଶତରୁ ଅଧିକ ଭୋଟ ପାଇବାକୁ ସମର୍ଥ ହୋଇ ନ ଥିବା ଜଣାପଡ଼ିଛି।
ଝାଡ଼ଖଣ୍ଡ ଷ୍ଟୁଡେଣ୍ଟ୍ସ ୟୁନିୟନକୁ ୦.୧୧ ପ୍ରତିଶତ, ରିଭୋଲୁଶନାରି ସୋସିଆଲିଷ୍ଟ ପାର୍ଟିକୁ ୦.୧୨ ପ୍ରତିଶତ ମିଳିଥିବାବେଳେ ୫ ରାଜନୈତିକ ଦଳକୁ ଏହାଠାରୁ କମ୍ ଭୋଟ ମିଳିଥିବା ପ୍ରକାଶ। କେରଳ କଂଗ୍ରେସ(ମଣି)କୁ ମୋଟ ଭୋଟର ୦.୦୦୭ ପ୍ରତିଶତ, ମିଜୋ ନ୍ୟାଶନାଲ ଫ୍ରଣ୍ଟକୁ ୦.୦୦୪ ଭୋଟ ଓ ନାଗା ପିପୁଲ୍ସ୍ ଫ୍ରଣ୍ଟକୁ ୦.୦୬ ପ୍ରତିଶତ ଭୋଟ ମିଳିଛି। ଗୋଟିଏ ଆସନ ପାଇଥିବା ନ୍ୟାଶନାଲ୍ ଡେମୋକ୍ରାଟିକ୍ ପ୍ରୋଗ୍ରେସିଭ୍ ପାର୍ଟିକୁ ସମୁଦାୟ ଭୋଟରୁ ୦.୦୮ ପ୍ରତିଶତ ଓ ସିକ୍କିମ କ୍ରାନ୍ତିକାରୀ ମୋର୍ଚ୍ଚାକୁ ୦.୦୩ ପ୍ରତିଶତ ଭୋଟ ମିଳିପାରିଛି।
