ଭୁବନେଶ୍ୱର,୧୨ା୩(ବ୍ୟୁରୋ): କରୋନା ଭୟରେ ଏଥର ଫିକା ପଡ଼ିଥିଲା ହୋଲି। ତେବେ ଓଡ଼ିଶାରେ ଏପର୍ଯ୍ୟନ୍ତ କରୋନା ସଂକ୍ରମିତ ଚିହ୍ନଟ ହୋଇ ନ ଥିବାରୁ ଲୋକେ ଧୁମ୍ଧାମରେ ରଙ୍ଗ ପର୍ବକୁ ସ୍ବାଗତ କରିଥିବାବେଳେ ଅଧିକାଂଶ ସ୍ବାସ୍ଥ୍ୟ ବିଭାଗର ପରାମର୍ଶକୁ ମାନି ଘରୁ ବାହାରକୁ ବାହାରି ନ ଥିଲେ କି ରଙ୍ଗ ଖେଳି ନ ଥିଲେ। ସେହିଭଳି କେତେକ ସ୍ଥଳେ କରୋନା ଭୟରେ ଏଥର ଲୋକେ ହର୍ବାଲ ହୋଲି ଖେଳିଥିବା ଦେଖିବାକୁ ମିଳିଥିଲା। ଭୁବନେଶ୍ୱର ସମେତ ରାଜ୍ୟର ବିଭିନ୍ନ ସ୍ଥାନରେ ଲୋକେ ହଳଦୀ ଓ ଚାଉଳ ଗୁଣ୍ଡ ଭଳି ପ୍ରାକୃତିକ ରଙ୍ଗରେ ହୋଲି ଖେଳିଥିଲେ।
ପ୍ରତିବର୍ଷ ଭଳି ଏଥର ମଧ୍ୟ କୋଣାର୍କ ଓ ପୁରୀରେ ବିଭିନ୍ନ ଦେଶରୁ ଆସିଥିବା ପର୍ଯ୍ୟଟକ ହୋଲି ଉତ୍ସବରେ ସାମିଲ ହୋଇଥିଲେ। ଭାରତର ଏହି ନିଆରା ପରମ୍ପରା ସମ୍ପର୍କରେ ଅବଗତ ହେବାସହ ରଙ୍ଗ ଖେଳି ପର୍ବ ପାଳନ କରିଥିଲେ। ବିଶ୍ୱର ବିଭିନ୍ନ ରାଷ୍ଟ୍ରରୁ ଆସିଥିବା ଏହି ବିଦେଶୀ ପର୍ଯ୍ୟଟକମାନେ ଭାରତୀୟ ବେଶଭୂଷାରେ ସଜେଇ ହୋଇ ଅବିର ଖେଳୁଥିବା ଦେଖିବାକୁ ମିଳିଥିଲା।
ସେହିଭଳି ବିଭିନ୍ନ ରାଜନୈତିକ ଦଳର ନେତାମାନେ ରଙ୍ଗ ଖେଳି ହୋଲି ପାଳନ କରିଥିଲେ। କଂଗ୍ରେସ ଭବନରେ ପିସିସି ସଭାପତି ନିରଞ୍ଜନନ ପଟ୍ଟନାୟକ ଓ ସୁର ରାଉତରାୟ ପ୍ରମୁଖ ହୋଲି ଖେଳିବା ସହ ରାଜ୍ୟବାସୀଙ୍କୁ ହୋଲିର ଅଭିନନ୍ଦନ ଜଣାଇଥିଲେ। ସେହିଭଳି ବିଭିନ୍ନ ମନ୍ତ୍ରୀ ନେତାମାନେ ନିଜ ନିଜ ସମର୍ଥକଙ୍କ ସହ ରଙ୍ଗ ଖେଳୁଥିବା ଦେଖିବାକୁ ମିଳିଥିଲା। ଏପଟେ ହୋଲି ରଙ୍ଗରୁ କରୋନା ବ୍ୟାପିବା ଏବଂ ଚାଇନା ଆସୁଥିବା ପିଚ୍କାରୀରୁ କରୋନା ଭୂତାଣୁ ବାହାରିବା ଭଳି ସୋସିଆଲ ମିଡ଼ିଆ ର୍ୟୁମର୍ରେ ବିଶ୍ୱାସ କରି ଅନେକ ହୋଲି ଖେଳୁ ନ ଥିବା ମଧ୍ୟ ଦେଖିବାକୁ ମିଳିଥିଲା।
