ଦାରିଙ୍ଗବାଡି,୫।୬(ଡି.ଏନ.ଏ)- ଦାରିଙ୍ଗବାଡି ଅଞ୍ଚଳକୁ ଏବେ ଲିଚୁ ଏବଂ ଆମ୍ବ ଚାଷ ସ୍ବତନ୍ତ୍ର ପରିଚୟ ଦେଇଛି। ଦାରିଙ୍ଗବାଡିର ଲିଚୁ ଏବଂ ଆମ୍ବର ଚାହିଦା ଜିଲା ତଥା ଜିଲା ବାହାରେ ରହିଛି। ଜୈବିକ ପଦ୍ଧତିରେ ଏହି ଚାଷ କରାଯାଉଥିବାରୁ ଏହାର ଚାହିଦା ବଢୁଛି। ସରକାରଙ୍କ ପକ୍ଷରୁ ଉଦ୍ୟାନ ଭିତ୍ତିକ ଚାଷକୁ ଅଞ୍ଚଳରେ ଗୁରୁତ୍ୱ ଦିଆଗଲା। ଏଥିପାଇଁ କୃଷକମାନଙ୍କୁ ତାଲିମ ସହ ଚାରା ଉତ୍ପାଦନ, ଜୈବିକ ପଦ୍ଧତିରେ ଚାଷପ୍ରଣାଳୀ ଶିକ୍ଷା ଦିଆଗଲା। ପନିପରିବା ଚାଷକୁ ପ୍ରଥମେ ଗୁରୁତ୍ୱ ଦିଆଯାଇ ବନ୍ଧା, ଫୁଲ କୋବି, ବିନ୍, ଭେଣ୍ଡି, ଜହ୍ନି, ପୋଟଳ ଆଦି ଚାଷ କରିବା ପାଇଁ ଚାଷୀଙ୍କୁ ଉତ୍ସାହିତ କରାଯାଉଥିଲା। ପରେ ଉଦ୍ୟାନ ଭିତ୍ତିକ ଚାଷପ୍ରତି ଆଗ୍ରହ ବୃଦ୍ଧି ପାଇବାରୁ ଆମ୍ବ ଓ ପରେ ଲିଚୁ ଚାଷକୁ ଗୁରୁତ୍ୱ ଦିଆଗଲା। ଏଥିପାଇଁ ଚାଷୀଙ୍କୁ ଆମ୍ବ ବଗିଚା କରିବାକୁ ତାରବାଡ ସହ ଚାରା ଯୋଗାଇ ଦିଆଗଲା। ଏହାର ରକ୍ଷଣାବେକ୍ଷଣ ପାଇଁ ଆବଶ୍ୟକ ସାର, ଏବଂ ଅର୍ଥ ମଧ୍ୟ ଯୋଗାଇଦିଆଗଲା। ଅନେକ ଚାଷୀ ଆମ୍ବଚାଷ କରି ଲାଭବାନ ହେଲେ। ୨୦୧୦ରେ ପରୀକ୍ଷାମୂଳକ ଭାବେ ନାବାର୍ଡର ଆର୍ଥିକ ସହାୟତା ସହ ସ୍ଥାନୀୟ ଜାଗୃତି ସହଯୋଗରେ ଲିଚୁ ଚାଷ ପାଇଁ ଚାରା ଯୋଗାଇ ଦିଆଯାଇଥିଲା। ବ୍ଲକର ଦନେକବାଡି ପଞ୍ଚାୟତର ୨୦ ଚାଷୀଙ୍କୁ ୧୨ଟି ଲେଖାଏ ଲିଚୁ ଚାରା ଯୋଗାଇଦିଆଯାଇଥିଲା। ତେବେ ଗତ ୨ବର୍ଷ ହେଲା ଫଳ ଧରିବା ଆରମ୍ଭ କରିଥିବାବେଳେ ଚଳିତ ବର୍ଷ ଭଲ ଫଳ ଧରିଛି। ଦାରିଙ୍ଗବାଡି ଜଳବାୟୁରେ ଲିଚୁ ଚାଷ ସଫଳ ହେଉଥିବାରୁ ଚାଷୀ ଏବେ ଲିଚୁ ଓ ଆମ୍ବ ଚାଷ ପ୍ରତି ମନ ବଳାଉଛନ୍ତ। ଦାରିଙ୍ଗବାଡି ଉଦ୍ୟାନ ବିଭାଗ ମଧ୍ୟ ନିଜ କାର୍ଯ୍ୟାଳୟ ପରିସରରେ ୨ ଏକର ଜମିରେ ଏହି ଚାଷ ସଫଳତାର ସହ କରି ସେଠାରେ ଚାଷୀଙ୍କୁ ତାଲିମ ପ୍ରଦାନ କରୁଛି। ଏଭଳି ଏକ ଲାଭଜନକ ଚାଷକୁ ସରକାରୀ ସହାୟତା ଏବଂ ସରକାରଙ୍କ ତରଫରୁ ଲିଚୁ ଚାଷକୁ ଆଗେଇନେବାର ସମୟ ଆସିଛି ବୋଲି ସ୍ଥାନୀୟ କୃଷକ ଟାମିଆ ବିନ୍ଧାଣି କୁହନ୍ତି।
ସୂଚନାଯୋଗ୍ୟଯେ, ବ୍ଲ୍ଳକରେ ୨୫ ପଞ୍ଚାୟତରୁ ଗୋଟିଏ ପଞ୍ଚାୟତରେ ଏହି ଚାଷ ପରୀକ୍ଷାମୁଳକ ଭାବେ କରାଯାଇଛି। ଅନ୍ୟ ପଞ୍ଚାୟତର ଚାଷୀ ଆଗ୍ରହ ଥିବାବେଳେ ସରକାରୀ ସହାୟତାକୁ ଅପେକ୍ଷା କରିଛନ୍ତି। ଏନେଇ ବାଲିଗୁଡା ଉପଖଣ୍ଡ ଉଦ୍ୟାନ ବିଭାଗ କାର୍ଯ୍ୟାଳୟର ଅତିରିକ୍ତ ନିର୍ଦ୍ଦେଶକ ରମାକାନ୍ତ ଗିରି କୁହନ୍ତି, ଚାଷୀଙ୍କ ଚାହିଦା ପ୍ରକାରେ ଚଳିତବର୍ଷ ଅଧିକ ଲିଚୁଚାଷ କରାଯାଇଛି। ତେବେ ଦାରିଙ୍ଗବାଡି ସମେତ ତୁମୁଡିବନ୍ଧ, କୋଟଗଡ, ବାଲିଗୁଡା, କ.ନୂଆଗାଁ, ରାଇକିଆ, ଜି.ଉଦୟଗିରି, ଟିକାବାଲି ଏବଂ ଚକାପାଦ ବ୍ଲକ ଅଞ୍ଚଳରେ ୨ଶହ ହେକ୍ଟର ଜମିରେ ଲିଚୁ ଚାଷ କରାଯିବାକୁ ଲକ୍ଷ ରଖାଯାଇଥିଲା, କିନ୍ତୁ ୧୦୯ ହେକ୍ଟର ଜମିରେ ଚାଷ କରାଯାଇଛି। କେବଳ ଦାରିଙ୍ଗବାଡିରେ ପ୍ରାୟ ୩୦ ହେକ୍ଟର ଜମିରେ ଚାଷ ହୋଇଛି। ଚଳିତବର୍ଷ ସାଧାରଣ ନିର୍ବାଚନ ଥିବାରୁ ବିଭାଗର ଜି.ଉଦୟଗିରି ବ୍ଲକ କଳିଙ୍ଗା ଫାର୍ମ ସମେତ ୯ ବ୍ଲକର ଚାଷୀଙ୍କ ପ୍ରାୟ ୧୦ଲକ୍ଷ ଟଙ୍କାର ଲିଚୁ ବିକ୍ରିରେ ବିଳମ୍ବ ହୋଇଛି, ଖୁବଶୀଘ୍ର ନିଲାମ ଡକାଯାଇ ଏହାକୁ ବିକ୍ରି କରାଯିବ।
