ପର୍ଲା, ୨୪।୧ (ଡି.ଏନ୍.ଏ.): କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲ ଛଞ୍ଚାଣବାହାଲି ପଁଚେତ୍ ବେହେରାଗୁଡ଼ାର କୁଷ୍ଠ ରୋଗ୍ରେ ପୀଡ଼ିତ ସୁବାସ ଦୋରୁଆନ(୫୦)କଁର ଦିନାକେତେ ତଲେ ମୁର୍ତୁ ହେଇଥିଲା। ଏନ୍ତାଥି ବିଧବା ବୁଢ଼ୀ ମା’ଟଁକା ପଏସା ଅଭାବୁ ପୁଓର ଶୁଧିକାଯ୍ ଲାଗି ନିଜର ରାଶନ କାର୍ଡ ବଁଧା ପକେଇଥିଲେ। ଇ ଘଟନା ଗଣମାଧ୍ୟମରେ ପରଚାରିତ ହେଲା ଉତାରୁ ଭିନେ ଭିନେ ସ୍ବେଚ୍ଛାସେବୀ ସଂଗଠନ ଇ ଦୁଖି ପରିବାରକେ ସାହାଯ୍ର ହାତ୍ ବଢ଼େଇଛନ୍।
ସୂଚନା ଅନ୍ସାରେ ବେହେରାଗୁଡ଼ା ଗଁାର ସୁଲୋଚନା ଦୋରୁଆନ ପୁଓବହ, ନାତିନାତେନକୁଁ ନେଇ ଖୁସିରେ ଥିଲେ। ପୁଓ ବି ଦୁଖ୍ସୁଖ୍ କରି ଦୁଇପଏସା ରୁଜଗାର କରୁଥିଲେ। ହେଲେ ଆଏଜ୍କେ ୪ ବଛର ତଲେ ସେ କୁଷ୍ଠ ରୋଗ୍ରେ ଆକ୍ରଁାତ ଥିବାର ଜାନ୍ବାକେ ପାଇଥିଲେ। ଅନେକ ଚିକିଛା କଲା ଉତାରୁ ବି ସେ ସବୁବେଲେ ମାନ୍ସିକ୍ ଚାପରେ ରହୁଥିଲେ। ଏନ୍ତା ପରିସ୍ଥିତିରେ ଗଲା ୧୭ ତାରିଖ ସୁବାସ ଆରପାରକେ ଚାଲିଗଲେ। ସୁବାସ କୁଷ୍ଠ ରୋଗ୍ରେ ପୀଡ଼ିତ ଥିବାର ଘଟନାକେ ନେଇ ଜାତିଭାଇ ସେ ମଲା ଉତାରୁ ବି କେହି ଖଁଦ୍ ନାଇଁଦେଲେ। ଇଆଡ଼େ ଜାତିଭାଇ, ସମାଜ ପରିବାରକେ ଅଜେତ୍ କରିଥିଲା। ଜାଏତ୍ ହେବାର ଲାଗି ସମାଜ ଲୋକ୍ ଭୁଜିଭାତ ସଂଗେ ଛେଲ୍ମେଢ଼ି ମାଗିଥିଲେ। ଏନ୍ତାଥି ଉପେ ଶୂଇନ୍ ସୁବାସକଁର ମା’ ସୁଲୋଚନା ନିଜର ରାଶନ କାର୍ଡ ପଡ଼ିଶାଘରେ ବଁଧା ପକେଇଥିଲେ। ଇ ବାବ୍ଦେ ଗୁରୁବାର ଧରିତ୍ରୀ ସମ୍ବଲପୁର ସଂସ୍କରଣରେ ‘ପୁଓର ଶୁଧିକାଯ୍ ଲାଗି ବଁଧା ପଡ଼ଲା ରାଶନକର୍ଡ’ ଶୀରଷକ୍ରେ ଖବର ବାହାରିଥିଲା। ଖବର ବାହାରଲା ଉତାରୁ ଧର୍ମଗଡ଼ର ସ୍ବେଚ୍ଛାସେବୀ ସଂଗଠନ ଜଗନ୍ନାଥ ସେବା ସମିତିର ସଦସିଅମାନେ ବେହେରାଗୁଡ଼ାରେ ପୁହୁଁଚି ସୁଲୋଚନାକୁଁ ଆଶାସନା ଦେବାର ସଂଗେ ଦଶା କାଯ୍ ଲାଗି ଚାଉଲ, ଡାଲି, ତେଲନୁନ୍ ଆର କିଛି ଟଁକା ପଏସା ସାହାଯ୍ ଦେଇଛନ୍। ସେନ୍ତା ମୂଲ ନିବାସୀ ଯୁବ ଫେଡେରେଶନ ତରଫୁ ସୁବାସକଁର ଝି’ପୁଓର ଲାଗି କୁରତା, ପେଁଟ୍, ସୁଲୋଚନାକଁର ଲାଗି ଶାଢ଼ି, ଚାଉଲ ଆର କିଛି ଟଁକା ପଏସା ସାହାଯ୍ ଦେଇଛନ୍। କଳାହାଣ୍ଡି ଜିଲା କୃଷକ ସଂଘର ଆବାହକ ଦିଗାମ୍ବର ଦୁରିଆ, ଧର୍ମଗଡ଼ ଅଂଚଲର ଖବରଦାତାମାନେ ବି ଇ ଅସାହା ପରିବାରକେ କିଛି ଟଁକା ପଏସା ସାହାଯ୍ ଦେଇଥିବାର ଜନାଯାଇଛେ। ସୁଲୋଚନା ଲୁକ୍କରନୁ ସାହାଯ୍ ପାଏଲା ଉତାରୁ ବଁଧା ପକେଇଥିବାର ରାଶନକାର୍ଡ ମୁକ୍ଲେଇଥିବାର କହିଛନ୍। ହେଲେ ଏନ୍ତା ଗୁଟେ ଦୁଖଦ୍ ଘଟନାରେ ଜିଲା ଆର ଥାନୀଅ ପରଶାସନ ଚୁପ୍ ମାରି ବସି ରହିବାର ଘଟନାକେ ଭିନେ ଭିନେ ସଂଗଠନ, ବୁଧିଜୀବୀ ଆର ଅଂଚଲବାସୀ ନିନ୍ଦା କରିଛନ୍।
