ଭୁବନେଶ୍ୱର,୧୭।୫(ବ୍ୟୁରୋ) – ବିଶିଷ୍ଟ ଲେଖିକା ଡା. ମଣିଦୀପା ପଟ୍ଟନାୟକ(୪୮)ଙ୍କ ସନ୍ଦେହଜନକ ଭାବେ ମୃତ୍ୟୁ ଘଟିଛି। ସେ ରହୁଥିବା ପୁରୁଣା ଭୁବନେଶ୍ୱରର ଲିଙ୍କରାଜ ନଗରସ୍ଥିତ ବସେରା ଆପାର୍ଟମେଣ୍ଟରୁ ତାଙ୍କ ଗଳିତ ମୃତଦେହକୁ ଲିଙ୍ଗରାଜ ଥାନା ପୋଲିସ କବାଟ ଭାଙ୍ଗି ଗୁରୁବାର ଉଦ୍ଧାର କରିଛି। ୪ ଦିନରୁ ଊର୍ଦ୍ଧ୍ୱ ହେବ ତାଙ୍କର ମୃତ୍ୟୁ ଘଟିଥିବା ଅନୁମାନ କରାଯାଉଛି। ପୋଲିସ ମୃତଦେହ ବ୍ୟବଚ୍ଛେଦ ନିମନ୍ତେ କ୍ୟାପିଟାଲ ହସ୍ପିଟାଲକୁ ପଠାଇ ତଦନ୍ତ ଆରମ୍ଭ କରିଛି। ଏନେଇ ଥାନାରେ ୬/୧୯ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ମଣିଦୀପାଙ୍କର କିଭଳି ମୃତ୍ୟୁ ଘଟିଲା ତାହାକୁ ନେଇ ଏବେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରାଥମିକ ତଦନ୍ତରୁ ତାଙ୍କୁ ହତ୍ୟା କରାଯାଇଛି ନା ସେ ଆତ୍ମହତ୍ୟା କରିଛନ୍ତି ତାହାର କିଛି ବି ସୁରାକ ପାଇପାରିନି ପୋଲିସ। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁ ରହସ୍ୟ ପଦାକୁ ଆସିବ ବୋଲି ପୋଲିସ କହୁଛି।
ଉଚ୍ଚଶିକ୍ଷିତା ମଣିଦୀପା ଜଣେ ପରିଚିତ ଲେଖିକା। ତାଙ୍କର ଅନେକ କାବ୍ୟ ଓ କବିତା ବେଶ୍ ପାଠକୀୟ ଆଦୃତିଲାଭ କରିଛି। ମିଳିଥିବା ସୂଚନାନୁସାରେ, ପାରିବାରିକ ବିବାଦକୁ ନେଇ ମଣିଦୀପା ୫ବର୍ଷ ହେବ ସ୍ବାମୀଠାରୁ ଅଲଗା ରହୁଥିଲେ। ତାଙ୍କର ଗୋଟିଏ ପୁଅ ଦିଲ୍ଲୀରେ ରହୁଥିବାବେଳେ ମଣିଦୀପା ଭୁବନେଶ୍ୱରରେ ଏକୁଟିଆ ରହୁଥିଲେ। ସେ ପ୍ରାୟତଃ ଏକାକୀ ରହିବାକୁ ଭଲ ପାଉଥିଲେ। ଲେଖିକା ହୋଇଥିବାରୁ ଘର ଭିତରେ ଏକାଏକା ଲେଖାଲେଖି କରୁଥିବା ଭାବି ପଡୋଶୀ ତାଙ୍କ ନିକଟକୁ ଯାଆନ୍ତି ନାହିଁ। ବାତ୍ୟା ଫନୀ ପରେ ରାଜଧାନୀରେ ମୋବାଇଲ୍ ନେଟ୍ଓ୍ବର୍କ ଫେଲ୍ ହୋଇଯିବାଠାରୁ ତାଙ୍କ ସହ ପୁଅଙ୍କର ଯୋଗାଯୋଗ ହୋଇପାରି ନ ଥିଲା। ତେବେ ନେଟ୍ଓ୍ବର୍କ ଆସିବା ପରେ ପୁଅ ତାଙ୍କ ମୋବାଇଲ୍ ଫୋନ୍କୁ ବାରମ୍ବାର କଲ୍ କରୁଥିଲେ ମଧ୍ୟ ସେ ଉଠାଉ ନ ଥିଲେ। ସନ୍ଦେହ ହେବାରୁ ପୁଅ ତାଙ୍କ ଅଜାଙ୍କୁ ଫୋନ୍ କରି ଜଣାଇ ଦେଖି ଆସିବାକୁ କହିଥିଲେ। ଗୁରୁବାର ମଣିଦୀପାଙ୍କ ବାପା ଉକ୍ତ ଆପାର୍ଟମେଣ୍ଟକୁ ଯାଇ କବାଟ ଭିତରପଟୁ ବନ୍ଦଥିବା ଓ କେହି ନ ଖୋଲିବାରୁ ତୁରନ୍ତ ପୋଲିସକୁ ଜଣାଇଥିଲେ। ପୋଲିସ ପହଞ୍ଚତ୍ ତାଲା ଭାଙ୍ଗି ଭିତରକୁ ପଶିଥିଲେ। ମଣିଦୀପାଙ୍କ ମୃତଦେହ ଏକ କୋଠରିର ବେଡ୍ ଉପରେ ତଳମୁହଁା ହୋଇ ପଡିରହିଥିଲା। ମୃତଦେହଟି ଫୁଲି ଯାଇଥିବାବେଳେ ପୋକ ସାଲୁବାଲୁ ହେଉଥିଲେ। ମୃତଦେହ ନିକଟରେ ଏକ ଡବାରେ ଚୂନ ଭଳି ଦିଶୁଥିବା କିଛି ପଦାର୍ଥ ପଡ଼ିଥିଲା। କିନ୍ତୁ ମୃତଦେହରେ କୌଣସି କ୍ଷତଚିହ୍ନ ନ ଥିଲା। ପାରିପାର୍ଶ୍ୱିକ ସ୍ଥିତିରୁ ମଣିଦୀପା ଆତ୍ମହତ୍ୟା କରିଥାଇପାରନ୍ତି କିମ୍ବା ତାଙ୍କର ହୃଦ୍ଘାତରୁ ମୃତ୍ୟୁ ଘଟିଥାଇପାରେ ବୋଲି ପୋଲିସ ଅନୁମାନ କରୁଛି। ମାତ୍ର ତାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ଅଭିଯୋଗ ଉଠୁଥିବାରୁ ଏହାକୁ ଗୁରୁତ୍ୱର ସହ ନେଇ ପୋଲିସ ତଦନ୍ତକୁ ଆଗକୁ ବଢ଼ାଇଛି।
