ସୋନପୁର,୧୩।୪(ନି.ପ୍ର.):କରୋନା ଭୂତାଣୁ ସଂକ୍ରମଣକୁ ପ୍ରତିହତ କରିବା ପାଇଁ ସାରା ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଜରୁରୀ କାମ ନଥିଲେ ଘରୁ ନ ବାହାରିବା ପାଇଁ ପରାମର୍ଶ ଦିଆଯାଇଛି। ହେଲେ ସୁବର୍ଣ୍ଣପୁର ଜିଲାରେ କେତେକ ଲୋକ ଏହି କଟକଣାକୁ ମାନୁନାହାନ୍ତି। ବାହାରେ ବୁଲାବୁଲି କରୁଛନ୍ତି। ସହରଠାରୁ ଗାଁରେ ଆଇନର ଅଧିକ ଉଲ୍ଲଂଘନ ହେଉଛି। ଏଭଳି ସ୍ଥିତିରେ ଏସ୍ପି ଦେବୀପ୍ରସାଦ ଦାଶଙ୍କ ନେତୃତ୍ୱରେ ପୋଲିସ ଟିମ୍ ସୋମବାର ସନ୍ଧ୍ୟାରେ ଜିଲା ସଦର ମହକୁମାରେ ଫ୍ଲାଗମାର୍ଚ୍ଚ କରିଛି। ଜରୁରୀ କାମ ନ ଥିଲେ ଘରୁ ବାହାରନ୍ତୁ ନାହିଁ। ଅତ୍ୟାବଶ୍ୟକ ସାମଗ୍ରୀ କିଣିବା ସମୟରେ ସାମାଜିକ ଦୂରତ୍ୱ ବଜାୟ ରଖନ୍ତୁ, ମାସ୍କ ପିନ୍ଧନ୍ତୁ ବୋଲି ଜିଲା ପୋଲିସ ପକ୍ଷରୁ ଲୋକଙ୍କୁ ସଚେତନ କରାଯାଇଥିଲା। ସୋନପୁର ଥାନା ସମ୍ମୁଖରୁ ଏହି ଶୋଭାଯାତ୍ରା ବାହାରି ବସ୍ଷ୍ଟାଣ୍ଡ, ନଳୀନି ଛକ, ସରେଶ୍ୱରୀ ମନ୍ଦିର ରୋଡ, ଥନାପତିପଡା, ବଡବଜାର ପରିକ୍ରମା କରିଥିଲା। ଅତିରିକ୍ତ ଆରକ୍ଷୀ ଅଧିକ୍ଷକ ରମେଶ ଚନ୍ଦ୍ର ପାଣିଗ୍ରାହୀ, ଆନ୍ଥୋନୀ ତିର୍କୀ, ଡିଏସପି ଆନନ୍ଦ ବର୍ଦ୍ଧନ ଗୁରୁ, ଏସ୍ଡିପିଓ ମିହିର କୁମାର ପଣ୍ଡା, ସୋନପୁର ତହସିଲଦାର ଅରବିନ୍ଦ ବେହେରା, ରିଜର୍ଭ ଇନିସ୍ପେକ୍ଟର ଅମରେନ୍ଦ୍ର ପାଣିଗ୍ରାହୀ, ସର୍ଜେଣ୍ଟ ବିଶ୍ୱନାଥ ଜେନା, ସୋନପୁର ଆଇଆଇସି ଲୋକେଶ କୁମାର ସାହୁ ପ୍ରମୁଖ ସାମିଲ ହୋଇଥିଲେ।
