ନୂଆଦିଲ୍ଲୀ,୧୫।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ବଡ ଭାଇ ବୋଲି ସମ୍ମାନ କରିବା ସହ ପ୍ରତିବର୍ଷ ରାଖୀ ବାନ୍ଧୁଥିବା ପାକିସ୍ତାନୀ ଭଉଣୀ କ୍ୱାମର ମୋହସିନ୍ ଶେଖ୍ ଗୁରୁବାର ରାଖୀ ପୂର୍ଣ୍ଣିମା ଅବସରରେ ଚଳିତ ବର୍ଷ ମୋଦିଙ୍କ ହାତରେ ରାଖୀ ବାନ୍ଧିଛନ୍ତି। କେବଳ ସେତିକି ନୁହେଁ ତାଙ୍କ ସ୍ବାମୀଙ୍କ ହାତ ତିଆରି ଏକ ପେଣ୍ଟିଂ ମଧ୍ୟ ସେ ମୋଦିଙ୍କୁ ଉପହାର ଦେଇଛନ୍ତି। ରାଖୀ ପିନ୍ଧାଇବା ପରେ ୭ ଲୋକ କଲ୍ୟାଣ ମାର୍ଗରୁ ବାହାରିବା ବେଳେ ସେ ଖବରଦାତାଙ୍କୁ କହିଛନ୍ତି ଗତବର୍ଷ ରାଖୀ ପିନ୍ଧାଇ ସେ ମୋଦିଙ୍କ ସଫଳତା କାମନା କରିଥିବା ବେଳେ ଗତ ୫ ବର୍ଷ ତାଙ୍କ ପାଇଁ ଭଲରେ କଟିଛି। ସେମିତି ଚଳିତ ବର୍ଷ ସେ ମୋଦିଙ୍କ ଉତ୍ତମ ସ୍ବାସ୍ଥ୍ୟ କାମନା କରିଥିବା କହିଛନ୍ତି।
ସୂଚନାଯୋଗ୍ୟ, ପାକିସ୍ତାନ ବାସିନ୍ଦା କ୍ୱାମର ମୋହସିନ ଗୁଜରାଟ ଅହମ୍ମଦାବାଦର ଜଣେ ଚିତ୍ରଶିଳ୍ପୀଙ୍କୁ ବିବାହ କରିବା ପରଠାରୁ ସେ ଭାରତରେ ରହୁଛନ୍ତି। ଆଉ ମୋଦି ଆର୍ଏସ୍ଏସ୍ର ସଦସ୍ୟ ଥିବା ବେଳେ କ୍ୱାମର ମୋହସିନ ତାଙ୍କୁ ଦିଲ୍ଲୀରେ ସାକ୍ଷାତ୍ କରିଥିଲେ। ଏହାପରେ କିଛି ବର୍ଷ ହେବ ସେ ମୋଦିଙ୍କ ହାତରେ ରାଖୀ ବାନ୍ଧିବାର ସୁଯୋଗ ପାଇଥିବାରୁ ନିଜକୁ ଧନ୍ୟ ମନେକରନ୍ତି ବୋଲି କୁହନ୍ତି।
