କୋକସରା, ୨୭।୧୨ (ଡି.ଏନ.ଏ)- କଳାହାଣ୍ଡି ଜିଲା କୋକସରା ବ୍ଲକ ମୋଟେର ଗ୍ରାମର ଶାନ୍ତିନଗର ପଡାରେ ରହୁଥିବା ଶିକ୍ଷକ ଯଯାତି ପାଟଯୋଷୀଙ୍କ ବାସଭବନରେ ଶୁକ୍ରବାର ବିଳମ୍ବିତ ରାତ୍ରିରେ ବଡ଼ ଧରଣର ଡକାୟତି ହୋଇଛି । ପ୍ରାୟ ୫ ରୁ ୭ ଜଣ ମୁଖାପିନ୍ଧା ଡକାୟତ ମୁଖ୍ୟ କବାଟ ଭାଙ୍ଗି ଘରେ ପଶି ଯଯାତି ପାଟଯୋଷୀ ତାଙ୍କ ସ୍ତ୍ରୀ କନକଲତା ପାଟଯୋଶୀ ଓ ଦୁଇ ପୁଅଙ୍କୁ ବନ୍ଧୁକ ମୁନରେ ଭୟଭୀତ କରି ଘରେ ଲୁଟ କରିଛନ୍ତି । ପରିବାର କହିବା ଅନୁସାରେ ଘରେ ଥିବା ପ୍ରାୟ ୪୦ ଭରି ସୁନା ଗହଣା ସହ ନଗଦ କିଛି ଟଙ୍କା, ଏକ ବୁଲେଟ ବାଇକ ଓ ଘରେ ଲାଗିଥିବା ସ୍ମାର୍ଟ ଟିଭି, ୨ଟି ମୋବାଇଲକୁ ନେଇ ଡକାୟତମାନେ ଘରେ ସମସ୍ତଙ୍କୁ ଏକ କୋଠରୀରେ ବନ୍ଦ କରି ଚମ୍ପଟ ମାରିଥିଲେ । ଲୁଟ ହୋଇଥିବା ସୁନାଗହଣାର ଆନୁମାନିକ ମୂଲ୍ୟ ୨୪ ଲକ୍ଷରୁ ଊର୍ଦ୍ଧ୍ୱ ହେବ ବୋଳି ଜଣାପଡିଛି । ଡକାୟତମାନେ ହିନ୍ଦୀ ଓ କଟକି ଭାଷାରେ କଥା ହେଉଥିବା କହିଛନ୍ତି ପରିବାର ଲୋକେ । ପରେ କୌଣସି ମତେ କବାଟକୁ ଭାଙ୍ଗି ଘର ଲୋକେ ପାଖ ପଡୋଶୀଙ୍କୁ କହିବା ସହ ମୋଟେର ଫାଣ୍ଡି ଓ କୋକସରା ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚତ୍ ଘଟଣାସ୍ଥଳରେ ଛାନଭିନ୍ ଆରମ୍ଭ କରିଥିବା ବେଳେ ଧର୍ମଗଡ ଉପଖଣ୍ଡ ପୋଲିସ ଅଧିକାରୀ ନାରାୟଣ ନାୟକ ମଧ୍ୟ ଘଟଣାର ଅନୁଧ୍ୟାନ କରି ତଦନ୍ତ ଜାରି ରଖିଛନ୍ତି ।
