କୋଣାର୍କ, ୮ା୧୨(ଡି.ଏନ୍.ଏ.)
ଗୁଜରାଟର ରଣ ଉତ୍ସବ ଢାଞ୍ଚାରେ ପ୍ରଥମ ଥର ପାଇଁ କୋଣାର୍କର ଚନ୍ଦ୍ରଭାଗା ସାହୁଖଣତା ବେଳାମାର୍ଗଠାରେ ଆସନ୍ତା ୧୪ରୁ ଆୟୋଜନ ହେବ ମେରାଇନ ଡ୍ରାଇଭ ଇକୋ ରିଟ୍ରିଟ୍। ଏଥିପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚତ୍ଛି। ଶନିବାର ପୂର୍ବାହ୍ନରେ ପର୍ଯ୍ୟଟନ ବିଭାଗ ସଚିବ ବିଶାଲ କୁମାର ଦେବ ଉତ୍ସବ ଆୟୋଜନ ହେଉଥିବା କ୍ଷେତ୍ର ପରିଦର୍ଶନ କରିବା ସହ କାର୍ଯ୍ୟଗୁଡ଼ିକର ସମୀକ୍ଷା କରିଥିଲେ।
ପ୍ରାକୃତିକ ପରିବେଶ ଓ ସୌନ୍ଦର୍ଯ୍ୟଭରା ବେଳାଭୂମି କୂଳରେ ଆୟୋଜିତ ହେବାକୁ ଥିବା ଏହି ଉତ୍ସବ ନିମନ୍ତେ ୫୦ଗୋଟି ଟେଣ୍ଟ ନିର୍ମାଣ କାର୍ଯ୍ୟ ଶେଷ ହୋଇଥିବାବେଳେ ବିଦ୍ୟୁତ୍, ପାନୀୟ ଜଳ, ପରିମଳ ଓ ରାସ୍ତା କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ସଚିବ ବିଭିନ୍ନ ବିଭାଗର ଅଧିକାରୀଙ୍କ ସହ ଆଲୋଚନାକରି ୧୦ତାରିଖ ସୁଦ୍ଧା ସମସ୍ତ କାର୍ଯ୍ୟ ଶେଷକରି ପର୍ଯ୍ୟଟନ ବିଭାଗକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଥିଲେ। ୧୦୦ରୁ ଊର୍ଦ୍ଧ୍ୱ ପର୍ଯ୍ୟଟକ ବେଳାଭୂମିରେ ନିର୍ମିତ ତମ୍ବୁରେ ରହିବା ପାଇଁ ଅଗ୍ରିମ ଟିକେଟ କରିଛନ୍ତି। ଏହାର ପ୍ରଚାର ପ୍ରସାର ପାଇଁ ବିଭାଗ ପକ୍ଷରୁ ଜୋର୍ଦାର ଉଦ୍ୟମ କରାଯାଉଥିବା ସଚିବ ଗସ୍ତ ଅବସରରେ କହିଛନ୍ତି। ଏହି ଉତ୍ସବ ଆୟୋଜନ ଫଳରେ ପର୍ଯ୍ୟଟନ ଶିଳ୍ପର ଅଭିବୃଦ୍ଧି ହେବା ସହ କୋଣାର୍କକୁ ସବୁଦିନିଆ ପର୍ଯ୍ୟଟନ ସହରରେ ପରିଣତ କରାଯିବ। ଉତ୍ସବର ଅବଧି ଏକମାସ ଥିବାବେଳେ ଏହାକୁ ଆଉ ୧୫ଦିନ ବୃଦ୍ଧି କରାଯାଇଥିବା ସଚିବ କହିଛନ୍ତି। ଏହି ଗସ୍ତ ସମୟରେ ପର୍ଯ୍ୟଟନ ବିଭାଗର ବରିଷ୍ଠ ଅଧିକାରୀ ରତିକାନ୍ତ ପଟ୍ଟନାୟକ, କୋଣାର୍କ ପର୍ଯ୍ୟଟନ ଅଧିକାରୀ ସରୋଜକାନ୍ତ ପ୍ରଧାନ, ପର୍ଯ୍ୟଟନ ବିଭାଗର ପ୍ରକଳ୍ପ ତଦାରଖ ଅଧିକାରୀ ମିତ୍ରଭାନୁ ଚୌଧୁରୀ ଓ ନହର ମହମ୍ମଦ ପ୍ରମୁଖ ଉପସ୍ଥିତ ଥିଲେ।
