ସର୍ବଭାରତୀୟ ମେଡିକାଲ ପ୍ରବେଶିକା ପାଇଁ ଉଦ୍ଦିଷ୍ଟ ଜାତୀୟ ଯୋଗ୍ୟତା ତଥା ପ୍ରବେଶିକା ପରୀକ୍ଷା (ଏନ୍ଇଇଟି) ୨୦୧୯ର ଫଳ ବୁଧବାର ପ୍ରକାଶ ପାଇଛି । ଏଥିରେ ବଲାଙ୍ଗୀର ୟୁବୋଦୟ କଲେଜ ଛାତ୍ର ଆଶୁତୋଷ ପଣ୍ଡା ସମୁଦାୟ ୭୨୦ରୁ ୬୮୨ ମାର୍କ ରଖି ଓଡ଼ିଶା ଟପ୍ପର ହୋଇଛନ୍ତି । ସର୍ବଭାରତୀୟ ସ୍ତରରେ ଆଶୁତୋଷଙ୍କ ର଼୍ୟାଙ୍କ୍ ୭୩ ରହିଛି । ଏହି ଅବସରରେ ତାଙ୍କୁ ଭେଟିଥିଲେ ଧରିତ୍ରୀ ଖବରଦାତା । ତାଙ୍କ ପ୍ରତିକ୍ରିୟାକୁ ନେଇ ଏକ ସ୍ବତନ୍ତ୍ର ଉପସ୍ଥାପନା…
ଓଡ଼ିଶା ଟପ୍ପର ହେବେ ବୋଲି ଭାବିଥିଲେ ?
-ନିଟ୍ ପରୀକ୍ଷାରେ ଭଲ କରିବି ଓ ଭଲ ର଼୍ୟାଙ୍କ୍ ପାଇବି ବୋଲି ଆଶା ଥିଲା। କିନ୍ତୁ ଓଡ଼ିଶା ଟପ୍ପର ହେବି ବୋଲି ଆଶା ମୋର ନ ଥିଲା। ଏଭଳି ସଫଳତା ପାଇବା ପରେ ମୋତେ ଖୁସି ଲାଗୁଛି।
ପରୀକ୍ଷା ପାଇଁ କି ଭଳି ପ୍ରସ୍ତୁତି କରିଥିଲେ?
-ଯୁକ୍ତ୨ ପଢ଼ିବା ଦିନଠାରୁ ଡାକ୍ତରୀ ପଢ଼ିବା ପାଇଁ ଲକ୍ଷ୍ୟ ରଖିଥିଲି। ସେଥିପାଇଁ ପ୍ରସ୍ତୁତି ଆରମ୍ଭ କରିଥିଲି। ପ୍ରତିଦିନ ମୁଁ ୮ରୁ ୯ ଘଣ୍ଟା ପଢୁଥିଲି। ଯୁକ୍ତ୨ ପରୀକ୍ଷାରେ ମୁଁ ୯୦ ପ୍ରତିଶତ ମାର୍କ ରଖି ପାସ୍ କଲାପରେ ଭୁବନେଶ୍ୱର ୟୁବୋଦୟ ଆଡ଼ଭାନ୍ସ କ୍ଳାସେସ୍ରେ ଗୋଟିଏ ବର୍ଷ କୋଚିଂ ନେଇଥିଲି। ସକାଳ ୮ଟାରୁ କୋଚିଂ କ୍ଳାସ୍କୁ ଯାଇ ମୁଁ ରାତି ୯ଟାରେ ଫେରୁଥିଲି। ସର୍ବଭାରତୀୟ ସ୍ତରରେ ଭଲ ର଼୍ୟାଙ୍କ୍ରେ ପାସ୍ କରିବା ମୋର ଏକମାତ୍ର ଲକ୍ଷ୍ୟ ଥିଲା।
ବଲାଙ୍ଗୀରରୁ ଓଡ଼ିଶା ଟପ୍ପର କେତେ କଷ୍ଟକର ଥିଲା?
-ପ୍ରତି ପରୀକ୍ଷା ପାଇଁ ଉଚିତ୍ ପ୍ରସ୍ତୁତି କରିବାକୁ ପଡ଼ିଥାଏ। ମେଡିକାଲ ପ୍ରବେଶିକା ପରୀକ୍ଷାରେ ସଫଳତା ପାଇବା ପାଇଁ ମୁଁ କଠିନ ପରିଶ୍ରମ କରିଥିଲି। ସେଥିପାଇଁ ସବୁଦିନ ରୁଟିନ୍ ତିଆରି କରି ପାଠ ପଢ଼ିବା ଆରମ୍ଭ କରିଥିଲି ।
ଏହି ସଫଳତାର ଶ୍ରେୟ କାହାକୁ ଦେବେ ?
-ସଫଳତାର ଶ୍ରେୟ ମୋର ମୁଁ ମୋ ମା’ ବାପାଙ୍କୁ ଦେବି। ମୋର ଭଉଣୀ ଓ ପରିବାରବର୍ଗଙ୍କ ସହଯୋଗ ଯୋଗୁ ମୁଁ ସଫଳତା ପାଇଛି । ମୋ ବାପା ରାଜକିଶୋର ପଣ୍ଡା ଜଣେ ପ୍ରତିଷ୍ଠିତ ମେଡିସିନ୍ ରିଜିଓନାଲ୍ ସେଲ୍ସ ମ୍ୟାନେଜର ଓ ମା’ସୁଷମା ପାଢ଼ୀ ଜଣେ ଆଇସିଡିଏସ୍ ସୁପରଭାଇଜର। ମୁଁ ଡାକ୍ତର ହୁଏ ବୋଲି ସେମାନେ ସ୍ବପ୍ନ ଦେଖିଥିଲେ। ମା’ବାପାଙ୍କ ସ୍ବପ୍ନ ଓ ମୋର ନିଜସ୍ବ ଲକ୍ଷ୍ୟ ହାସଲ କରିଥିବାରୁ ମୁଁ ଆଜି ଖୁବ୍ ଖୁୁସି।
ଆଗକୁ କ’ଣ ଲକ୍ଷ୍ୟ ରଖିଛନ୍ତି ?
-ଡାକ୍ତରୀ ପାଠ ପଢ଼ିବାର ଲକ୍ଷ୍ୟ ରହିଛି। ରୋଗୀଙ୍କ ପାଖରେ ଭଲ ଡାକ୍ତରଟିଏ ହୋଇ ସେବା କରିବି। ମେଡିକାଲ ସାଇନ୍ସରେ ଅଧିକ ରିସର୍ଚ୍ଚ କରି କିଭଳି ଅଧିକ ସଫଳତା ପାଇବି ତା’ମୋର ପ୍ରଥମ କାମ ହେବ ।
ଆପଣଙ୍କ ହବି କ’ଣ?
-ବ୍ୟାଡ଼ମିଣ୍ଟନ, ଫୁଟବଲ ଖେଳିବା, ଭିଡିଓ ଗେମ୍ ସହିତ ସିନେମା ଦେଖିବା ମୋର ପସନ୍ଦ। ପାଠ ପଢ଼ାରୁ ସମୟ ମିଳିଲେ ମୁଁ ଖେଳିବା ସହ ସିନେମା ଦେଖେ।
ଉପସ୍ଥାପନା: ବୀରେନ୍ଦ୍ର କୁମାର ଝାଙ୍କର
