ଲଣ୍ଡନ,୧୭।୬: କରୋନା ମହାମାରୀ ବା କୋଭିଡ୍-୧୯ଜନିତ ସଂକ୍ରମଣ ସାରା ବିଶ୍ୱରେ ବଢ଼ିବାରେ ଲାଗିଛି। ଏପରି କି ମୃତ୍ୟୁ ସଂଖ୍ୟା ମଧ୍ୟ ଦିନକୁ ଦିନ ବୃଦ୍ଧି ପାଉଛି। ଏବେ ସୁଦ୍ଧା ସାରା ବିଶ୍ୱରେ କରୋନା ମହାମାରୀ ଯୋଗୁ ୪ଲକ୍ଷ ୩୧ହଜାରରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଲାଣି। ଏହି ରୋଗ ପାଇଁ କୌଣସି ନିର୍ଦ୍ଦିଷ୍ଟ ଔଷଧ ନ ଥିବାରୁ ବିଭିନ୍ନ ଦେଶ ଏଥିପାଇଁ ଜୋରସୋର ଉଦ୍ୟମ ଚଳାଇଛନ୍ତି। ଏହିକ୍ରମରେ ମଙ୍ଗଳବାର ବ୍ରିଟେନର ‘ରିକଭରି’ ନାମକ କ୍ଲିନିକର ଗବେଷକମାନେ ପରୀକ୍ଷାମୂଳକଭାବେ ଏକ ଔଷଧର ବ୍ୟବହାର ସମ୍ପର୍କରେ ସୂଚନା ଦେଇଛନ୍ତି। ଗବେଷକଙ୍କ ମତରେ ମଣିଷ ଶରୀରରେ ଦିଆଯାଉଥିବା ‘ଡେକ୍ସାମେଥାସୋନ’ ନାମକ ଷ୍ଟେରଏଡର ସ୍ବଳ୍ପ ଡୋଜ୍ କରୋନା ସଂକ୍ରମିତଙ୍କ ଠାରେ ଭଲ କାମ କରୁଛି। କୋଭିଡ-୧୯ରେ ଗୁରୁତର ଭାବେ ସଂକ୍ରମିତ ହୋଇ ଭେଣ୍ଟିଲେଟର ଏବଂ ଅକ୍ସିଜେନରେ ରହି ଚିକିତ୍ସିତ ହେଉଥିବା କେତେକ ସଂକ୍ରମିତଙ୍କଠାରେ ଡେକ୍ସାମେଥାସୋନ୍ ଷ୍ଟେରଏଡ ପରୀକ୍ଷାମୂଳକଭାବେ ପ୍ରୟୋଗ କରାଯାଇଥିଲା। ଏଥିରୁ ଜାଣିବାକୁ ମିଳିଥିଲା ଯେ, ଏହି ଷ୍ଟେରଏଡ ବ୍ୟବହାର କରାଯାଉଥିବା ସଂକ୍ରମିତଙ୍କ ମୃତ୍ୟୁ ହାର ଅନ୍ୟମାନଙ୍କଠାରୁ କମ୍। ପ୍ରତି ୩ଜଣ ଗୁରୁତର ସଂକ୍ରମିତଙ୍କ ମଧ୍ୟରେ ଜଣେ ସୁସ୍ଥ ହୋଇପାରୁଛନ୍ତି। ଏହି ଷ୍ଟେରଏଡ ଜୀବନ ବଞ୍ଚାଇଦେବ। ଏପରି କି ଏହାର ମୂଲ୍ୟ ମଧ୍ୟ ବହୁତ କମ୍ ବୋଲି ଗବେଷଣାର ସଦସ୍ୟ ତଥା ଅକ୍ସଫୋଡ ବିଶ୍ୱବିଦ୍ୟାଳୟର ପ୍ରଫେସର ମାର୍ଟିନ ଲାଣ୍ଡ୍ରେ କହିଛନ୍ତି। ଅନ୍ୟତମ ସଦସ୍ୟ ତଥା ପରୀକ୍ଷକ ପିଟର ହର୍ବେଙ୍କ କହିବାହେଲା ଡେକ୍ସାମେଥାସୋନ ଏପରି ଏକ ଷ୍ଟେରଏଡ ଯାହାକୁ ଅନ୍ୟ ରୋଗର ସଂକ୍ରମଣ ହ୍ରାସ କରିବାରେ ବହୁଳ ଭାବେ ବ୍ୟବହାର କରାଯାଇଥାଏ। ତେଣୁ କରୋନା ସଂକ୍ରମିତଙ୍କ ଠାରେ ଏହାକୁ ବ୍ୟବହାର କରାଗଲେ ଏହା ମୃତ୍ୟୁହାରକୁ ଯଥେଷ୍ଟ ପରିମାଣରେ କମାଇବ ବୋଲି ପିଟର କହିଛନ୍ତି।
