ଦାରିଙ୍ଗବାଡ଼ି,୨୯।୬(ଡି.ଏନ୍.ଏ.)- ମିଳିଲାନି ମହାପ୍ରୟାଣ ଗାଡ଼ି। ଖଟିଆରେ ବୁହାହେଲେ ରୋଗୀଙ୍କ ମୃତଦେହ। ଏଭଳି ଏକ ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ। ଏଠାରେ ଶୁକ୍ରବାର ଚିକିତ୍ସାଧୀନ ଅବସ୍ଥାରେ ଜଣେ ରୋଗୀଙ୍କ ମୃତ୍ୟୁ ଘଟିଥିଲା। ସେ ହେଲେ ଶ୍ରାନିକେତା ଅଞ୍ଚଳର କିରଣ ପ୍ରଧାନ। ତେବେ ମୃତ୍ୟୁ ପରେ ମହାପ୍ରୟାଣ ଗାଡ଼ି ନ ମିଳିବାରୁ ତାଙ୍କୁ ପରିବାର ଲୋକେ ପ୍ରାୟ ୩ କିମି ଦୂର ନିଜ ଗ୍ରାମକୁ ଖଟରେ ବୋହି ନେଇଥିଲେ। ଏହି ଘଟଣା ଲୋକଲୋଚନକୁ ଆସିବା ପରେ ଏ ନେଇ ଜିଲା ସ୍ବାସ୍ଥ୍ୟ ଅଧିକାରୀଙ୍କ ନିକଟରେ ଅଭିଯୋଗ ହୋଇଥିଲା। ଏହି ଘଟଣାରେ କନ୍ଧମାଳ ଜିଲା ସ୍ବାସ୍ଥ୍ୟାଧିକାରୀ ସମିର କୁମାର ଦାସ ସେଦିନ ଡ୍ୟୁଟିରେ ଥିବା ୱାର୍ଡ଼ ଆଟେଣ୍ଡାଣ୍ଟ ନିରାକାର ବେହେରାଙ୍କୁ ଶନିବାର ସସ୍ପଣ୍ଡ କରିଛନ୍ତି। ସେହିପରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଇନ୍ଚାର୍ଜ ଡାକ୍ତର ଜୟପାଲ ସେନାପତି ଏବଂ ଡ୍ୟୁଟିରେ ରହିଥିବା ଦୁଇଜଣ ଡାକ୍ତରଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।
ଏନେଇ ସେନାପତି କହିଛନ୍ତି, ରୋଗୀଙ୍କ ଘର ଦାରିଙ୍ଗବାଡ଼ିଠାରୁ ମାତ୍ର ୩ କିମି ଦୂରରେ। ଦାରିଙ୍ଗବାଡ଼ିରେ ମହାପ୍ରୟାଣ ଯୋଜନାରେ ଗାଡ଼ି ନ ଥିବାରୁ ଆଟେଣ୍ଡାଣ୍ଟ ନିରାକାର ମୃତ କିରଣଙ୍କ ବାପା ଝାଙ୍କେଶ୍ୱର ପ୍ରଧାନଙ୍କୁ ବାଲିଗୁଡ଼ାରୁ ମହାପ୍ରୟାଣ ଗାଡ଼ି ଡକାଯାଇଛି ବୋଲି କହିଥିଲେ। ଦାରିଙ୍ଗବାଡ଼ିଠାରୁ ବାଲିଗୁଡ଼ାର ଦୂରତା ୫୦ କିମି ହୋଇଥିବାରୁ ଗାଡ଼ି ଆସିବା ବିଳମ୍ବ ହେବ। ଏଣୁ ଆମେ ନିଜ ସୁବିଧା କରି ନେଇଯିବୁ ବୋଲି କହିବା ସହ ଲିଖିତ ଭାବେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଇନ୍ଚାର୍ଜଙ୍କୁ ଜଣାଇ କିରଣଙ୍କ ମୃତଦେହକୁ ଖଟିଆରେ ବୋହି ନେଇଥିଲେ। କୌଣସି ମନ୍ଦ ଉଦ୍ଦେଶ୍ୟ କି ସରକାରଙ୍କୁ ବଦନାମ କରିବା ଉଦ୍ଦେଶ୍ୟରେ ନୁହେଁ ବରଂ ବିଳମ୍ବ ଯୋଗୁ ରୋଗୀଙ୍କୁ ନେଉଥିବା ସେ ଲିଖିତ ଭାବେ ଦେଇଥିବା ଆବେଦନ ପତ୍ରରେ ଉଲ୍ଲେଖ କରିଥିବା ଇନ୍ଚାର୍ଜ ସେନାପତିଙ୍କୁ ଜଣାଇଥିବା କହିଛନ୍ତି।
ସୂଚନାଯୋଗ୍ୟ, ଦାରିଙ୍ଗବାଡ଼ି ବ୍ଲକରେ ଗୋଟିଏ ସ୍ବେଚ୍ଛାସେବୀ ଅନୁଷ୍ଠାନ ଦ୍ୱାରା ମହାପ୍ରୟାଣ ଯୋଜନାରେ ଗାଡ଼ି ରହିଥିଲା। କିଛି ଦିନ ଦାରିଙ୍ଗବାଡ଼ିରେ ରହିବା ପରେ ଗାଡ଼ିଟିକୁ ଅନ୍ୟତ୍ର ନିଆଯାଇଛି। ଫଳରେ ଅଞ୍ଚଳରେ କାହାର ମୃତ୍ୟୁ ହେଲେ ମୃତଦେହ ନେବା ପାଇଁ ବାଲିଗୁଡ଼ା କିମ୍ବା ଅନ୍ୟ ସ୍ଥାନରୁ ମହାପ୍ରୟାଣ ଗାଡ଼ି ଅଣାଯାଉଛି। ଫଳରେ ଲୋକେ ବହୁ ଖର୍ଚ୍ଚାନ୍ତ ହେଉଛନ୍ତି। କିଛି ଗରିବ ଲୋକ ବାଧ୍ୟ ହୋଇ ଖଟିଆ କିମ୍ବା କାନ୍ଧରେ ମଧ୍ୟ ମୃତଦେହ ବୋହିନେବା ନଜିର ରହିଛି। ଜିଲା ପ୍ରଶାସନ ଦାରିଙ୍ଗବାଡ଼ି ଏବଂ ବ୍ରାହ୍ମଣୀଗାଁ ପାଇଁ ଏକ ମହାପ୍ରୟାଣ ଗାଡ଼ି ଶୀଘ୍ର ଯୋଗାଇଦେବା ଆବଶ୍ୟକ ବୋଲି ସାମାଜିକ କର୍ମୀ ସୁରେଶ ବଳିଆରସିଂ କହିଛନ୍ତି।
