କାମାକ୍ଷାନଗର, ୧ା୨ – ବଢୁଛି ମିଠା ମକା (ସୁଇଟ୍ କର୍ନ)ର ଆଦର। ପୌଷ୍ଟିକତତ୍ତ୍ୱରେ ଭରପୂର ହୋଇଥିବାରୁ ଏହା ପାଲଟିଛି ସମସ୍ତଙ୍କ ପସନ୍ଦ। ସାଧାରଣ ମକା ଚାଷଠାରୁ ଅଧିକ ଖର୍ଚ୍ଚ ହେଉଥିଲେ ହେଁ ଚାହିଦା ଥିବାରୁ ସୁଇଟକର୍ନ ଉପରେ ବେଶି ଫୋକସ୍ କରୁଛନ୍ତି ଚାଷୀ। କାମାକ୍ଷାନଗର ବ୍ଲକ ଆଲୁଅଝରଣ ପାଲଟିଛି ଢେଙ୍କାନାଳ ଜିଲା ସୁଇଟ୍କର୍ନ ହବ୍। ଅଞ୍ଚଳର ଶତାଧିକ ଚାଷୀଙ୍କୁ ଉପାର୍ଜନକ୍ଷମ କରାଇଛି ଏହି ଚାଷ। ସେମାନେ ପାଲଟିଛନ୍ତି ଅନ୍ୟମାନଙ୍କ ପାଇଁ ଉଦାହରଣ। ହେଲେ ଆବଶ୍ୟକ ଜ୍ଞାନ କୌଶଳ, ବଜାର ଅଭାବ ସାଙ୍ଗକୁ ହାତୀ ଉପଦ୍ରବରେ ସତେଯେମିତି ପିତା ହୋଇଯାଉଛି ମିଠାମକା ଚାଷୀଙ୍କ ମନ।
ମକା ଚାଷ ପାଇଁ ଢେଙ୍କାନାଳ ଜିଲାରେ ସ୍ବତନ୍ତ୍ର ପରିଚୟ ସୃଷ୍ଟି କରିଛି କାମାକ୍ଷାନଗର। ଆଲୁଅଝରଣ, କଦଳୀପାଳ, ସୋଗର, ମରିଚାକଣ ଏବଂ ବିଜାଡ଼ିହ ଅଞ୍ଚଳର ଚାଷୀ ୭ବର୍ଷ ହେବ ମକା ଚାଷ କରି ବେଶ୍ ଦୁଇପଇସା ରୋଜଗାର କରୁଛନ୍ତି। ଆନ୍ଧ୍ରପ୍ରଦେଶ ଭଳି ପାରମ୍ପରିକ ଚାଷଠାରୁ ଦୂରେଇ ରହି ଦୁଇବର୍ଷ ହେଲା ସୁଇଟ୍କନର୍ର୍ରେ ସେମାନେ ପରଖୁଛନ୍ତି ନିଜର ଭାଗ୍ୟ।
ପ୍ରଥମେ ଆଲୁଅଝରଣ ଅଞ୍ଚଳରେ ଆରମ୍ଭ ହୋଇଥିଲା ସୁଇଟ୍କର୍ନ। ଧୀରେ ଧୀରେ ଏହାକୁ ଅନୁକରଣ କରିଥିଲେ ଅନ୍ୟମାନେ। ତେବେ ପ୍ରସ୍ତାବିତ ଓଟିପିସିଏଲ୍ ପ୍ରକଳ୍ପ ଲାଗି ଜମି ଅଧିଗ୍ରହଣ ପରେ କଦଳୀପାଳ, ମରିଚାକଣ ଅଞ୍ଚଳରେ ମକାଚାଷ ପ୍ରଭାବିତ ହୋଇଛି। ଆଲୁଝରଣ, ବିଜାଡ଼ିହ ଗ୍ରାମରେ ୩୦୦ ଏକର ଜମିରେ ବର୍ଷତମାମ ମକାଚାଷ ହେଉଥିବାବେଳେ ସିଂହଭାଗ ଚାଷୀ ଉତ୍ପାଦନ କରୁଛନ୍ତି ମିଠା ମକା।
ଚାଷୀଙ୍କ କହିବା କଥା, ଉଭୟ ଖରିଫ୍ ଏବଂ ରବି ଋତୁରେ ମକାଚାଷ ହେଉଛି। ଖରିଫ୍ ମକାଚାଷ ସେପ୍ଟେମ୍ବରରେ ଅମଳ ହୋଇଥାଏ। ସେହିପରି ନଭେମ୍ବରରୁ ଆରମ୍ଭ ହେଉଥିବା ରବିମକା ଜାନୁୟାରୀ ବେଳକୁ ଅମଳକ୍ଷମ ହୁଏ। ଖରାଦିନେ ସାଧାରଣ ମକା ଚାଷ କରାଯାଉଥିବାବେଳେ ସୁଇଟ୍କର୍ନ ପାଇଁ ଶୀତଦିନ ବେଶ୍ ଅନୁକୂଳ ସାବ୍ୟସ୍ତ ହୋଇଛି। ଉଭୟ ମକା ଚାଷ ପ୍ରଣାଳୀ ପ୍ରାୟ ସମାନ। ମିଠା ମକାର ମଞ୍ଜି ସାଧାରଣ ମକା ମଞ୍ଜି ଦରଠାରୁ ୧୦ଗୁଣା ବେଶି। ଗୋଟିଏ ଏକର ଜମିରେ ୩ରୁ ୪ କେଜି ମଞ୍ଜି ଆବଶ୍ୟକ। ସେହିପରି ଖତସାର ଏବଂ ଶ୍ରମିକଙ୍କ ମଜୁରି ବାବଦକୁ ହାରାହାରି ଖର୍ଚ୍ଚ ୧୦ ହଜାର ଯାଏ ପଡୁଛି। ମିଠା ମକା ଚାଷ ପାଇଁ ହାରାହାରି ୨୫ ହଜାର ଟଙ୍କା ଯାଏ ଖର୍ଚ୍ଚ ହେଉଥିବାବେଳେ ଚାଷୀ ୪୦ରୁ ୪୫ହଜାର ଟଙ୍କା ଲାଭ ପାଇଥାନ୍ତି। ହେଲେ ସାଧାରଣ ମକାରେ ଲାଭ ୧୫ରୁ ୨୦ ହଜାର ଟଙ୍କା ମଧ୍ୟରେ ସୀମିତ।
ଯଦିଓ ମକାଚାଷ ଲାଗି ଚାଷୀଙ୍କ ଭିତରେ ଆଗ୍ରହ ରହିଛି, ତେବେ ଫସଲ ଅମଳ ପରେ ବିକିବା ପାଇଁ ସ୍ବତନ୍ତ୍ର ବଜାର ସୁବିଧା ନାହିଁ। ଚାଷୀଙ୍କୁ ଅସହାୟ ଅବସ୍ଥାରେ ଢେଙ୍କାନାଳ-କାମାକ୍ଷାନଗର ରାସ୍ତା ପାର୍ଶ୍ୱରେ ବସି ମକା ବିକିବାକୁ ପଡୁଛି। ସ୍ଥଳବିଶେଷରେ କଟକ, ରାଉରକେଲା, ସମ୍ବଲପୁର, ଭୁବନେଶ୍ୱରରୁ ବେପାରୀ ଆସି ମକା ଖରିଦ କରିଥାନ୍ତି। ତେଣୁ ଲାଭ କମିଯାଉଛି। ଅଧିକ ଜ୍ଞାନ କୌଶଳ ଏବଂ ବଜାର ସୁବିଧା ମିଳିଲେ କାମାକ୍ଷାନଗରର ମିଠାମକାର ସ୍ବାଦ ସାରା ରାଜ୍ୟବାସୀ ପାଇପାରିବେ ବୋଲି ଅଞ୍ଚଳର ଚାଷୀ ମତ ଦେଇଛନ୍ତି।
