ବଡସାହି,୧୩ା୧୧(ସ୍ବ.ପ୍ର)- ଉତ୍ତର ଓଡ଼ିଶାର ପ୍ରସିଦ୍ଧ ଶୈବପୀଠ ବଡ଼ସାହି ବ୍ଲକ ମାଣତ୍ରୀସ୍ଥିତ ବାବା କଖାରୁଆ ବୈଦ୍ୟନାଥଙ୍କ ପୀଠରେ ମଙ୍ଗଳବାର କାର୍ତ୍ତିକ ପୂର୍ଣ୍ଣିମା ଅବସରରେ ସହସ୍ରାଧିକ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହୋଇଛି ା ପଞ୍ଚକ ୫ଦିନ ଧରି କଖାରୁଆ ମହାଦେବଙ୍କ ଜ୍ୟୋର୍ତିଲିଙ୍ଗରେ ଶ୍ରୀଜଗନ୍ନାଥଙ୍କ ଅତିପ୍ରିୟ ତୁଳସୀର ମଞ୍ଜରୀ(ଜଟା) ସହିତ ବେଲପତ୍ର ଚଢା ହୋଇଥିଲା। ତେବେ ଶିବ ଲିଙ୍ଗରେ ବେଲପତ୍ର ପ୍ରତିବଦଳରେ ତୁଳସୀର ଜଟା ଲାଗି ହେବା ସ୍ବତନ୍ତ୍ରତା ଥିବାରୁ ଭକ୍ତଙ୍କ ଗହଳି ଲାଗିଥିଲା ା ପଞ୍ଚକ ସମୟରେ ଭାଗବତ ମତ ଅନୁଯାୟୀ ହରି ଓ ହରଙ୍କ ମିଳନ ହୋଇଥାଏ ା ଏଣୁ ହରିଙ୍କର ଅତିପ୍ରିୟ ତୁଳସୀ ଓ ହରଙ୍କ ଅତିପ୍ରିୟ ବେଲପତ୍ର ଲାଗି ହୋଇଥାଏ। ବହୁ ଦୂରଦୂରାନ୍ତରୁ ଆସିଥିବା ଶ୍ରଦ୍ଧାଳୁମାନେ ମଙ୍ଗଳବାର ବଡିଭୋରରୁ ଉଠି ମନ୍ଦିର ସନ୍ନିକଟ କୁଣ୍ଡିରେ ବୁଡ ପକାଇ ବୋଇତ ଭସାଇଥିଲେ। ପରେ ମହାଦେବଙ୍କୁ ପୂଜାପାଠ,ଦର୍ଶନ କରିବା ସହିତ ବେଢା ପରିକ୍ରମା କରିଥିଲେ। ମହାମୃତ୍ୟୁଞ୍ଜୟ ମନ୍ତ୍ର ଉଚ୍ଚାରଣ ସହିତ ଭଜନ ସଂକୀର୍ତ୍ତନରେ ପରିବେଶ ଭକ୍ତିମୟ ହୋଇପଡିଥିଲା। ସନ୍ଧ୍ୟାରେ ମହାଦେବଙ୍କ ସୁନାବେଶ ଦେଖିବା ପାଇଁ ପ୍ରବଳ ଭିଡ ପରିଲକ୍ଷିତ ହୋଇଥିଲା। ବର୍ଷ ବର୍ଷ ଧରି ଭକ୍ତଙ୍କ ଭିଡକୁ ଦେଖି ଉଠା ଦୋକାନୀଙ୍କ ପସରା ଦିନକୁ ଦିନ ବଢିବାରେ ଲାଗିଛି ା ଘରକରଣା ଜିନିଷ ଠାରୁ ଆରମ୍ଭ କରି ବିଭିନ୍ନ ସ୍ବାଦର ଖାଦ୍ୟ ପରିବେଷଣ କରୁଥିବା ଦୋକନୀଙ୍କ ଠାରେ ଦିନତମାମ ଭିଡ ଲାଗିଥିଲା। ତେବେ ପୂର୍ବାହ୍ନ ୯ଟାରୁ ୧୧ଟା ପର୍ଯ୍ୟନ୍ତ ଟ୍ରାଫିକ ନିୟନ୍ତ୍ରଣ ଅଭାବ ପାଇଁ ସଂଯୋଗକାରୀ ରାସ୍ତା ଭିଡ଼ ଅପ୍ରୀତିକର ପରିସ୍ଥିତି ସୃଷ୍ଟି କରିଥିଲା ା ବିକେବି ଯୁବକ ସଂଘ ସଭାପତି ଓ ବଣିକ ସଂଘ କର୍ମକର୍ତ୍ତା ପରିସ୍ଥିତି ନିୟନ୍ତ୍ରଣ କରିଥିଲେ ା ସେହିପରି ଦେଉଳିଆ, ପ୍ରତାପପୁର, ସିଂହଟିଆ ଜଗନ୍ନାଥ ମନ୍ଦିର, ରାଧାକୃଷ୍ଣ ମନ୍ଦିର, ନୀଳକଣ୍ଠେଶ୍ୱର ମନ୍ଦିର ଓ ଶାଳଗାଁର ଗୋକୁଳ ଚନ୍ଦ୍ର ରାୟ ମହାପ୍ରଭୁଙ୍କ ମନ୍ଦିରମାନଙ୍କରେ ମଧ୍ୟ ଭକ୍ତଙ୍କ ସମାଗମ ହୋଇଥିଲା ା ବ୍ଲକରେ ପ୍ରବାହିତ ଗଙ୍ଗାହାର ଓ ବୁଢ଼ାବଳଙ୍ଗ ନଦୀ ଓ ଜଳାଶୟମାନଙ୍କରେ ପ୍ରତ୍ୟୁଷରେ ବୋଇତ ଭସାଣ ସାଙ୍ଗକୁ ଆତସବାଜି ପ୍ରଦର୍ଶନ ଦେଖିବାକୁ ମିଳିଥିଲା। ଶାନ୍ତିଶୃଙ୍ଖଳା ରକ୍ଷା କରିବା ପାଇଁ ବୈଶିଙ୍ଗା ପୋଲିସ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଥିଲା।
