ମହାକାଳପଡ଼ା, ୧୬/୧୧ (ପ୍ରତାପ ଚନ୍ଦ୍ର ସ୍ୱାଇଁ): ଗଣତନ୍ତ୍ରର ସୁରକ୍ଷା ଓ ରାଷ୍ଟ୍ର ଗଠନରେ ଚତୁର୍ଥ ସ୍ତମ୍ଭର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଗଣତନ୍ତ୍ର ଓ ଚତୁର୍ଥ ସ୍ତମ୍ଭ ମୁଦ୍ରାର ଦୁଇଟି ପାର୍ଶ୍ୱ ସଦୃଶ। ଜାତୀୟ ପ୍ରେସ୍ ଦିବସ ଅବସରରେ କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକ୍ ଅନ୍ତର୍ଗତ କିଆରବାଙ୍କସ୍ଥିତ ପଞ୍ଚାୟତ ଉଚ୍ଚ ବିଦ୍ୟାଳୟର ସଭାଗୃହରେ ମହାକାଳପଡ଼ା ପ୍ରେସ୍ କ୍ଲବ୍ ପକ୍ଷରୁ ନବମ ବାର୍ଷିକ ଜାତୀୟ ପ୍ରେସ୍ ଦିବସ ପାଳିତ ହୋଇଯାଇଛି।
ଏହି ଅବସରରେ ମୁଖ୍ୟ ଅତିଥି ଭାବେ ତହସିଲଦାର ରବି ନାରାୟଣ ଆଚାର୍ଯ୍ୟ ଓ ବିଡିଓ ମନୋଜ କୁମାର ନାୟକ ଯୋଗଦେଇ ଅଗ୍ରପୂଜ୍ୟ ଗଜାନନଙ୍କ ପ୍ରତିମୂର୍ତ୍ତିରେ ଦୀପ ପ୍ରଜ୍ଜ୍ୱଳନ ଓ ପୁଷ୍ପମାଲ୍ୟ ଅର୍ପଣ କରି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ପରେ ଛାତ୍ରୀମାନେ ଜାତୀୟ ସଙ୍ଗୀତ ଗାନ କରିଥିଲେ।
ସମାଜରେ ଗଣତନ୍ତ୍ରକୁ ଆଲୋକିତ କରିବାରେ ଚତୁର୍ଥ ସ୍ତମ୍ଭ ତଥା ଖବରଦାତାଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତୃଣମୂଳ ସ୍ତରରେ ପତ୍ରକାରମାନେ ନିଷ୍ଠା, ଧୈର୍ଯ୍ୟ, ନିର୍ଭୀକତା, ସ୍ୱଚ୍ଛତା ଓ ସାହସର ସହିତ ନିଜ ଜୀବନକୁ ବାଜି ଲଗାଇ ଖବର ପରିବେଷଣ କରି ସମାଜ ପାଇଁ ଉଦାହରଣ ସୃଷ୍ଟି କରିଛନ୍ତି। ବନ୍ୟା, ବାତ୍ୟା, ମରୁଡ଼ି, ଭୂକମ୍ପ ଓ ଅନ୍ୟାନ୍ୟ ଦୁର୍ବିପାକ ସମୟରେ ବହୁ ବାଧାବିଘ୍ନର ସମ୍ମୁଖୀନ ହୋଇ ଖବରଦାତାମାନେ ନିରପେକ୍ଷ ଓ ବାସ୍ତବ ଖବର ଲୋକଙ୍କ ନିକଟରେ ପହଞ୍ଚାଇଥାନ୍ତି ବୋଲି ଉପସ୍ଥିତ ଅତିଥିମାନେ ମତବ୍ୟକ୍ତ କରିଥିଲେ।
ଏହି ଅବସରରେ ପତ୍ରକାରମାନଙ୍କ ବିଭିନ୍ନ ସମସ୍ୟା ଅତିଥିମାନଙ୍କ ଦୃଷ୍ଟିକୁ ଅଣାଯାଇଥିଲା। ସେସବୁର ସମାଧାନ ପାଇଁ ଆବଶ୍ୟକ ପଦକ୍ଷେପ ନେବାକୁ ଅତିଥିମାନେ ପ୍ରତିଶ୍ରୁତି ଦେଇଥିଲେ।
ପ୍ରେସ୍ କ୍ଲବ୍ ସଭାପତି ଅରକ୍ଷିତ ନାଥଙ୍କ ସଭାପତିତ୍ୱରେ ଆୟୋଜିତ ସଭାରେ ସମ୍ପାଦକ ଅଶୋକ କୁମାର ସ୍ୱାଇଁ ପ୍ରେସ୍ ଦିବସ ସମ୍ପର୍କିତ ବିବରଣୀ ପାଠ କରିଥିଲେ। ଅନ୍ୟମାନଙ୍କ ମଧ୍ୟରେ ବିଦ୍ୟାଳୟର ଭାରପ୍ରାପ୍ତ ପ୍ରଧାନଶିକ୍ଷୟିତ୍ରୀ କବିତା ବେହେରା ଏବଂ ବରିଷ୍ଠ ଶିକ୍ଷକ ପ୍ରଫୁଲ୍ଲ ପ୍ରଧାନ, ବିଜୟ କୁମାର ନାଥ, ରମେଶ ଚନ୍ଦ୍ର ସାହାଣୀ ଓ ଅମୀୟ ଚୌଧୁରୀ ପ୍ରମୁଖ ଜାତୀୟ ପ୍ରେସ୍ ଦିବସର ମହତ୍ତ୍ୱ ସମ୍ପର୍କରେ ଆଲୋକପାତ କରିଥିଲେ।
ଉପସ୍ଥିତ ପ୍ରେସ୍ କ୍ଲବ୍ ସଦସ୍ୟ ତଥା ଖବରଦାତାମାନଙ୍କ ମଧ୍ୟରେ ସଞ୍ଜୟ ଦାସ, କଳ୍ପତରୁ ସାମଲ, ପ୍ରତାପ ଚନ୍ଦ୍ର ସ୍ୱାଇଁ, ବିରଞ୍ଚି ନାରାୟଣ ଦାସ, ଲକ୍ଷ୍ମୀକାନ୍ତ ସ୍ୱାଇଁ, ଶ୍ରୀମନ୍ତ ଦାସ, ସୁବାସ ସ୍ୱାଇଁ, ହେମନ୍ତ ସ୍ୱାଇଁ, ପ୍ରଦୀପ ସ୍ୱାଇଁ, ନୟନମଣି ସାମଲ, ସୁଶାନ୍ତ ରାଉତ, ବିଘ୍ନେଶ୍ୱର ସେଠୀ ଓ ଜନ୍ମେଜୟ ମଲ୍ଲିକଙ୍କ ସମେତ ବହୁ ସଦସ୍ୟ ଉପସ୍ଥିତ ଥିଲେ। ଏହି ଅବସରରେ ପ୍ରେସ୍ କ୍ଲବ୍ ପକ୍ଷରୁ ଖବରକାଗଜ ବିତରକ ଯତୀନ୍ଦ୍ର ନାଥ ରଥଙ୍କୁ ସମ୍ବର୍ଦ୍ଧିତ କରାଯାଇଥିଲା।
ସଭା ପୂର୍ବରୁ ବିଧାୟକ ତଥା ଜିଲା ଯୋଜନା ବୋର୍ଡର ଅଧ୍ୟକ୍ଷ ଡ. ଦୁର୍ଗା ପ୍ରସନ୍ନ ନାୟକ ଦିଲ୍ଲୀରେ ଥିବାରୁ ଭିଡିଓ ବାର୍ତ୍ତା ମାଧ୍ୟମରେ ଜାତୀୟ ପ୍ରେସ୍ ଦିବସ ଅବସରରେ ଶୁଭକାମନା ଓ ଶୁଭେଚ୍ଛା ଜଣାଇଥିଲେ।

